“Иргэдийн төлбөрийн чадварт нийцсэн орон сууцны стратеги” сэдэвтэй хэлэлцүүлэг энэ сарын 10-нд Хангарьд ордоны хурлын танхимд болох гэж байна. Хэлэлцүүлгийг Нийслэлийн Засаг дарга нээж үг хэлэх юм байна. Төлбөрийн чадварт нийцсэн орон сууцны институтын Төслийн менежер Аня Брикмэн Раредон “Улаанбаатар хотын иргэдийн төлбөрийн чадварт нийцсэн орон сууцны стратеги“-ийн танилцуулгыг хийх аж. Эхний хэлэлцүүлэг нь “Бага болон дундаас доош орлоготой өрхүүдийн төлбөрийн чадварт нийцсэн орон сууцны нийлүүлэлтийг нэмэгдүүлэх” нь гэсэн сэдэвтэй байх нь. Хоёр дахь хэлэлцүүлэг нь “Төлбөрийн чадварт нийцсэн орон сууцаар хангах санхүүгийн тогтвортой механизмыг бий болгох” гэсэн сэдэвтэй. Дараагийн хэлэлцүүлэг нь “Төлбөрийн чадварт нийцсэн орон сууцны байгууллагын бүтэц, эрх зүйн орчныг бий болгох, оролцогчдын хамтын ажиллагааг бэхжүүлэх нь” гэсэн сэдвээр өрнөх юм байна.

Нийслэлийн Засаг даргын Тамгын газар Дэлхийн банк, АНУ-ын Төлбөрийн чадварт нийцсэн орон сууцны институттай хамтарч “Улаанбаатар хотын иргэдийн төлбөрийн чадварт нийцсэн орон сууцны стратеги” хэлэлцүүлэг зохион байгуулах гэж байна. Хэлэлцүүлэг 2015 оны 01 дүгээр сарын 10-ны өдөр 09 цагт нийслэлийн төр захиргааны Хангарьд ордонд болох бөгөөд нийслэлийн Засаг даргын Тамгын газар, Барилга хот байгуулалтын яам, Байгаль орчин, ногоон хөгжлийн яам, Нийслэлийн Ерөнхий төлөвлөгөөний газар, Гэр хорооллын хөгжлийн газар, “Гэр хорооллыг орон сууцжуулах төсөл” НӨҮГ, Төрийн орон сууцны корпорацийн холбогдох албаныхан оролцоно. Мөн Монгол банк, Сангийн яам, Монголын Ипотекийн Корпораци, Монголын Банкны Холбоо зэрэг банк, санхүүгийн байгууллагын төлөөлөл оролцох юм. Хэлэлцүүлгээр Бага болон дундаас доош орлоготой өрхүүдийн төлбөрийн чадварт нийцсэн орон сууцны нийлүүлэлтийг хэрхэн нэмэгдүүлэх, Төлбөрийн чадварт нийцсэн орон сууцаар хангах санхүүгийн тогтвортой механизмыг бий болгоход ямар чиглэлээр ажиллах зэрэг асуудлаар талууд харилцан санал солилцож, хэлэлцэнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.