Өнгөрсөн тавдугаар сард Катар улсын Доха хотод Чөлөөт бөхийн Ази тивийн аварга шалгаруулах тэмцээн болсон билээ. Тэгвэл тус тэмцээний эрэгтэйчүүдийн 70 кг-ын жинд мөнгөн медаль хүртсэн Тажикийн Зелимхан Юсупов нь допингийн шинжилгээгээр ВАДА буюу Дэлхийн допингийн эсрэг агентлагаас хориглосон эм бэлдмэл хэрэглэсэн нь илэрсэн гэнэ.
Тиймээс түүний авсан мөнгөн медалийг хүчингүйд тооцон хурааж авахаар болсон байна. Улмаар нэгдүгээр тойрогт 4:6 онооны харьцаагаар түүнд ялагдсан ч хүрэл медалийн төлөө барилдаанд Монголын бөх Г.Идэрхүүг 12:2 онооны харьцаагаар хожиж хүрэл медаль хүртсэн Киргизийн бөх Э.Довдурбек Уулуд мөнгөн медалийг нөхөж олгохоор болсон аж. Харин шагналт тавдугаар байрт орсон Монголын бөх Г.Идэрхүүд хүрэл медаль нөхөн олгох шийдвэрийг ДБНХ-ноос гаргасан сурагтай.