Хүүхэд харах үйлчилгээг энэ оныг дуусахаар зогсоох шийдвэрийг Засгийн газраас гаргаад буй. Засгийн газрын уг шийдвэрт эцэг эхчүүд ихээхэн дургүйцэж байгаа юм. Гэвч нөгөө талаасаа Хүүхэд харах үйлчилгээ нэрийн дор бохир, стандарт хэвийн бус газарт хүүхдүүдийг харах тохиолдол цөөнгүй байгаа аж. Тиймээс Хөдөлмөр, нийгмийн хамгааллын сайд Н.Номтойбаярын тушаалаар байгуулагдсан ажлын хэсэг Хүүхэд харах үйлчилгээний тухай хууль, Хүүхэд харах үйлчилгээнд тавих нийтлэг шаардлага стандарт болон холбогдох хууль тогтоомжийн хэрэгжилт, хүүхдэд үзүүлж буй үйлчилгээний чанар, хүртээмжид хяналт шалгалт хийжээ. Уг асуудлаар Хөдөлмөр нийгмийн хамгааллын сайд Н.Номтойбаяраас зарим зүйлийг тодрууллаа.
-Хүүхэд харах үйлчилгээг зогсоож байгаад иргэд ихээхэн дургүйцэж байна. Энэ асуудлаар тайлбар өгөөч?
-Ерөнхий сайд Ж.Эрдэнэбатын өгсөн үүрэг даалгаврын хүрээнд би хөдөө орон нутагт буюу 12 аймаг, хоёр дүүрэгт ажиллалаа. Ингэхдээ уг боломжийг ашиглаад Хүүхэд харах үйлчилгээ явуулж буй зарим төвийн үйл ажиллагаатай танилцсан. Стандарт шаардлагыг хангаж үйл ажиллагаа явуулж байгаа хувь хүн, аж ахуйн нэгж байна уу гэвэл байна. Гэвч сайны хажуугаар саар гэгчээр хүүхдийн эрх, хамгааллын бодлого хангагдаагүй, орчин нөхцөл нь тааруу төв ч байна. Жишээ нь олон нохой тэжээхийн хажуугаар Хүүхэд харах үйлчилгээ явуулж байна. Мөн өрөөний халуун дулаан, чийгшил, хуурайшилт, ариун цэвэр, аюулгүй байдлын асуудал зөрчигдсөн байдалтай төв байна. Яг дөрвөн замын уулзвар дээр Хүүхэд харах үйлчилгээний төв нь байрлаж байх жишээтэй.
-Хүүхэд харж буй багш нарт шалгалт хийсэн үү. Ямар зөрчил илэрсэн бэ?
-Эцэг эхчүүдтэйгээ ямар ч холбоогүй гэх мэт зөрчлүүд илэрсэн. Шалгалт үргэлжилсээр байна. Стандарт хангагдахгүй байна.
-Яамны зүгээс ямар бодлого баримталж байгаа вэ?
-Хүүхэд харах үйлчилгээг үргэлжлүүлье. Үргэлжлүүлэхдээ өнөөдрийн тавигдаж буй стандартын дагуу хүүхдэд тавигдах хяналт шаардлагыг сайжруулья гэж бодож байна. УИХ-аар төсөв хэлэлцэж байна. Энэ үеэр энэхүү асуудлыг хөндөх боломжтой байгаа. Яамны байр суурь бол ажлын хэсгийн мэдээллийг аваад онцгой анхаарах, дэмжих нь зүйтэй юм байна гэж бодож байна. Урьдчилсан дүгнэлт гараатхаг.