Нийслэлийн Авто замын газар энэ онд хэрэгжүүлэх авто зам, замын байгууламжийн зураг төсөл, барилгын ажлын гүйцэтгэгч байгууллагуудын уулзалт өчигдөр боллоо. Уулзалтанд нийслэлийн Засаг дарга бөгөөд Улаанбаатар хотын захирагч Э.Бат-Үүл оролцсон юм. Нийслэл хотод 2012-2014 онд 81.9 км авто зам, 144.9 км автозамыг өргөтгөж шинэчлэсэн байна. Мөн 654.9 урт метр төмөр бетон гүүрийг шинээр барьж, 380.7 урт метр гүүрийг өргөтгөн шинэчлэж, явган хүнд зориулсан гурван гүүрэн гарц, нэг нүхэн гарц, төмөр зам доогуур хоёр байршилд нүхэн гарц зэрэг бүтээн байгуулалтын ажлыг тус тус хийсэн ажээ. 2008-2012 онд өмнөх жилүүдээс гурав дахин урт замыг хийсэн байна. Өнгөрсөн жил Улаанбаатарын баруун тэнхлэгийн замыг сайжруулж тэлсэн бол энэ жил зүүн чиглэлийн замуудыг сайжруулж шинэчлэх зорилт тавьж байгаа аж. Мөн энэ үеэр Нийслэлийн Авто замын газрын дарга Д.Нанзаддорж 2015 онд Улаанбаатар хотод хэрэгжүүлэх замын ажлаа танилцуулж, цаашлаад компаниуд юунд анхаарах талаар хэлэлцлээ. Үүнд, он дамжиж хийж байгаа ажилд Нарны замыг 19-н арын замтай холбох 1.5 км авто зам, замын байгууламжийн 58 у/м гүүр болон төмөр зам доогуурх нарны замтай холбогдсон 22 метр туннелийн хамт барих ажил, Нарны замаас Саруул хотхон хүртэл 0.24 км авто зам, 55 у/м гүүрийн барилгын ажил, Өлзийт хороолол био комбинат шувуун фабрик чиглэлийн 9.06 км авто замын барилгын ажил орж байгаа аж. Энэ байдлаар энэ онд нийслэлийн хэмжээнд 91.5 тэрбум төгрөгөөр нийт 14 байршилд зам барилгын ажил хийх юм байна.