Төгрөг суларч, доллар чангарч, эдийн засаг хүндэрсэн энэ үед Хөгжлийн банкны дансанд 300 сая ам.доллар орж ирэх нь бараг л тодорхой болжээ. Хөгжлийн банк Засгийн газрын баталгаатайгаар 300 сая ам.долларын хөрөнгө босгохоор ажиллаж эхэлжээ. Тус банкны гүйцэтгэх захирал Н.Мөнхбат “Бид ажиллаж эхэлсэн. Үр дүн нь тун удахгүй мэдэгдэх байх. Энэ ажлын бүтэх магадлал 90 хувьтай” гэж онцлов. “Олон улсын хөрөнгийн зах зээлээс мөнгө босгох ажил Монголын хувьд тийм ч хэцүү биш, учир нь Монгол Улсын дунд урт хугацааны ирээдүй гэрэлтэй байгаа” гэж дэлхийн банк, санхүүгийн шинжээчид үзэж байгаа аж. “Credit Suisse” банк арилжааны дансны бүртгэл хөтлөгчөөр ажиллах энэ арилжааг гурав хуваан хийхээр төлөвлөжээ. “Credit Suisse” –ийн зүгээс зээлдүүлэгчид баталгаажсан үнэт цааснаас хэсэгчлэн авч болно гэсэн мэдээлэл өгчээ. Зээлдүүлэгчид арилжаанд гурван түвшинд оролцох аж. 50 сая ам.доллар болон түүнээс дээш хөрөнгө оруулсан зээлдүүлэгч гурван жилийн хугацаатай үнэт цааснаас 125, таван жилийнхээс 150, долоон жилийнхээс 175 суурь нэгжийн өгөөж авах юм байна.
Ц.СҮРЭН