Намрын улирал эхэлж байгаатай холбогдуулан малчид мал худалдан борлуулж эхэлдэг. Үүнтэй холбоотойгоор мал, амьтны гоц халдварт өвчний голомт болон сэжигтэй бүс нутгаас мал тээвэрлэх явдал гарч болзошгүй тул Говь-Алтай аймгийн Мэргэжлийн хяналтын газраас малчид, мал бүхий иргэд, аж ахуйн нэгжийг хууль эрх зүйн болон мэргэжил арга зүйн зөвлөгөө авч худалдан борлуулахыг анхаарууллаа.
Он гарсаар улсын хэмжээнд 12 аймаг, 39 сумд малын гоц халдварт шүлхий өвчин дэгдсэнтэй холбогдуулан тус аймгийн Засаг даргын захирамж гарч, энэ оны 12 дугаар сарын 01-ний өдөр хүртэл малын шилжилт хөдөлгөөнийг хязгаарласан билээ. Өөрөөр хэлбэл Улаанбаатар хот болон бусад аймгуудаас мал амьтан авах, шилжүүлэн ирэх, тээвэрлэх, мал туух, аймгаас өөр аймаг, нийслэлрүү мал амьтны шилжилт хийхийг хориглосон юм. Мал, мах худалдан авч буй иргэдийг борлуулагчаас гарал үүсэл, холбогдох баримт бичгийг шалгаж байхыг санууллаа.