Өнгөрсөн хоёрдугаар сараас Баруун Африкийн орнуудаар тархаж, 7000-аад хүний аминд хүрээд буй эбола вирусийн эсрэг тэмцэж байгаа эмч, сувилагчдыг Америкийн “Time” сэтгүүл Оны онцлох хүнээр зарлалаа. Долоо хоног тутмын, дэлхийн хамгийн том сэтгүүл, олон улсад хүндтэй “Time”-ын редакц тэднийг амь, бие үл хайрлан, бусдыг аврахын төлөө зүтгэсэн, шувтарч буй 2014 онд хамгийн олон хүнд нөлөөлсөн, онцгой гавьяатнууд хэмээн үнэлжээ.
Тус сэтгүүл өмнө нь Унгарын хувьсгалчид, Америкийн эрдэмтэд, энхийн зуучлагчид гэхчилэн бүлэг хүнийг Оны онцлох хүнээр тодруулж байв. Энэ оны “Time”-ийн онцлох хүнээр уншигчид болон сошиал медиа хэрэглэгчид Энэтхэгийн Ерөнхий сайд Нарендра Модийг тодруулсан ч тэрбээр хоёр дахь шатны шалгаруулалтад үлдсэн найман хүний нэг ч болж чадаагүй байна. Өнгөрсөн жил “Time” сэтгүүл Ропын пап Францисийг Оны онцлох хүнээр нэрлэж байсан юм.