Хөвсгөлөөс анд минь ирлээ. Холоос ирсэн хүний аяны богцыг том болсон ч гэсэн горьддог зан хүмүүст бий. Цаасан хайрцгаа задлаад утсан загас, цагаан загасны консерв гаргаж ирлээ. Хөвсгөлөөс ирсэн хүний богцноос гарах л зүйлс. Тэгтэл “Хөвсгөл сармай дээлт”, “Хөвсгөл брэнд цай”, “Хөвсгөл-100 нэрсний шүүс” гээд элдэв сайхан амттанууд цуварна. Хөвсгөлд л байдаг эдгээр зүйлсийг амтархахад сайхан санж. Бүгд л “Хөвсгөл” гэдэг нэртэй, тэндэхийн брэндүүд. Анд маань нэг нэгээр нь гаргаж ирээд “Манай бэрээнд” гэж танилцуулна. Нэрсний шүүс нь жинхэнэ ориг. Ханиадыг нам дарна. Тамир тэнхээг чинь сэргээнэ гэж ирээд л бахархах.
Нутгийнхных нь үйлдвэрлэсэн бүтээгдэхүүнийг амталж ээ суухад “Хөвсгөлийнхөн ямар ч байсан зүгээр суухгүй л байгаа юм байна даа. Жижиг дунд үйлдвэр эрхлээд жаахан ч гэсэн орлоготой суугаа аж” гэсэн баярлах сэтгэл төрүүлнэ.
Импортын элдэв төрлийн алаг эрээн, баталгаатай эсэх нь тодорхойгүй олон хүнсний дунд төөрсөн өнөө үед дотоодын брэндээ харахад олзуурхууштай ч юм шиг. “Хамгийн гол нь экологийн цэвэр бүтээгдэхүүн” гэж тодотгосон нь ийм бүтээгдэхүүнийг өдөр тутам хэрэглэх шаардлагад нийцнэ.
Дээхнэ үед орос чихэр гэхээр л нүд сэргээд, арааны шүлс асгардаг байсан бол одоо аймгуудынхаа брэндийг хараад идмээр санагддаг үе ирж байгаа гэлтэй.
Д.ГАНСАРУУЛ