В.ПУТИН: ЗАХИАЛГАТ, ӨДӨӨН ХАТГАЖ ТУРХИРСАН АЛЛАГА БОЛЛОО
Өнгөрсөн сарын 27-ноос 28-нд шилжих шөнө Москвад Оросын сөрөг хүчний удирдагч Борис Немцов буудуулж амиа алдсан хэрэг гарсан. Түүний амийг хэн хороосон байж болох талаарх элдэв таамгийг дэлхийн улсууд дэвшүүлж байна. Зарим нь лалын хэт даврагчид түүнийг буудсан гэж үзэж буй бол зарим нь ОХУ-ын Ерөнхийлөгч Владимир Путиныг улсын тэргүүнээс буулгахыг хүсэгчид ийн өдөөн хатгалга үйлдэж байна хэмээн харж буй бололтой.
Өнгөрсөн бямба гаригт ОХУ-ын мөрдөн байцаагч, улс төрчид төрийн телевизээр сөрөг хүчний удирдагч Немцов Москвад юуны учир буудуулж амиа алдсан байж болох шалтгааныг хайж ярилцжээ. Немцов ОХУ-ын ерөнхийлөгчийн эсрэг байр суурьтай байсан нь үхлийн ганц шалтгаан болж буй бололтой хэмээн АР мэдээлсэн байна. Харин ВВС агентлаг “Уг аллагыг Немцовын улс төрийн үйл ажиллагаатай холбоотой, эсвэл өмнөх бизнестэй нь холбоотойгоор түүнд өстэй этгээдүүд үйлдсэн” гэж таамаглажээ.
Дээрх аллага, Немцов ОХУ-ын эдийн засгийн хямрал, Украины эсрэг дайн болон галзуу түрэмгий үхлийн аюултай бодлого барьж буй Путины эсрэг тэмцэж, ням гаригт жагсахыг Москвагийн оршин суугчдад уриалсан радио ярилцлага өгснөөс хэдхэн цагийн дараа болсон байна.
Түүнийг олонтаа буудуулж амиа алдсаны дараа ням гаригт болох эсэргүүцлийн жагсаалыг цуцалжээ. Оронд нь гашуудлын жагсаал хийхийг уриалж, улмаар Москва хотын захиргаанаас сөрөг хүчнийхэнд зөвшөөрлийг нь даруй өгсөн мэдээлэл байна.
Хэдийгээр ОХУ-д эдийн засгийн хямрал нүүрлэж, инфляци өссөн ч сүүлийн саруудад Путиныг дэмжих ард түмний дэмжлэг 80 хувиас буухгүй байгаа юм.
ОХУ-ын Ерөнхийлөгч Владимир Путин энэ хэргийг захиалгат бөгөөд өдөөн хатган турхирсан аллага боллоо гэж үзэж буйгаа илэрхийлжээ. Тэрээр Немцовыг буудаж хөнөөсөн аллагын мөрдөн шалгах ажиллагааг өөрийн биеэр удирдахыг хууль сахиулах байгууллагын дарга нартаа тушаажээ.
Путины өгсөн үүргийн дагуу байгуулсан мөрдөн шалгах комиссын бүрэлдэхүүнд хууль сахиулах байгууллагуудын хамгийн шилдэг ажилтнуудыг оруулсан байна. Түүнийг хөнөөсөн хэргийг мөрдөн шалгах ажиллагааг Оросын Дотоод хэргийн сайд Владимир Колокольцев хяналтдаа авчээ.
-БОРИС НЕМЦОВТОЙ ЭНЭ САРЫН 3-НД САЛАХ ЁС ГҮЙЦЭТГЭНЭ-
ОХУ-ын төрийн тэргүүн, Немцовын 86 настай ээжид эмгэнэлийн цахилгаан утас илгээж, түүндээ “Бузар, эрээ цээргүй аллага зохион байгуулагчид болон гэмт этгээдүүдийг олж илрүүлж, зохих шийтгэлийг нь хүлээлгэх болно” гэснийг Кремль мэдээлсэн байна. Путины хэвлэлийн төлөөлөгч Дмитрий Песков “Ерөнхийлөгч Владимир Путин энэхүү аллага нь туйлын өдөөн хатгасан үйлдэл боллоо гэж мэдэгдсэн гэжээ.
Оросын сөрөг хүчний удирдагчийн аминд халдсан ноцтой хэргийн дараа олон мянган хүн түүнд хүндэтгэл үзүүлсний дотор АНУ болон Европын улс орнуудын элчин сайд нар байсан аж.
Оросын сөрөг хүчнийг 20 жил удирдсан, “Солидарность” хөдөлгөөнийг үүсгэн байгуулагч, удирдагчдын нэг, 55 настай Борис Немцовыг өнгөрсөн баасан гаригийн шөнө дунд Москвагаас холгүй орших Большой Москворецкийн гүүрэн дээр найз бүсгүйтэйгээ хамт явах үед нь цагаан өнгийн машинтай үл таних этгээдүүд араас нь буудсан. Түүн рүү зургаан удаа буудсанаас дөрвөн сум нуруун тус газар нь онож, тэрээр газар дээрээ нас барсан талаар Оросын хэвлэлүүдэд бичсэн байна. Тэрээр “РПР-ПАРНАС” улс төрийн намыг хамтран даргалагч, Оросын сөрөг хүчний зохицуулах зөвлөлийн гишүүн байв.
Борис Немцовыг гуравдугаар сарын 3-нд Москва хотын Троекуровск оршуулгын газарт оршуулахаар болсныг “РПР-ПАРНАС” намын Холбооны улс төрийн зөвлөлийн товчооны гишүүн Константин Мерзликин мэдээлжээ.
Түүнтэй Москвагийн цагаар 10:00-14:00 цагийн хооронд Сахаровын төвд салах ёс гүйцэтгэсний дараа оршуулах ёслол Троекуровскт болох юм байна.
Э.ЭНХ-ЭРДЭНЭ
