Харилцаа холбооны зохицуулах газраас C1, TV8, “Шинэ дэлхий”, ТВ9 телевизийн хоёрдугаар сувгийн тусгай эрхийг түдгэлзүүлсэн гэж ярьж байна. Харилцаа холбооны зохицуулах газраас телевизүүдийн сувгийн эрхийг өгдөг аж. Эдгээр телевизүүдийн тусгай эрхийг түдгэлзүүлэх болсон шалтгаан нь тайлангаа хугацаанд нь өгөөгүй гэх. Дурын түшмэл тайлангаа хугацаанд нь өгөөгүй гээд хэвлэлийн эрх чөлөөнд халддаг оронд ардчилал, эрх чөлөө, хүний эрх ярих хэрэг алга. Хэвлэл мэдээлэл, хүний эрх манай оронд хаалгасан боолгосон нэг иймэрхүү байдалтай байна. Уг нь Үндсэн хуулиндаа бид хэвлэн нийтлэх, үзэл бодлоо чөлөөтэй илэрхийлэх эрхтэй гээд заачихсан. Гэтэл энэ мэтчилэн Үндсэн хууль зөрчсөн үйлдлүүд гарсаар байгаа ч үүнд анхаарал хандуулчих хүн ч байхгүй юм. Ер нь үүнийгээ мэддэг жижиг түшмэд Монгол Улсад байна уу гэж асуухад хүргэж байна.
Сүүлийн үед засаг төр нь хэвлэл мэдээллийнхэн рүү дайрч давшилсан үйлдэл ихээр хийгдэх болов. Үүний нэг баталгаа нь дээрх телевизүүдийн эфирийг хаасан явдал юм. Эфирийг нь хаалаа гээд жижиг түшмэд ажил хийсэн болж харагдах гээд байгаа юм уу. Энэ үйлдэл бүрийн чинь ард түмэн мэдээлэл авах эрхээ зөрчүүлсээр байна гэдгийг ойлгож байгаа юм болов уу. Ард түмэн мэдээлэлгүй, юу ч мэддэггүй гэж басамжилдаг түшмэд өөрсдөө үйлдэл бүрээрээ ард түмнийхээ нүдийг боож байгаа гэдгээ мэддэг л баймаар юм. Өмнө нь улстөрчид кабелийн сувгуудыг онилон сонгуулийн өмнө хаалгаж байсан бол энэ удаа “хурган” түшмэд хэвлэл мэдээллийнхний эрхэнд халдаад эхэллээ. Тэгвэл ССАЖ-ын сайдыг түр орлон гүйцэтгэгч Ц.Оюунгэрэл Соёлын тухай хуульд нэмэлт өөрчлөлт оруулж монгол уран бүтээлийн эфирээр гарах хувийг нэмэгдүүлэх тухай буюу монгол контентийн хуулийн төслийг чуулганаар хэлэлцүүлэх болсон. Монгол контентийн уг хууль нь телевизүүдийн уран сайхны болон хүүхдийн нэвтрүүлэг, уран сайхны киноныхоо 50 хувьд монгол кино гарга эсхүл эфирийг нь хаана гэж дарамталж байна. Монгол Улсад кино урлаг үүссэн цагаас хойш 200 гаруй л кино үзэгчдийн хүртээл болжээ. Тэгвэл өнөөдөр 170 гаруй телевиз хэдэн өдөр монгол контент явуулах юм бэ. Бүх телевизүүд нэг өдөр л бараг энэ кинонуудыг гаргаад дуусна. Маргаашнаас нь юу үз гэж байгаа юм. Монгол контентыг бий болгохын тулд төрөөс таван тэрбум төгрөг төсөвлөнө гээд байгаа. Аманд ч үгүй хамарт ч үгүй бүх телевизэд таван тэрбумаа хуваах уу. Үгүй. Өөрийнх нь сонгуульд тусална гэсэн цөөхөн хэдэн телевиздээ Ц.Оюунгэрэл хуваагаад өгчих биз. Тэгэхээр бусад нь яах болж байна вэ. Бага юмыг дэвэргэлээ гэж бодож болох юм. Тэгвэл жижиг гэлтгүй эл үйлдлүүд хэвлэл мэдээллийн эрх чөлөөнд хүнд цохилт өгч байна. Ардчилсан нам Засагт гарч ирснээс хойш хууль тогтоомж гаргах бүртээ муу хууль батлуулчих гээд, хэвлэл мэдээллийг боомилчих гээд байдаг гэмтэй болчихлоо.
Э.ЭНХ