Нийслэлийн хэмжээнд цахим хэлбэрээр иргэдэд газар өмчлүүлэх ажил өрнөж буй.
Нийтдээ таван дүүргийн таван байршилд 12.911 иргэн цахим хэлбэрээр газар өмчлөн аваад байгаа аж. Харин цахим системд сонгогдож газар өмчлөн авах эрх нь үүссэн буюу сонгогдсон иргэдийн тодорхой хувь нь өргөдөл хүлээн авах заасан хугацаанд харьяа дүүрэгтээ хандаж өргөдлөө өгөөгүй байна. Ийм шалтгаанаар эдгээр иргэдийн сонгогдсон эрхийг нь хүчингүйд тооцож, сонгогдоогүй иргэдийн дунд дахин цахим системээр сонголт хийжээ. Дахин сонголт явуулж өргөдөл хүлээн авах хугацааг олон нийтэд зарласнаас хойш дүүргүүдийн Өмч, газрын харилцааны алба цөөнгүй өргөдлийг хүлээн авч байгаа боловч иргэдийн оролцоо сул байгаа гэнэ. Тиймээс сонгогдсон иргэд идэвхтэй оролцохоос гадна сонгогдсон эсэхээ мэдэхийн тулд иргэд www.umch.ub.gov.mn цахим хуудаснаас “Газар өмчлөлийн цахим системээр сонгогдсон эсэхээ шалгах хайлтын систем” гэсэн цонх руу орж регистрийн дугаараа оруулж шалгах боломжтой юм байна. Дахин сонгон шалгаруулалтын өргөдөл хүлээн авах хугацаа өнөөдөр дуусна гэж нийслэлийнхэн мэдээлж байна.