Month: July 2024

Энэ сард цахилгаан шугам тоноглолд засвар үйлчилгээ хийх ажил үргэлжилж буйг мэдээлсэн.

Хуваарь ёсоор маргааш буюу долдугаар сарын 5-ны Баасан гарагт нийслэлийн дөрвөн дүүргийн дараах байршлуудад засварын ажил хийгдэж, өдрийн турш цахилгаан эрчим хүч хязгаарлагдана.

Амралтын өдрүүдэд засвар хийгдэхгүй бөгөөд долдугаар сарын 8-ны Даваа гарагт Хан-Уул, Чингэлтэй, Сүхбаатар дүүрэг болон Төв аймаг орчмоор цахилгааны хязгаарлалт хийгдэх хуваарьтай байна.

Долдугаар сарын 8-ны Даваа гарагт цахилгаан эрчим хүч тасрах хуваарь:

Цаг агаарын нөхцөл байдлаас шалтгаалан хуваарьт өөрчлөлт орвол, гэрээнд бүртгэлтэй утасны дугаарт мэдээлэл хүргэх юм байна. Засварын ажлыг тухайн тоноглолыг хүчдэлээс бүрэн чөлөөлсний дараа хийдэг нөхцөл байдлыг харгалзан үзэж, хүлээцтэй хандахыг УБЦТС ТӨХК-аас хүслээ.

Сонгинохайрхан дүүргийн 19 дүгээр хороонд байрлах 62 дугаар сургуулийн гуравдугаар байр буюу өргөтгөлийн барилгын ажил 2018 онд эхэлсэн. Гэвч ашиглалтад ороогүй зургаан жил болсон юм.

Тус өргөтгөлийн барилгын ажлыг эрчимжүүлэхээр нийслэлийн удирдлага 62 дугаар сургуулийн захирал Ш.Сарантуяа, гүйцэтгэгч компани болох “Ганзосон” ХХК-ийн захирал Ч.Ижилбаяр нартай уулзсан байна.

Учир нь гүйцэтгэгч компани санхүүжилтээ нэмүүлэх хүсэлтээ салбар яаманд илэрхийлж, улмаар санхүүжилтийг нэмэх боломжгүй учраас гэрээ цуцалж, өөр гүйцэтгэгч компани сонгохоор тогтжээ. Үүнээс шалтгаалан тус сургуулийн барилгын ажил хоёр жил гацсан юм.

Түүнчлэн Улаанбаатар хотод сургууль, цэцэрлэгийн хүртээмжийг нэмэгдүүлэх чиглэлээр олон ажлыг эхлүүлсэн.

Тухайлбал

• БГД-ийн 29 дүгээр хороо, Эрин хороололд байрлах “Эрин эверест интернэшнл” сургуулийг улсынх болгон худалдаж авах
• Нарны хороолол, Алтай хотхон, Голден парк зэрэг хороолол орчимд сургуулийн хүртээмжийг нэмэгдүүлэхээр ажиллаж байгааг нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр онцоллоо.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс  

Элсэлтийн ерөнхий шалгалт эхэлсэнтэй холбогдуулж Боловсролын үнэлгээний төв хэвлэлийн хурал хийлээ.

Боловсролын Үнэлгээний Төв(БҮТ)-ийн захирал Л.Ганбат “Энэ жилийн Элсэлтийн ерөнхий шалгалтын гол онцлог нь шинэ хуулийн хүрээнд зохион байгуулагдаж байгаа. Элсэлтийн ерөнхий шалгалтын журмыг БШУ-ны сайд баталдаг болсон. Мөн өмнө нь Элсэлтийн ерөнхий шалгалт гэж ярьдаг байсан бол одооноос Элсэлтийн шалгалт (ЭШ) гэж нэрлэхээр хуульд тусгагдсан.

Энэ жилийн ЭШ-д 35.939 шалгуулагч бүртгүүлсэн. Бүртгэл цахимаар хоёр сарын хугацаанд үргэлжилсэн. Энэ онд 12 дугаар анги төгсөж байгаа 32 353 суралцагч байгаа бол өмнөх оны 3586 шалгуулагч бүртгүүлсэн.

Нийт шалгуулагчид 10 хичээл сонгож, шалгалт өгөхөөр байна. Тэдгээрийн хамгийн их буюу 25720 нь математикийн хичээлээр шалгалт өгөхөөр бүртгүүлсэн байна. Харин хамгийн бага буюу 1788 сурагч Монгол Улсын түүхийн хичээлээр шалгалт өгнө. Улсын хэмжээнд 46 шалгалтын байр бэлдсэн. Үүний 23 нь Улаанбаатар хотод байна. Шалгалтын зохион байгуулалтын үйл ажиллагаанд 2541 алба хаагч үүрэг гүйцэтгэж байна” гэв

Монгол Улсын Ерөнхийлөгч У.Хүрэлсүхийн урилгаар Бутаны Хаант Улсын Цог Жавхлант Хаан Жигмэ Гэсэр Намжил Ванчук 2024 оны долдугаар сарын 8-15-ны өдрүүдэд Монгол Улсад төрийн айлчлал хийх гэж байна.

Жигмэ Гэсэр Намжил Ванчук 2006 оны арванхоёрдугаар сарын 9-ний өдөр Бутаны Хаант Улсын Цог Жавхлант Хаанаар өргөмжлөгдсөн бөгөөд 2008 оны арваннэгдүгээр сарын 6-ны өдөр Хаан ширээнд залах ёслол болсон. Энэхүү айлчлал нь Монгол Улсад хаан ширээнд заларч байгаа хүний хийж буй анхны айлчлал гэдгээрээ онцлог.

Тус улсын талаар онцлох мэдээллийг хүргэе.

• Бутан улс Хималайн уулсын зүүн хэсэгт далайн түвшнээс 7,000 гаруй метрийн өндөрт оршдог бөгөөд хойд талаараа Бүгд Найрамдах Хятад Ард Улстай, өмнө, зүүн болон баруун талаараа Бүгд Найрамдах Энэтхэг Улстай хиллэдэг, нийслэл нь Тимпү хот.
• 789.9 мянган хүн амтай тус улсын иргэдийн дундаж наслалт нь 72.7 юм.
• Дотоодын Нийт Бүтээгдэхүүн(ДНБ) нь 2.8 тэрбум ам.доллар. Нэг хүнд ногдох ДНБ нь 3.6 мянган ам.доллар.
• Эдийн засгийн голлох салбар нь усан цахилгаан станц бөгөөд Бутаны усан цахилгаан эрчим хүчний экспорт нийт экспортынх нь 40%-ийг бүрдүүлдэг байна. Энэ нь Засгийн газрын нийт орлогын 25% юм. Бутан Улс одоогийн байдлаар 24,000 мегаваттын усан цахилгаан станцынхаа 6.5 хувийг ашиглаж буй.
• 2023 оны эхний хагас жилийн байдлаар хүн амын 27% нь хөдөө аж ахуйн салбарт, 33.6% нь барилга, дэд бүтэц, аж үйлдвэрийн салбарт, 38.9% нь үйлчилгээний салбарт ажилладаг.
• Ажилгүйдлийн түвшин нь 2023 оны II улирлын байдлаар 2.3%-тай байна.

Монгол Улс 2012 оны нэгдүгээр сарын 18-нд Бутан улстай дипломат харилцаа тогтоож байжээ. Хоёр улсын худалдааны эргэлт 2024 оны зургаадугаар сарын байдлаар 51.3 мянган ам.долларт хүрсэн байна. Манай улс тус орноос голлон хөлдөөсөн хүнсний ногоо, самар, хатаасан жимс, лаазалсан бүтээгдэхүүн импортоор авчээ.

Хоёр улсын иргэд харилцан визтэй зорчдог ба 2023 онд Бутаны Хаант Улсад нэг монгол иргэн, Монгол Улсад 32 бутан иргэн тус тус зорчсон.

Иргэний шилжилт хөдөлгөөнийг сонгуулиас өмнө буюу өнгөрсөн дөрөвдүгээр сард зогсоогоод байсан. Харин энэ сарын 1-нээс сэргээжээ. Ингэснээр шилжилт хөдөлгөөний бүртгэл хэвийн явагдаж байгааг УБЕГ-аас мэдээллээ.

Сонгуулийн тухай хуульд “Иргэний шилжилт хөдөлгөөнийг санал авах өдрөөс 60 хоногийн өмнө зогсоож, санал авах өдрийн дараах өдрөөс сэргээнэ.” гэж заажээ.

Энэ жил дөрөвдүгээр сарын 29-нөөс өмнөх байдлаар 70,071 хүний шилжилт хөдөлгөөн бүртгэгдсэн байна.

2020 оны сонгуулийн өмнөх дөрвөн сард нийт 229,149 хүн шилжсэнээс нийслэл дотроо хамгийн их буюу 189,647 хүн шилжжээ.

Бүртгэлийн байгууллага бол иргэний шилжилт хөдөлгөөний зорилгыг тодорхойлох боломжгүй бөгөөд судалгаа хийгээгүйг мэдээлж байсан юм.

Зургаадугаар сарын 18-22-ны өдрүүдэд үргэлжлэн орсон борооны улмаас Сонсголонгийн уулзвараас баруун аймгууд салдаг уулзвар буюу хуучнаар 22-ын товчоо чиглэлийн авто замд эвдрэл үүсч, тээврийн хэрэгсэл зорчиход хүндрэл үүссэн.

Мөн Үндэсний их баяр наадмыг тэмдэглэх, наадамчин олон тав тухтай, аюулгүй зорчих нөхцөлийг бүрдүүлэхээр 9.4 км авто замын засвар, шинэчлэлтийг 2024 оны зургаадугаар сарын 29-ний өдрөөс эхлүүлсэн юм.

Өнөөдрийн байдлаар авто худалдааны цогцолбороос баруун аймаг салдаг уулзвар хүртэлх 3 км авто замын суурь хучилтын ажлыг хийж, хөдөлгөөнийг нээгээд байна гэж Улаанбаатар хотын Захирагчийн ажлын албанаас мэдээллээ. 

Тулгар төрийн 2233, Их Монгол улсын 818, үндэсний эрх чөлөө, тусгаар тогтнолоо сэргээн мандуулсны 113, ардын хувьсгалын 103 жилийн ойн хүрээнд, баяр наадмын үйл ажиллагааг өргөтгөж, монголчуудын өв соёл, ардын урлагийг сурталчлах зорилготой “Соёлын наадам”-ыг энэ сарын 11, 12, “Уяачдын наадам”-ыг энэ сарын 13-нд Хүй долоон худагт зохион байгуулахаар болжээ. Тус наадмыг Соёл урлагийн их сургуулиас Соёлын яамны дэмжлэгтэйгээр 16 дахь жилдээ зохион байгуулж буй.

Соёлын наадамд СУИС-ийн соёлын өв тээгч, уран бүтээлч багш, оюутнууд, Нийслэлийн Соёлын төвийн уран сайханчид, “Идэрийн цуурай” бөхийн дэвжээний бөхчүүд зэрэг нийт 200 гаруй хүн оролцох аж. “Соёлын наадам”-аар Монгол Улсаас ЮНЕСКО-д бүртгүүлсэн соёлын биет бус өвийг сурталчилсан урлагийн тоглолтоос гадна “Язгуур урлаг”, “Монгол цайны соёл”, “Цагаан идээний соёл”, “Айрагны соёл”-той танилцаж, “Казах соёлын гэр”-ээр зочлох боломжтой.

2024 он гарсаар голын усанд 11 хүүхэд, авто ослын улмаас 26 хүүхэд нас барсан бол 605 хүүхэд авто ослын улмаас бэртэж гэмтжээ. Тиймээс хурдаа тохируулж, эцэг эхчүүд хүүхдэдээ анхаарал тавихыг ХЭҮК-оос анхааруулав.