Хэн нэгэнд сэтгэлээ уудлах хэрэгцээ хүн бүрт байдаг. Ханиа сэтгэлээр унагахгүйн тулд ярьж болохгүй юм гэж бий. Найз нөхдөдөө зовлонгоо байнга тоочоод байж болохгүй. Тэгээд ч хүний зовлонг сонсох дуртай хүн гэж байхгүй. Жаргалтай үед найз нөхөд олон. Зовлонтой үед бурхнаас өөр хандах хүн олдохгүй ч байж мэднэ. Бурханд захидал бичих хаяг гэж байдаг бол мөн ч олон хүн стрессээ тайлах байсан даа гэж заримдаа боддог юм.
Мэдээж бурхан хүн бүрийг сонсч, хайрлаж байгаа. Бурхныг сэтгэлдээ ургуулаад, хамаг зовлонгоо ярьчихдаг хүнд бол мессеж бичих хэрэггүй ч байж магад. Харин хэн нэгэнд уурлаж бухимдсан үедээ унтажч чаддаггүй, бухимдлаа заавал бичиж ярьж, гаргаж байж тайвширдаг хүмүүст зориулсан үйлчилгээ “Бурханд мессеж бичих” арга байж мэднэ.
Гар утасны үйлчилгээ эрхлэгчид мэдээж хувь хүний яриа, мессежийн нууцыг хадгалах үүрэгтэй. Үүнийхээ хариуд тэд олон мессеж авах вий. Үйлчлүүлэгчид нь харин хэн нэгэнд сэтгэлээ уудлах боломж гарах нь нийгмийн бухимдлыг хугаслахад нэмэр хандив болж мэднэ.
Санта байдаг гэж итгэдэг хүүхдүүдийн өвлийн өвгөнд илгээсэн захидлыг хүлээж авдаг шуудангийн үйлчилгээ байдаг. Бүр “Зургийн аппараттай болмоор байна” гэж хүссэн танилын маань охинд АНУ-д байсан хаягаар нь шинэхэн аппарат ирсэн гээч. Сантад захидал бичээд хариуд нь бэлэг авах гайхамшигтай. Бурхан танд хариу ирүүлэхгүй ч хэн нэгэн таны захидлыг хүлээж авдаг бол. Шөнө, өдөр хэзээ ч хандахад бэлэн бол… Бурхан тусгай дугаартай бол томчууд харин баярлах болов уу?
Б.ЯНЖМАА