Малайзын Селангор мужийн Бандар-Утама дүүрэгт өчигдөр /VI.15/ орой үл
таних этгээдүүд монгол эмэгтэйг олон удаа буудаж, маш хүнд шархдуулжээ.
Хохирогч эмэгтэй “Toyota Land Cruiser” автомашин болон нэг эрэгтэйн
дунд зогсож байсан бөгөөд тэдний хажуугаар мотоциклтой өнгөрсөн хоёр
эрэгтэй гал нээсэн аж.
Эх сурвалжийн мэдээлснээр мотоциклтой эрэгтэйчүүдийн нэг нь найман сум
буудсаны дөрөв нь эмэгтэйг оносон бөгөөд сэжигтнүүд тэр даруй хэргийн
газраас зугтжээ.
Хохирогч эмэгтэйтэй хамт явж байсан хүн гэмтээгүй бөгөөд тэрбээр яаралтай цагдаа дуудсан аж.
Хохирогчийг нэн даруй “KPJ Damansara” эмнэлэгт хүргэсэн ч тэндээс нь
Малайзын их сургуулийн эрүүл мэндийн төв рүү шилжүүлсэн байна. Одоогоор
түүний биеийн байдал тогтвортой байгаа талаар эх сурвалжийн мэдээнд
дурьджээ.
Гадаад хэргийн яамнаас энэ талаар тодруулахад, “Малайз дахь Элчин
сайдын яамтай холбогдож, хэргийг тодруулж байна. Одоогоор ямар нэгэн
хариу ирээгүй” гэлээ.