Монголын боксын багш, дасгалжуулагч, шүүгч, тамирчдаа өндөр боловсролтой иргэн болгох зорилгоор Монголын боксын холбооны дэргэд “Боловсролын сан” байгуулж түүндээ жил бүр 55 сая төгрөг зарцуулах шийдвэр гаргаснаа тус холбооны ерөнхийлөгч, “Ажнай” корпорацийн ерөнхийлөгч Д.Бат-Эрдэнэ мэдэгдсэн байна.
Энэхүү сайн үйлсийн мэдээг өчигдөр үдэш Монголын боксын спортын ууган гавъяат тамирчин, Ази тивийн хошой аварга Х. Алтанхуяг багшийн “Ардын багш” цолны хүндэтгэлийн цайллагын үеэр МБХ-ны ерөнхийлөгч нийт боксын хамт олондоо хүргэлээ. Бүх л сурч боловсрох залуу насаа боксын спортын төлөө зарцуулсан тамирчдаа зодог тайлсны дараахь амьдралд нь бэлдэхээр энэхүү шийдвэрийг гаргаснаа хэлсэн нь үнэхээр цагаа олсон ажлын эхлэл болж байна.
Мөн тус холбооны ерөнхийлөгч Д.Бат-Эрдэнийн энэ жил тохиож байгаа Монголын боксын түүхт 70 жилийн ойдоо барьсан бас нэгэн бэлэг байлаа. Ардын багш Х.Алтанхуяг багшийн цайллага дээр МБХ-ны ерөнхий нарийн бичгийн дарга Ц.Батнасан “Ийм сайн үйлсийн бэлэг барьсан Д.Бат-Эрдэнэ ерөнхийлөгчид Монголын нийт боксчдынхоо өмнөөс сайн сайхан бүхнийг хүсэн ерөөе” гэлээ.