БНХАУ-ын иргэдийг саатуулан шалгаж байгаа асуудалтай холбогдуулан ТЕГ-ын дарга Д.Гэрэл, ЦЕГ-ын дарга С.Баатаржав нар Засгийн газрын хуралдаанд мэдээлэл өгсөн. ТЕГ-ын дарга Д.Гэрэл, “Яг одоогийн байдлаар нийтдээ 800 орчим БНХАУ-ын иргэнийг шалгаж байгаа бөгөөд тэдний хувьд өнгөрсөн наймдугаар сараас эхлэн цөөн тоогоор манай улсад нэвтэрсөн. Түүнээс хойш Тагнуулын байгууллага болон хууль хяналтын байгууллага хяналтдаа аван, шалгаж байсан. Одоогоор цагдан хорьсон асуудал байхгүй. Харин эдгээр хүмүүсийн үйл ажиллагааг зохион байгуулсан таван хүнийг шалгаж байгаа бөгөөд дөрөв нь БНХАУ-ын иргэн бол нэг нь Монгол Улсын иргэн байжээ. Шалгалтын үйл ажиллагаа явагдаж байна. Богино хугацаанд шалгаж тогтооно” гэлээ. Харин ЦЕГ-ын дарга С.Баатаржав “Эдгээр иргэдийг мөрийтэй тоглоом, цахим тоглоомын чиглэлээр үйл ажиллагаа явуулсан байж болзошгүй гэж үзэж байна гэсэн юм. Мөн одоогоор хэн нэгнийг саатуулсан хорьсон зүйл байхгүй. гэлээ.