Өчигдөр Испаний Мадрид хотын “Barclaycard Arena”-д болсон тоглолтод Францын шигшээ Литвийн багийг 95:93 харьцаагаар хожиж, хүрэл медаль хүртлээ. Францын шигшээ багийн Батум 27 оноо авч багаа хожилд хүргэсэн бол Литвийн багаас Валансинас 25 оноо авчээ.
Францын шигшээ баг 1954 оны дэлхийн аваргад 4-р байрт шалгарч байсан бол “Япон-2006”-д V, “Турк-2010”-т XIII байрыг эзэлж байсан тэд “Испани-2014”-т хүрэл медаль хүртлээ.
Францын шигшээ баг 2014 оны дэлхийн аваргын “А” хэсэгт гурван хожил, хоёр хожигдолтой гуравдугаар байраар шалгарч шөвгийн 16-д Хорватын багийг 69:64 харьцаагаар хожсон. Шилдэг дөрөвт багтахын тулд тэмцээнийг зохион байгуулагч Испаний багтай оноолт таарсан бөгөөд хэсэгтээ 64-88-ын харьцаагаар хожигджээ. Гэвч энэхүү тоглолт 65:52 харьцаагаараа францчуудын ялалтаар өндөрлөсөн юм. Улмаар мөнгөн медалийн төлөө Сербийн багтай тоглож, 85-90-ийн харьцаагаар хожигдож, хүрэл медалийн төлөө тоглох болсон. Тэдний эсрэг олимп, дэлхийн аваргад өндөр амжилтыг үзүүлдэг Литвийн баг АНУ-ын багт ялагдсанаар шалгарсан юм. Өнгөрсөн жилийн Европын аваргын финалд Франц-Литвийн багууд шалгарахад францууд 80-66-ын харьцаагаар илүүрхэж, хожсон юм. Бямба гаригийн тоглолтод хоёр багийн хувьд тэнцүүхэн байж, эцсийн мөчид 95:93 харьцаагаар Францын шигшээ баг ялалт байгуулснаар, дэлхийн аваргын түүхэн амжилтаа үзүүллээ. Энэхүү тоглолтыг “Barclaycard Arena”-д 11 800 хүн үзэж сонирхжээ.
Өнөөдөр аваргын төлөө АНУ-Сербийн шигшээ багууд тоглох юм.