Нийслэлийн онцгой байдлын газар нийслэлд үйл ажиллагаа явуулдаг авто зогсоол, авто засварын газар, авто үйлчилгээний байгууллагуудад гамшгаас хамгаалах болон гал түймрийн улсын хяналтыг хэрэгжүүлэх төлөвлөгөөт шалгалтыг хийж байгаа тухай бид өмнө мэдээлсэн.
Тус шалгалтад нийт 199 объект хамрагдсан бөгөөд дүрэм, норм, стандартын холбогдох заалтыг зөрчсөн 1191 зөрчил илрүүлсэн байна. Илэрсэн зөрчлийн 158 зөрчил буюу 13.2 хувийг газар дээр нь арилгуулан, бусад зөрчлүүдийг арилгуулах албан шаардлага хүргүүлсэн байна.
Шалгалтын явцад галын аюулгүй байдлын норм, нормативын баримт бичгийн шаардлагыг ноцтой зөрчсөн Баянзүрх дүүргийн 15 дугаар хорооны нутаг дэвсгэрт байршилтай “Алтан Өргөө” сууц өмчлөгчдийн холбооны орон сууцны 72 а, 73 а барилгуудын зоорийн давхарт төлөвлөгдсөн автомашины гараж, иргэн Н.Пүрэвдоржийн авто засварын газар зэрэг нийт гурван газрын үйл ажиллагааг түр зогсоожээ.
Түүнчлэн 10 объектыг хоёр сая 156 мянган төгрөгөөр торгож, захиргааны арга хэмжээ авсан байна.