Монгол Улсын Ерөнхийлөгчийн зарлигаар төрийн дээд одон медаль хүртсэн хүмүүст шагнал гардуулах ёслол өнөөдөр Сүхбаатар дүүргийн Засаг даргын Тамгын газарт боллоо. Боловсрол, соёл урлаг, эрүүл мэнд, эдийн засаг, байгаль орчин, хууль эрх зүй, барилга, худалдаа, аж үйлдвэр, зам тээвэр, уул уурхайн салбарт олон жил үр бүтээлтэй ажилласан хүмүүст төрийн одон, медаль гардуулж цаашид улам ихийг хийж бүтээхийг ерөөсөн сайхан үйл явдал болсон юм. Хэвлэл мэдээлийн салбарт олон жил үр бүтээлтэй ажилласан эрхмүүдэд энэ үеэр шагнал гардуулсан. Монгол Улсын өдөр тутмын төв хэвлэл “Өдрийн сонин”-ы Орлогч эрхлэгч Ж.Сандагдорж Хөдөлмөрийн гавьяаны улаан тугийн одон, Эрэн сурвалжлах тоймчдын албаны дарга, сэтгүүлч Д.Мөнгөндалай, Дизайн, компьютерийн албаны дарга Я.Баярбаатар нар Алтан гадас одонгоор энгэрээ мялаасан нь “Өдрийн сонин” болон www.admin.dnn.mn сайтын хамт олны хувьд том баяр болж байна.
Монголын Үндэсний хэмжээний төв хэвлэл “Өдрийн сонин”-д нийгмийн түүчээ, оюуны санааны чиглүүлэгч болсон олон шилдэг нийтлэлч, тоймч, сэтгүүлчид ажилладаг. Энэ хүмүүсийн бичсэн нийтлэл өдөр бүр Монголын нийгэм, хэвлэл мэдээллийн салбарт шуугиан дэгдээж, асуудал дэвшүүлж олон улсын хэмжээнд “Өдрийн сонин”-д нийтлэгдсэн нийтлэл, мэдээллийг эх сурвалж болгон хүн төрөлхтний тольт мэлмийд хүргэдэг билээ. Түүнчлэн манай сонины нийтлэл, сурвалжлагын мөрөөр нийгэмд чиглэсэн олон арга хэмжээ, аян, хөтөлбөр хэрэгжиж үр дүнд хүрдгийг манай олон мянган уншигчид андахгүй.
2016 онд “Өдрийн сонин” Монголын хэвлэл мэдээллийн салбарын Гран При буюу Шилдгийн шилдэг шагналыг гардсан юм.
Д.ГАНСАРУУЛ