Соёл урлагийн их сургуулийн Дүрслэх, дизайн урлагийн сургуулиас зохион байгуулж буй нээлттэй хаалганы өдөрлөг өнөөдөр Сүхбаатарын талбайд болж байна. Өдөрлөг нь СУИС-ийн элсэгчдэд зориулсан мэргэжил сурталчлах хөтөлбөрийн хүрээнд өнөөдрийн 16.00 цаг хүртэл үргэлжлэх юм байна. Төрийн шагналт, Ардын зураач Д.Амгалангийн нэрэмжит уг өдөрлөгийг гурав дахь жилдээ зохион байгуулж байгаа аж.
Өдөрлөгт тус сургуулийн оюутнууд өөрсдийн бүтээлүүдээ танилцуулж байгаа бөгөөд зарим нэг бүтээлүүдээс нь худалдан авах боломжтой юм байна. Хувцас дизайн, уран бичлэг, уран сийлбэр, зураасан зураг, уран баримал, уран дархан, уран зураг, Монгол зураг, монументаль уран зураг, чимэглэх урлаг, арьсан урлагийн урлангийн оюутнуудын бүтээлүүдээс сонирхох боломжтой.