Хөрөнгө оруулалтын салбар дахь “Мэргэжлийн ёс зүйн ач холбогдол сэдэв”т өдөрлөг өчигдөр “Blue Sky”д боллоо. Өдөрлөгийг Монголын үнэт цаасны арилжаа эрхлэгчдийн холбоо болон Монголын санхүүгийн шинжээчдийн нийгэмлэг Итгэмжлэгдсэн санхүүгийн шинжээчдийн нийгэмлэгтэй (CFA institute)хамтран зохион байгуулсан юм. Арга хэмжээг нээж Монголын үнэт цаасны арилжаа эрхлэгчдийн холбооны удирдах зөвлөлийн дарга Б.Өлзийбаяр нээж үг хэлэхдээ “Бусдын хөрөнгийг захиран зарцуулж буй хүнд ёс суртахуун зайлшгүй хэрэгтэй. Олон улсад хөрөнгийн зах зээлийн ёс суртахууны дүрэм гэж байдаг. Энэ бол бүх төрлийн мэргэжил дээр яригддаг ёс суртахууны асуудалтай ижил түвшинд яригдах болсон. Тиймээс бид өнөөдөр CFA институтийн ёсзүйн дүрэм, мэргэжлийн үйл ажиллагааны стандартыг монголд хэрэгжүүлэх талаар урт хугацаанд хамтран ажиллах санамж бичигт гарын үсэг зурах гэж байна” гэсэн юм.
Энэхүү ёсзүйн дүрмийн талаар Үнэт цаасны арилжаа эрхлэгчдийн холбооны ёсзүйн хорооны дарга Г.МөнхЭрдэнээс тодруулахад “Манай зах зээл дээр мэргэжилтний ёс зүй гэдэг бол маш чухал асуудал. Компанийн болон үнэт цаасны тухай хуульд томоохон өөрчлөлтүүд орсон ч хуулиар зохицуулж болдоггүй тодорхой асуудлууд бий. Түүнийг дүрэм журмаар зохицуулдаг. Үнэт цаасны зах зээл өндөр хөгжсөн Америк, Японд ч ёс суртахуунгүй үйлдлээс болж компаниа дампууруулсан, түүнээс болоод хэдэн тэрбумын хохирол амссан хүмүүс бий. Хууль хатуу чанга ч гэлээ хүний натур өөрөө буруу зүйл хийх гээд байдаг. Тэрийг нь хааж өгдөг хэм хэмжээ зохицуулалт нь тухайн зах зээлийн ёс зүйн дүрэм юм гэдгийг CFA институт, олон улсын сургалтын байгууллагууд олж илрүүлээд энэ сургалтуудыг хийдэг болсон” гэв.
CFA институтээс гаргасан ёсзүйн дүрэмд зааснаар хөрөнгийн менежер харилцагчийн эрх ашгийг өөрийн эрх ашгаас дээгүүр тавьж, харилцагчийн мэдээллийг нууцлах, үнэн зөвөөр ажиллах, зах зээлд оролцогчдыг төөрөгдүүлэх зорилгоор үнийг гажуудуулах эсвэл зохиомлоор үнийг өсгөхгүй байх ёстой ажээ. Энэхүү дүрмийг манай улс нэвтрүүлж, хэрэгжүүлэх нь ёс суртахууныг эрхэмлэдэг, хөрөнгө оруулагчдын эрх ашгийг хамгаалахыг эрхэм болгодгоо илэрхийлж буйгаас гадна хөрөнгийн зах зээл хөгжих нэг тулгуур нь болохыг CFA институтийн гүйцэтгэх захирал Ник Поллард онцолж байсан юм.
Санамж бичигт гарын үсэг зурсны дараа дотоодын санхүү, хөрөнгө оруулалтын салбар дахь мэргэжлийн ёс зүйн өнөөгийн байдал, гадаад улс орнуудын сайн жишгүүдийн талаар нээлттэй хэлэлцүүлэг өрнүүлэв.
Мөн энэ үеэр “Үнэт цаасны зах зээлд мэргэжлийн үйл ажиллагаа явуулах эрх олгох сургалт”д хамрагдаж, шалгалтдаа тэнцсэн мэргэжилтнүүдэд эрхийн үнэмлэх олгох, тангараг өргөх ёслолын ажиллагаа боллоо. Үнэт цаасны арилжаа эрхлэгчдийн холбоо нь 2011 оноос эхэлж хөрөнгө оруулалтын зөвлөх, үнэт цаасны зуучлал буюу брокер диллер гэсэн хоёр чиглэлээр эрх олгож эхлэсэн бөгөөд Санхүүгийн зохицуулах хорооны мэргэжлийн зөвлөл шалгалт авдаг ажээ. Энэ хүрээнд өчигдөр 93 хүнд олгосон юм.