УИХ-ын чуулганы өнөөдрийн нэгдсэн хуралдаан өндөрлөлөө. Өнөөдрийн хуралдаанаар Үндсэн хуулийн Цэцийн 01 дүгээр дүгнэлтийг хүлээж авахыг дэмжиж, Банкин дахь мөнгөн хадгаламжийн тухай хуулийг хэлэлцэн баталлаа.
Мөнгө угаах болон терроризмыг санхүүжүүлэхтэй тэмцэх хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслийн үзэл баримтлалыг хэлэлцэхийг дэмжив. Мөн Хүний эрхийн дэд хорооны бүрэлдэхүүнд өөрчлөлт оруулж, УИХ-ын гишүүн Л.Болдыг тус хорооны гишүүнээр батлалаа. Ингээд “Төрийн аудитын байгууллагын албан хаагчдад олгох нэмэгдлийн хэмжээг тогтоох тухай” УИХ-ын тогтоолын төслийг хэлэлцэн баталснаар өнөөдрийн чуулган өндөрлөв. Маргааш УИХ-ын чуулганы нэгдсэн хуралдаанд Монгол Улсын Ерөнхийлөгч Х.Баттулга оролцож үг хэлэх бөгөөд намрын чуулган хаалтаа хийх юм.