Дани улсад удтал хоригдож байсан Өмнөд Солонгосын экс ерөнхийлөгч Пак Гын Хэгийн дотны найз Чой Сүүн Силийн охин өнөөдөр үдээс хойш Сөүл хотод хүргэгдэж иржээ.Тэрээр ирсэн шалтгаанаа “Хүүхэд минь Солонгост гэр бүл ч үгүй ганцаараа удаан байсан. Тэгээд буруу ойлголцсон зүйл байгаа бол түүний учрыг хурдан олоод ямар нэг шийдвэрт хүрсэн нь дээр гэж буцаж ирлээ” хэмээн тайлбарласан байна.
Түүнийг таван сар орчим хорьсны эцэст Данийн эрх баригчид Өмнөд Солонгост шилжүүлж өгөхөөр болсон юм. 21 настай Чун Юү Ра энэ оны нэгдүгээр сараас хойш Данийн Аалборг хотын саатуулах төвд хоригдож байв. Өмнөд Солонгосын тал түүнийг шилжүүлж өгөхийг удаа дараа шаардсан ч Чун Юү Ра өөрийгөө буруугүй гэж үзэн Данийн шүүхэд давж заалдсаар байсан юм. Гэвч Данийн эрх баригчид өнгөрсөн дөрөвдүгээр сард түүнийг шилжүүлж өгөх шийдвэр гаргасан байна.
Сөүлийн прокурор түүнийг Эвха Эмэгтэйчүүдийн Их сургуулиас диплом авахдаа ерөнхийлөгчийн нэр нөлөөг ашигласан, Германд морин спортоор хичээллэж, амьдрах зардлаа Самсунг компаниас авлига хэлбэрээр гаргуулсан гэж буруутган шалгах юм. Гэвч тэрээр дээд сургуульд явж байгаагүй, диплом гардан авсан хүн бол би биш хэмээн мэдэгдэж байгаа аж.
Одоо түүний ээж болон экс ерөнхийлөгчийг авлигын хэргээр саатуулан шалгаж байна.
О.ӨНӨР