Монгол Улсын Соёлын гавьяат зүтгэлтэн зохиолч,
яруу найрагч Ш.Дулмаагийн шүлэг, Соёлын гавьяат зүтгэлтэн хөгжмийн зохиолч
И.Болоожийн аялгуу, “Өргөө” хамтлагийн гоцлол дуучин, гавьяат жүжигчин С.Бархасын
дуулснаар монгол түмэнд хүрсэн “Алтанзул цэцэг” дуу өнөөдөр хөшөөнд мөнхөрлөө.
Тус хөшөөг Тэнгис кино театрын зүүн хойд талд байрлах “Эх үрс” бичил цэцэрлэг
хүрээлэнд босгожээ. Ш.Дулмаа найрагч “Алтанзул”-аар дуу хийх болсон тухайгаа
ярихдаа “Алтанзул гэдэг цэцэг бол мөнхийн тасардаггүй цэцэг. Нэг үр нь тасран
газарт унах юм бол дахин соёолж байдаг. Иймийн учир монголын ард түмнийг мөнх
оршихын бэлгэдэл болгож энэ дууг хийсэн юм. Дуу минь та бүхний сэтгэл зүрхэнд
оршиж байгаад чин сэтгэлээсээ баяртай байна” гэлээ. Хөшөөний нээлтийн үеэр
“Өргөө” хамтлагийнхан хамтлагаараа ирж “Алтанзул”-аа дуулсан юм.