Цаг агаар хүйтэрч, айлууд гэрээ галлах болсонтой холбогдуулан цагдаа, эрүүл мэндийн байгууллагуудад угаарын дуудлага их бүртгэгдэх болсон байна.
Тодруулбал, өнгөрсөн баасан гараг буюу есдүгээр сарын 26-нд Сонгино хайрхан дүүргийн 11 дүгээр хороонд 34 настай эмэгтэй Б нь гурван хүүхдийн хамт угаартсан гэх хэрэг Сонгинохайрхан дүүргийн Цагдаагийн хоёрдугаар хэлтэст шалгаж байна. Шалгалтаар зуухны сойлтыг хаасан, угаар мэдрэгчийн зай дууссан хэмээжээ. Угаартсан ээж болон хүүхдүүдэд эмнэлгийн тусламж үзүүлээд гаргасан байна. Түүнчлэн бямба гаригт Сүхбаатар дүүргийн 16 хороонд 5 хүн, Сүхбаатар дүүргийн 33 дугаар хороонд 2 хүн, Хан-Уул дүүргийн 12-р хороонд 3 хүн тус тус угаартаж өнгөрсөн долоо хоногт нийт 14 хүн угаартсан байна.
Иймд иргэд галлагааг зориулалтын дагуу хийж, зуухныхаа бүрэн бүтэн байдлыг хангаж, мөн яндангаа хөөлж, угаар мэдрэгчээ асаалттай байлгахыг анхааруулж байна.