Хотын удирдлагууд саяхнаас “Гудамж талбайд нус цэрээ хаясан хүнийг торгож шийтгэнэ” гэлээ. Үнэхээр дэмжих санал яахын аргагүй мөн. Агаар, дуслын замаар халддаг коронавирус гэх айхавтар аюул дэгдээд байгаа энэ үед олон нийтийн дунд нус, цэрээ ил хаях нь халдварын хамгийн том талбар. Дээр нь газраар нэг нус, цэр болох нь нийслэл хотын өнгө үзэмжид ч муухай. Түүнийг хянадаг байцаагчтай болох нь ээ гэтэл яг газар дээрээ ингэж ажилладаг хүмүүс нь байдаггүй аж. Хотын захиргаа нь ч, цагдаа нь ч үүнийг хэрэгжүүлдэггүй гэдгээ хэлж байна.
Саяхан бас коронавирус илэрсэн гэж олон нийтийг айлгаж, түгшээн худал мэдээлэл тараавал Зөрчлийн хуулиар торгоно гээд мэдэгдээд байсан. Үнэн худал нь мэдэгдэхгүй зөндөө л мэдээлэл сошиалаар хөвөрсөн. Явж, явж “Баянзүрх дүүргийн эмнэлэг дээр яг одоо коронавирус илэрч хөл хорио тогтоолоо” гэх мэдээлэл тараасан хэмээн иргэн Э-г олж, хоёр сая төгрөгөөр торголоо гэж цагдаагийн байгууллагаас мэдэгдсэний дараа гомдол гаргагч эмнэлгийн байгууллага олдсонгүй. Баянзүрх дүүргийн Нэгдсэн эмнэлэг нь ч “Юу ч мэдсэнгүй” гэж байх жишээтэй. Яг л манай хуулиуд шиг. Хэрэгждэггүй, мөрддөггүй захирамж, тушаалууд энэ аж. Дарга нар ерөөсөө айлгах тактик л хэрэглэдэг юм байна.
Б.ЭНХЗАЯА