2019 оны дөрөвдүгээр сарын 3-нд УИХ-ын УИХ-ын гишүүн, Нийгмийн бодлого, БСШУ-ны байнгын хорооны дарга Д.Оюунгэрэл, УИХ-ын гишүүн Ц.Цогзолмаа, УИХ-ын гишүүн М.Билэгт, ЭМ-ийн дэд сайд Л.Бямбасүрэн болон газрын дарга нар, УИХ-ын НББСШУ-ны байнгын хорооны ажлын албаны хүмүүс Хавдар судлалын үндэсний төвийн үйл ажиллагаатай танилцав. Зочдыг ХСҮТ-ийн ерөнхий захирал Ж.Чинбүрэн, эмнэлэгийн тусламж үйлчилгээ эрхэлсэн дэд захирал С.Хүрэлсүх, бодлого төлөвлөлт, хөгжил эрхэлсэн дэд захирал Л.Баярсайхан болон захиргааны зөвлөлийн гишүүд хүлээн авч уулзлаа. ХСҮТ-ийн ерөнхий захирал Ж.Чинбүрэн хавдрын өвчлөлийн өнөөгийн байдал, ХСҮТ-ийн тусламж үйлчилгээнд нэн тулгамдаж буй асуудлуудын тухай танилцуулсны дараа Д.Оюунхорол гишүүн хэлсэн үгэндээ нийгмийн бодлогын байнгын хорооны даргын ажлыг хүлээж авсны дараах хамгийн эхний анхаарал хандуулж буй ажил бол хавдрын тусламж үйлчилгээг нэмэгдүүлэхийн тулд ХСҮТ-ийн хажууд баригдаад дуусч буй эмнэлэгийн зориулалттай шинэ байрыг ХСҮТ-д шилжүүлэн авах ажил болохыг онцгойлон хэлсэн.
Мөн байр байшин хүрэлцээгүй, орц гарц хязгаарлагдмал, төсвийн дутагдлаас болж тусламж үйлчилгээнд тулгарч буй хүндрэл, саад бэрхшээлүүдийн талаар дэд захирал Л.Баярсайхан, дэд захирал С.Хүрэлсүх, толгой хүзүүний мэс заслын тасгийн эрхлэгч, МУ-ын хүний гавъяат эмч Г.Пүрэвдорж, ерөнхий мэс заслын тасгийн эрхлэгч Р.Ганбаатар, зөвлөх эмч Г.Одонтуяа, хими эмчилгээний тасгийн эрхлэгч Д.Алтанцэцэг, клиник эм зүйн албаны дарга Ж.Жавхлан, сэтгэл зүйч Ч.Аззаяа, физикч инженер Б.Лхагвасүрэн нар үг хэлж хамт олны саналыг шийдвэр гаргагч нарт уламжиллаа.
Уулзалт ярилцлагын төгсгөлд зочид ХСҮТ-ийн өдрийн хими эмчилгээ, шугаман хурдасгуурт туяа эмчилгээний аппаратын суурилуулалтын явц, яаралтай тусламжийн тасгийн үйл ажиллагаа болон шинээр баригдаад дуусч буй эмнэлэгийн байртай танилцлаа. ХСҮТ-ийн үйл ажиллагаатай биечлэн танилцсан УИХ-ын НББСШУБХ-ны дарга, гишүүд болон эрүүл мэндийн дэд сайд бидний санал хүсэлтийг зүгээр сонсоод өнгөрөхгүй шинэ эмнэлэгийн байрыг төрд шилжүүлэн авах, ХСҮТ-ийн орц гарцын асуудлыг нэн даруй шийдэх, хими туяа эмчилгээний өртөг, төсвийг эрүүл мэндийн даатгалын хуулинд нэмэлт өөрчлөлт оруулах замаар шийдвэрлэх, эмч ажиллагсдын хөдөлмөрийн нөхцөлийг сайжруулах зэрэг хэд хэдэн асуудлыг ажил хэрэг болгохоо хамт олны өмнө илэрхийллээ.