Өдөрт дөрвөөс таван өөр дуу амандаа аялбал хөгшрөлтөөс сэргийлдэг болохыг эрдэмтэд зөвлөжээ. Ялангуяа ахмад, буурлууд маань ингэж хэвшвэл зөнөх өвчинд өртөхгүй байх сайн талтай гэнэ. Манай хөгшчүүл амандаа дуу аялдаг хүнийг хэзээнээсээ таашаадаггүй байсан. “Битгий гэнгэнээд бай. Муу ёр” гээд л загнаж, үглэдэг сэн. Тэгвэл амандаа дуу аялах нь муу ёр биш гэдгийг шинжлэх ухаан баталжээ.
Дуу хөгжимтэй ойр хүмүүс бие организм болоод гаднах төрхийн хувьд үеийнхнээсээ хамаагүй залуу байдаг нь судалгаагаар тогтоогдсон байна. Эгшиг, аяз хүний стрессийг тайлдаг болохоор бие сэтгэл тайван амгалан оршихуйд тухалдаг. Тэгээд ч хүн дуулахдаа уурлаж уцаарладаггүй шүү дээ. Аманд дууны ая ороод ирэнгүүт л цаанаасаа тийм сайхан уужим тэнүүн мэдрэмж төрж, тухайн агшинд аз жаргалтай болдог. Иймд хүүхэд хөгшид гэлтгүй бүх насныхан байнга дуу аялж байвал стрессээс үүдэлтэй элдэв өвчнөөс сэргийлэх хамгийн сайн жор болох юм байна. Гэхдээ нэг төрлийн биш өөр, өөр дуу цээжиндээ хадгалбал үр дүн нь төдий чинээ байх ажээ. Амандаа дуу аялж явбал арван насаар залуужих юм байна шүү.