Монгол Улсын Шадар сайдын тушаалаар нийслэлийн нутаг дэвсгэрт “COVID-19 халдварт цар тахлын үеийн харилцан ажиллагаа, хариу арга хэмжээ” дадлага сургуулийг энэ сарын 6-8-ны өдрүүдэд зохион байгуулахаар бэлтгэл хангаж байна. Энэ хүрээнд зөвхөн тавдугаар сарын 7-ны өдрийн өглөөний 08:00 цагаас оройн 18:00 цаг хүртэл Чингэлтэй дүүргийн нутаг дэвсгэрт орох, гарах бүх хөдөлгөөнийг хаана.
Энэ хугацаанд тус дүүргийн нутаг дэвсгэрийн заагаар цагдаа болон зэвсэгт хүчнийхнийг дайчлан харуул хамгаалалт гаргана. Харин дүүргийн иргэд өглөөний 08:00 цагаас оройны 18:00 цаг хүртэл гэрээсээ гарахгүй, хатуу хөл хорионд орсон байдлаар дадлага хийх бөгөөд төрийн болон ААН-ийн үйл ажиллагааг дээрх хугацаанд хязгаарлана.
Энэхүү дадлага сургуулийг цар тахлын нөхцөл байдал хүндэрсэн үед төрийн байгууллагууд ямар хариу арга хэмжээ авах, төлөвлөгөө, хүндрэл бэрхшээл, нөөц бололцоог тодотгох зорилгоор зохион байгуулж байгаа юм. Дээрх хугацаанд иргэд хөл хорионд орж өөрсдийнхөө аюулгүй байдлыг хангах үүргийг хүлээх бөгөөд бэлэн бэлтгэлээ хангаж, ажил үүргээ зохицуулан дадлага сургуульд идэвхтэй оролцохыг НЗДТГ-аас уриалж байна.