Петербургийн метронд бөмбөг тавьсан этгээдийн зураг нийтлэгджээ

ОХУ-ын санкт Петербург хотын метронд өчигдөр өдөр орон нутгийн цагаар 15.04 цагт (Монголын цагаар 20.04) бөмбөг дэлбэрчээ. Эхлээд ирж байсан мэдээгээр таван хүн амь үрэгдэж, 50 гаруй хүн нэрвэгдсэн байв. Шархдагсдыг хотын эмнэлгүүдэд тараан байршуулжээ.

Хэдэн минут өнгөрсний дараа амь үрэгдэгсдийн тоо 10 болон нэмэгдлээ. Оросын Ерөнхий прокурорын хэргийн талаар мэдээлэн мөрдөн байцаалтыг эхлүүлэв.

Гучаад минутын дараа метроны цэнхэр шугамын долоон станцыг хаасан байна. Энэ үеэр Москвагийн метронд аюулгүй байдлын нэмэлт арга хэмжээг авч эхэлжээ. Оросын Ерөнхийлөгч Владимир Путин амь үрэгдэгчдийн ар гэрт эмгэнэл илэрхийлэв. Ерөнхийлөгч Путин болсон хэрэг явдлын гурван хувилбарыг нэрлэв. Терророос гадна ахуй ба гэмт хэргийн хувилбарууд нэрлэгджээ.

Дэлбэрсэн төхөөрөмж нь бага хүчтэй, жижиг хэмжээнийх байсан гэсэн мэдээлэл гарч байна. Станцуудад дэлбэрэлт үргэлжилж байгаагийн улмаас бүх станцууд хаагдсан гэх мэдээлэл сүлжээгээр цацагдаж байна. Интерфакс мэдээлснээр тэсрэх төхөөрөмжийг метронд үлдээсэн ба амиа золиослогч нарын талаар яригдсангүй. Тэсрэх төхөөрөмжийн хүч нь 200-300 граммын тротилийн хэмжээнийх гэнэ. Хотын сүлжээний ачаалал эрс нэмэгдсэний улмаас Яндекс-карт, Яндекс такси сүлжээ унаж байна.

«Площадь Восстания» станцаас нэг тэсрэх төхөөрөмжийг илрүүлэн аюулгүй болгож байгаа тухай “Фонтанка” сайт мэдээлэв.

Өдрийн 16 цагийн байдлаар нийт хэлмэгдэгчдийн тоо 50 орчим болоод тэдэнд эмнэлгийн тусламж үзүүлж байна.

Петербургийн метро дахь дэлбэрэлтийг алан хядах ажиллагаа байсан гэж Ерөнхий прокурорын газрын төлөөлөгч Александр Куренной мэдэгдлээ. Холбооны мөрдөн байцаах товчоо «Сенная площадь», «Технологический институт» гэсэн хоёр станцын хоорондын зам дээр вагонд ганцхан бөмбөг дэлбэрсэн гэж мэдээлэв.

Метронд тэсрэх төхөөрөмжөө үлдээсэн хүний зураг нийтлэгджээ. Гэрч эмэгтэйн яриагаар тэр славян биш царайтай, хачин харагдаж байсан гэнэ.

Тэр эрэгтэй вагонд үүргэвчтэй орж ирээд түүнийг үлдээн дэлбэрэхээс нь хэдхэн секундын өмнө өмнө гарчээ. Өндөр биетэй, хууз өтгөн сахалтай жихадист төрхийн хүн байсан нь дүрс бичлэгээс харагдаж байна.

Энэ зураг дээр байгаа 22 настай казах Максим Аришев тэсрэх төхөөрөмж метроны вагонд тавьсан байж магадгүй гэж мэдээлжээ. Ийнхүү цагдаагийнхан энэ хэргийн хоёр сэжигтэнг идэвхтэй эрэн сурвалжилж байна.

Хамгийн сүүлд авсан мэдээгээр, амиа алдсан хүмүүсийн тоо 14 болж нэмэгджээ.