Өнөөдөр 09:00 цагт “Монгол Улсын Нээлттэй засгийн түншлэлийн 2016-2018 оны Үйл ажиллагааны үндэсний төлөвлөгөө”-г олон нийтэд албан ёсоор танилцуулах, төлөвлөгөөг хэрэгжүүлэхтэй холбогдуулан хэрэгжилтийг хангуулах тогтолцоог бий болгох, холбогдох иргэний нийгмийн төлөөллүүдийг өргөнөөр оролцуулах тухай асуудлыг нээлттэй хэлэлцүүлэх арга хэмжээг зохион байгуулах аж. Энэхүү Олон улсын нээлттэй засгийн түншлэл нь гишүүн орнууддаа нээлттэй, иргэдийн оролцоог дэмждэг, авлигын эсрэг тэмцдэг, үр ашигтай, хариуцлагатай Засгийн газрыг бий болгох зорилго бүхий Засгийн газар болон иргэний нийгмийн байгууллагын сайн дурын хамтын ажиллагааны олон улсын санаачлага юм. 2011 онд анх найман орны санаачлагаар үүсгэн байгуулагдсанаасаа хойш 70 гишүүн оронтой болж өргөжөөд байгаа аж.
Монгол Улс нээлттэй засгийн түншлэлд 2013 онд нэгдэн орсон бөгөөд II дахь “Үйл ажиллагааны үндэсний төлөвлөгөө”-гөө боловсруулан батлаад байна. “Үйл ажиллагааны үндэсний төлөвлөгөө” нь Олон улсын нээлттэй засгийн түншлэлийн үйл ажиллагааны нэг үндсэн хэлбэр бөгөөд төлөвлөгөөгөөр дамжуулан гишүүн орнуудынхаа Засгийн газрыг ил тод, иргэдийн оролцоотой, илүү хариуцлагатай болоход нь дэмжлэг үзүүлдэг бөгөөд үүний үр дүнд олон улсын түвшинд засаглалын чиглэлээр ахиц дэвшил гаргах боломжтой юм. Тус арга хэмжээ 12:30 цаг хүртэл“Пума Империал-2” зочид буудлын хурлын танхимд болох ажээ.