Манай төр болохгүй байна, энэ муусайн улстөрчид дэндүү байна гээд л амтай болгон шүүмжлэх юм. Шүүмжилж болно. Шүүмжилмээр зүйл ч байна. Гэлээ гээд арван хэдтэй жаахан хүүхэд хүртэл ирээдүйн тухай гэгээн мөрөөдөлд умбахын оронд улс төр ярьж шүүмжлэх юм. За тэр ч яахав. Нөгөө хэдэн улстөрчид нь ч болдоггүй л байх. Гэхдээ Монголын төр гэдэг чинь энэ хэдэн улстөрч гэж шууд ойлгож боломгүй. Хэдэн улстөрчдийн болохгүй бүтэхгүйг ярих гээд Монголын төрийг нураачих юм шиг аашилцгаах аж. Улстөрчид үүрд монгол төрд ажиллахгүй. Хэдэн жил болоод хэн нэгэнд ээлжээ өгөх нь тодорхой. Тэд бол төрд ажиллаж байгаа хүмүүс. Харин Монголын төрд хэн ч ажиллаж байлаа, хэн ч явлаа гэсэн байдгаараа л байх ёстой. Ахмад хүмүүс “Төрийн минь сүлд өршөө, төр минь төвшин, түмэн олон амгалан байг” гэж хэлдэг болохоос улстөрчид минь мөнх байг гэдэггүй. Дэлхийн олон оронд төр лүүгээ дайрч төрийн эргэлт хийсэн улс орнууд мөхөж байгааг бид өдөр бүр л сонсдог. Угтаа бол болохгүй нөхдийг сонгохгүй байх эрх нь бидэнд бий. Тэднийг сонгуулиар сольчихно. Харин улсаараа тоглож, төрөөрөө наадаж болдоггүйг төр нь хямарч, улс нь сүйдэж байгаа улс орнууд бэлхэнээ харуулж байгаа.
Д.МӨНГӨНДАЛАЙ