Гаалийн хяналтын улсын байцаагчид Монголд их хэмжээний галт зэвсгийн сум оруулж ирэх гэж байсан хууль бус үйлдлийг илрүүлсэн талаар албаныхан мэдээллээ. Тодруулбал, Гаалийн ерөнхий газрын Хэрэг зөрчлийн асуудал эрхэлсэн нэгжийн гаалийн улсын байцаагч нар аравдугаар сарын 28-нд АНУ-аас илгээсэн чингэлэг бүхий түүвэр ачаанд нарийвчилсан үзлэг шалгалт хийсэн байна.
Шалгалтаар “Remington”, “Winchester”, “Federal” маркын галт зэвсгийн нийт 220 ширхэг сум илрүүлсэн бөгөөд гаалийн хяналт шалгалтаас нууцаар АНУ-аас Монголд оруулж ирэх гэж байжээ. Энэхүү гэмт хэргийн шинжтэй үйлдэл нь урьдаас төлөвлөсөн, зохион байгуулалттай байж болзошгүй тул гаалийн байгууллагынхан нарийвчлан шалгуулахаар Тагнуулын байгууллагад шилжүүлсэн байна.
АНУ болон Европын улс орноос импортолсон автомашин болон түүвэр ачаанд галт зэвсгийн сум ихээр нуун, улсын хилээр хууль бусаар нэвтрүүлэхийг завдсан хэрэг сүүлийн жилүүдэд байнга гарах болсон байна. Тиймээс хилээр нэвтэрч буй иргэд бусдын дайвар ачаа, тээшийг өөрийн нэр дээр авч гаралгүй, анхаарал болгоомжтой байхыг гаалийн байгууллагынхан анхааруулав.