Month: August 2024

Өнгөрсөн хоногт орсон борооны улмаас Баянзүрх, Хан-Уул, Сонгинохайрхан, Баянгол дүүрэгт гэр, хашаа усанд  нийт 28 дуудлагаар нийслэлийн Онцгой байдлын газрын алба хаагчид иргэдийн аюулгүй байдлыг хангажээ.

Тодруулбал айлын гэр, хашаа усанд автсан 17, машин урссан 4, нийтийн эзэмшлийн зам талбай усанд автсан зэрэг дуудлагатай байв. Үүнээс 18 дуудлага дээр нийт 126 алба хаагч, 44 техник хэрэгсэлтэйгээр ажиллаж 486,5 тн ус соруулж, усанд боогдсон, гэрээ, хашаа нь усанд автсан нийт 37 иргэний аюулгүй байдлыг ханган ажилласан байна.

Зүүн Хойд Азийн хотуудын өмнө тулгамдаж буй нийтлэг асуудал, хотуудын сайн туршлагыг сурталчлан таниулах, цаашид хамтдаа хөгжих, бүс нутгийн хамтын ажиллагааг өргөжүүлэх зорилгоор энэхүү чуулга уулзалтыг 2014 оноос уламжлал болгон хоёр жил тутамд зохион байгуулдаг.

Энэ удаагийн Зүүн Хойд Азийн хотын дарга нарын VI чуулга уулзалт өнөөдөр эхэллээ. Чуулга уулзалтыг “Зүүн хойд Азийн хотуудын тогтвортой хөгжил, төр , хувийн хэвшлийн түншлэлийг дэмжин хэрэгжүүлэх нь” сэдвийн дор хэлэлцэж байна.

Уг форумыг нээж, Нийслэлийн Засаг дарга бөгөөд Улаанбаатар хотын Захирагч Х.Нямбаатар хэлсэн үгэндээ “Нийслэл Улаанбаатар хотын ирэх дөрвөн жил их бүтээн байгуулалт, үсрэнгүй хөгжил, цэцэглэлтийн жилүүд байх болно. Улаанбаатар хот цоо шинэ тэсрэлт хийх бэлтгэл ажлыг хангаж, миний бие хотын дарга болсноос хойш багахан хугацаанд нийт 60 гаруй хуулийн төслийг санаачлан, боловсруулж, Монгол Улсын Их Хурлаар батлууллаа. Нэн түрүүнд хөгжлийн саад, түгжээ болоод байсан хууль, эрх зүйн орчноо сайжруулж, үүнийгээ дагаад эдийн засгийн таатай орчин бий болох нөхцөлийг бүрдүүлээд байна. Зүүн Хойд Азийн орнуудад хотжилт, эдийн засгийн өсөлт хурдацтай явагдаж байгаа хэдий ч энэхүү ахиц дэвшил нь байгаль орчин, нийгмийн томоохон сорилтуудыг дагуулсаар байгаа. Тогтвортой хөгжил нь эдгээр сорилтыг даван туулах, хот суурин газрын урт хугацааны хөгжил цэцэглэлт, амьдралын чанарыг хангахад нэн чухал юм. Монгол Улсын Их Хурлын 2020 оны 52 дугаар тогтоолоор “Алсын хараа-2050” Монгол Улсын урт хугацааны хөгжлийн бодлогыг баталж, түүнд “Улаанбаатар ба дагуул хот”-ын бие даасан бүлэг оруулан, төр, хувийн хэвшлийн түншлэлд тулгуурласан ногоон санхүүгийн үндэсний тогтолцоог дэмжин хөгжүүлж, олон улсын санхүүгийн арга хэлбэрийг ашиглан байгальд ээлтэй ногоон төсөл, хөтөлбөрүүдийг санхүүжүүлнэ гэсэн зорилго дэвшүүлэн ажиллаж байна” гэлээ.

Болзошгүй эрсдэлээс сэргийлж Сэлбэ, Дунд гол дагуу нийт 29 аж ахуйн нэгж 370 мянган шоо метр лаг хагшаасыг цэвэрлэхээс өнөөдрийн байдлаар 94 хувьтай үргэлжилж байна. Тодруулбал, Сэлбэ, Дунд гол дагуу 177 мянган шоо метр лаг хагшаасыг цэвэрлээд байна.

УБЗАА-ны Хотын инженерийн байгууламжийн хэлтсийн дарга, Ерөнхий инженер М.Балдандорж “Өчигдөр буюу долоодугаар сарын 31-ний өдөр олон нийтийн цахим сүлжээнд Хан-Уул дүүргийн 15 дугаар хороо, “Ривер вилла” хотхон орчимд Дунд голын урсцыг хааж, далан босгож байна гэх мэдээлэл тархсан. Угтаа эл хэсэгт лаг хагшаасыг удаан хугацаанд цэвэрлээгүйн улмаас шугам сүлжээгээ давж, голын урсцыг удаашруулж байсан юм. Иймээс лаг хагшаасыг цэвэрлэж, голын хоёр талаар тэгшлэн хэлбэржүүлэн урсцыг сайжруулах арга хэмжээ авч буй. Лаг хагшаасыг тэгшлэх, голын ёроолын хэвгийг гаргах, даланг хэлбэржүүлэх ажлыг наймдугаар сарын 15-нд дуусгахаар төлөвлөж байна. Цэвэрлэгээ хийсэн эхний байршлуудад голын хайрга гарч, угаагдан өнгө нь сэргэхээс гадна далан хэлбэржүүлсэн байршлуудад ургамал ургаж байгаа нь ажиглагдсан” гэв.

Ташрамд, Улаанбаатар хотын хэмжээнд 163 км урт үерийн хамгаалалтын далан суваг байдаг. Энэхүү далан суваг, үерийн хамгаалалтын барилга байгууламж нь иргэдийн эрүүл мэнд, амь нас, эд хөрөнгийг болзошгүй үер, усны аюулаас хамгаалдаг. Иймд гол усаа бохирдуулахгүй, элдэв хог хаягдал хаяхгүй байхыг нийт иргэддээ уриалж байна.