Монголын Хөлбөмбөгийн Холбоотой хамтран
ажиллах болсон “Их талын дуулиан” ТББ, нийслэлийн 377 жилийн ойд
зориулан “Нийслэлийн аж ахуйн нэгж албан байгууллагууд”-ын АШТ-ийг
амжилттай зохион байгуулж, өчигдөр аваргуудаа тодрууллаа. Анх “Дуулиан
2020” тэмцээнийг ивээн тэтгэгчдийн дунд зохиогддог байсан уг тэмцээн өнөө
жил хүр цараагаа тэлэн хотын аваргын хэмжээнд хүртэл зохиогдсон гэхэд болно.
Нийт 14 багийн 150 гаруй тамирчид 10-р сарын 28, 30-ны өдрүүдэд МХБХ-ны
футзалын ордонд авъяас чадвар, хурд хүч, оюун ухаан, авхаалж самбаага
уралдуулан байж өрсөлдлөө. Баг тус бүрт футзалын “Пепси” дээд лигт
тоглодог нэг тамирчин багтах боломжтой гэсэн дүрэм нь тэмцээнийг улам
чанаржуулсан. Өнгөрөгч баасан гаригт хэсгийн эхний, өчигдөр хэсгийн шийдвэрлэх
болон медалийн төлөөх сонирхолтой тоглолтууд явагдсан.
Тэмцээний тэргүүн байрт “MBC” компанийн баг шалгарсан
бол тэдэнд ялагдсан “Keisy fine” баг мөнгөн медаль хүртсэн.
“Хүрхрээ” нэгдүгээр лигийн аварга “Гоёо” клубт тоглодог
гурван тоглогч “Keisy fine” багийн бүрэлдэхүүнд байсан ч олон жил
футзал, гудамжны хөлбөмбөгийн тэмцээнд хүч үзэж буй “MBC”-г баралгүй
хожигдсон нь талбайн хөлбөмбөг, футзалын ялгааг бага ч гэсэн харуулсан гэхэд
хэлсдэхгүй. Харин гуравдугаар байрыг “УБ Унаганууд” клубын тоглогч Г.Баярсайханаар
ахлуулсан “Хас банк”-ы нэгдүгээр баг эзэлсэн юм. Тэмцээний
шилдэгүүдийг тодруулахад аваргын төлөөх тоглолтод бэртэлтэй байсан ч оролцож,
багаа алтан медаль хүртэхэд үнэтэй хувь нэмэр оруулсан С.Лонжидпунцаг шилдэг
хаалгачаар тодорсон. Харин шилдэг довтлогчоор шагналт байранд багтаагүй
“OT & Grand smart” багийн галын шугамыг хариуцан тоглосон
У.Эрдэнэхуяг 12 гоолтойгоор шалгарав. Тэмцээний турш хамгаалалт, довтолгоонд
жигд оролцсон тэгш тоглогчоор “Хас банк-1” багийн Г.Ганзориг
тодорсоноор, шагналт байранд шалгарсан баг тамирчид МХБХ-ны фузалын ордонд
төрийн дууллаа эгшиглүүлж, тэмцээнээ хаасан юм.
