Дархан-Уул аймгийн Онцгой байдлын газраас “Каритас Монгол” ТББ-тай хамтран “Гүний уснаас эрэн хайх аврах ажиллагаа”-ны дадлага сургуулийг энэ сарын 28-30-ны Дархан сумын “Түшиг-Уул” ХХК-ийн тогтмол усанд зохион байгууллаа.

Дадлага сургуульд Онцгой байдлын газрын Эрэн хайх, аврах бүлэг, Гал түймэр унтраах, аврах 22,54,55 дугаар ангийн 57 алба хаагч хамрагдсан бөгөөд энэ удаагийн сургуульд ОБЕГ-ын Үндэсний аврах бригадын Эрэн хайх аврах салбарын аврагч, ахлагч П.Дэлгэрсайхан, аврагч, ахлах ахлагч З.Гүррагчаа нар оролцож, туршлагаасаа хуваалцсан юм.

Аврагчид 5-15 метрийн гүнд ачаа хаяж шумбалт хийх, живсэн усан онгоцыг эрэг рүү татан гаргах, усанд осолдсон иргэнийг аврагч нохойны тусламжтайгаар авран эрэг рүү гаргах, нэрвэгдсэн иргэнд эмнэлгийн анхны тусламж үзүүлэх дадлагыг хийлээ.

Онцгой байдлын байгууллагын усчин аврагчдын мэргэжлийн ур чадварыг дээшлүүлэх, дадлага сургууль хийх орчин нөхцлийг бүрдүүлэхээс гадна ард, иргэдэд усны ослын үед өөрийгөө болон бусдыг авран хамгаалах мэдлэг олгох зорилгоор Увс аймгийн Онцгой байдлын газрын алба хаагчид өөрсдийн хүчээр Хяргас нуурын эрэг дээр “Усны сургалт, хяналт дадлагын төв”-ийг барьж байгуулаад байна.

Тус сургалтын төвийн нээлтийн ажиллагааг тохиолдуулан “Гүний уснаас аврах ажиллагааны дадлага сургууль”-ийг зохион байгууллаа.

Дадлага сургуульд Баруун бүсийн Баян-өлгий, Говь-Алтай, Завхан, Ховд, Увс аймгийн Онцгой байдлын газрын 15 алба хаагч хамрагдаж, усны мандлын сэлэлт, нэрвэгдсэн иргэнийг усны гүнээс гаргаж, анхны тусламж үзүүлэх, усанд эрэн хайх, аврах ажиллагааны багаж хэрэгслийг ашиглаж сурах, завь жолоодох болоод иргэдийг тээвэрлэх зэргээр мэргэжлийн ур чадвараа дээшлүүлсэн юм.