Дэлхийн Эрүүл мэндийн байгууллагаас жил бүрийн энэ өдрийг “Сонсгол хамгаалах дэлхийн өдөр” болгон тэмдэглэдэг.
Энэ жил уг өдрийг “Амьдралыг сонс! Сонсголын бэрхшээл таныг болон таны хүүхдийг нийгмээс тусгаарлахгүй ёсгүй” гэсэн уриан дор өнгөрүүлж байна. Энэ өдөр сонсголын бэрхшээлтэй иргэд дуу хоолойгоо нэгтгэн тулгарч буй зүйлээ хэлэлцэн олон нийтийг оролцуулдаг.
Дэлхийн хүн амын дөрөвний нэг буюу 2.5 тэрбум орчим хүн 2050 он гэхэд сонсох чадвараа хэсэгчлэн эсвэл бүрэн алдаж болзошгүй байна. Нөхцөл байдлыг хүндрүүлэхгүйн тулд улс орнууд урьдчилан сэргийлэх болон эмнэлгийн тусламжийн хүртээмжийг хангахад хөрөнгө оруулах шаардлагатай байна гэж Дэлхийн эрүүл мэндийн байгууллагаас гаргасан илтгэлд анхааруулжээ. Илтгэлийг жил бүрийн гуравдугаар сарын 3-нд тэмдэглэдэг Чихний эрүүл мэнд, сонсголын чадварыг хамгаалах олон улсын өдөрт зориулан нийтэлжээ.
Сонсголын бэрхшээлтэй болох эрсдэлтэй 2.5 тэрбум хүний 700 саяд нь эмчилгээ, сэргээн засах үйлчилгээ шаардагдах болно гэж тус илтгэлд онцолжээ.
Түүнчлэн чих, хамар, хоолой судлалын хөгжлийн түвшний ялгаа баян болон ядуу орнуудад маш их байна. Бага орлоготой улс орнуудын 78 хувьд нэг сая хүнд нэг хүрэхгүй чих, хамар, хоолойн эмч ногдож байна. Хүүхдүүдийг улаан эсэргэнэ, менингитийн эсрэг вакцинд хамруулах, эх, нярайн эмчилгээг сайжруулах, чихний үрэвслийг эрт оношлох замаар сонсголын чадвар алдах эрсдэлийг 60 хувиар буруулах боломжтойг ДЭМБ онцолжээ.