Month: July 2024

Баяр наадмын болон аялал жуулчлалын үе эхэлсэнтэй холбогдуулан цагдаагийн байгууллагаас дараах сэрэмжлүүлгийг иргэдэд хүргэж байна.

Эд зүйлээ хяналтгүй орхихгүй байх, хэтэвч, гар утас, бэлэн мөнгө биедээ авч яваа тохиолдолд хянамгай байхыг сэрэмжлүүлж байна

Баяр наадмын болон аялал жуулчлалын үе эхэлсэнтэй холбогдуулан цагдаагийн байгууллагаас дараах сэрэмжлүүлгийг иргэдэд хүргэж байна.

Иргэд, жуулчид Төв цэнгэлдэх хүрээлэн, Хүй долоо худаг, Сүхбаатарын талбай зэрэг газруудад хүн ихээр цуглардаг олон нийтийг хамарсан арга хэмжээний үеэр санамсар, болгоомжгүй байдлаасаа болж эд зүйлээ хулгайд алдаж, гээж, орхидог.

Иймд халаасны хулгайн гэмт хэргийн хохирогч болохгүйн тулд эд зүйлээ хараа хяналтгүй орхихгүй байх, хэтэвч, гар утас, бэлэн мөнгө болон бусад үнэт зүйл биедээ авч яваа тохиолдолд хянамгай байхыг сэрэмжлүүлж байна.

Хэрэв халаасны хулгайн гэмт хэрэгт өртөж хохирсон бол дараах мэдээллийн дагуу цагдаагийн байгууллагад хандана уу. Үүнд:

Төв цэнгэлдэх хүрээлэнд – №9 хаалга “Цагдаагийн шуурхай бүлэг”

Хүй долоо худаг – “Цагдаагийн хүрээ”

Цагдаагийн байгууллагын 102 дугаар болон харьяа нутаг дэвсгэрийн цагдаагийн газар, хэлтэст хандана уу.

Монголын ард түмний түүх, соёлын дархлааны илэрхийлэл болсон Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмыг тохиолдуулан цагдаа, дотоодын цэргийн анги, байгууллагын алба хаагчид өндөржүүлсэн бэлэн байдлын зэрэгт шилжин ажиллаж байна.

Үүнтэй холбогдуулан Цагдаагийн ерөнхий газрын дарга, Дотоодын цэргийн командлагчийн тушаалаар “Хүй долоо худаг”-т “Түр хүрээ” байгуулагдаж, 35 анги, байгууллагын 1080 алба хаагч гэмт хэрэг, зөрчил, зам тээврийн осол, иргэд, унаач хүүхдийн аюулгүй байдлыг хангах, бага насны хүүхдийг төөрөх зэрэг болзошгүй эрсдэлээс урьдчилан сэргийлэх чиглэлээр ажиллаж байна.

Мөн алба хаагчид хамгаалалт, зохицуулалт, явган болон мото, морьт эргүүлд үүрэг гүйцэтгэж байна.

Өнөөдөр Туул голын эрэг дагуу хөдөлгөөнт эргүүлээр үүрэг гүйцэтгэж байсан Баянзүрх дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид голд живж байсан 22 настай иргэнийг аварч, эмнэлгийн анхан шатны тусламж үзүүлэн, ЯТТ-103-т хүлээлгэн өглөө.

Мөн Сонсголонгийн гүүрнээс Маршалын гүүр хүртэл хөдөлгөөнт эргүүлийн үүрэг гүйцэтгэж байсан Сонгинохайрхан дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид Хан-Уул дүүргийн 8-р хорооны нутаг дэсвгэрт Туул голд 40 настай согтуу иргэн хөвж байсныг гаргаж холбогдох байгууллагад хүлээлгэн өгч ажиллалаа.

Ойрын өдрүүдэд иргэдийн голын эрэг дагуух хөдөлгөөн нэмэгдэж байна. Иймд согтууруулах ундаа хэрэглэсэн үедээ голд орохгүй байхыг Нийслэлийн Онцгой байдлын газраас онцгойлон анхааруулж байна.

Үндэсний их баяр наадмын өдрүүдэд буюу долдугаар сарын 10-13-ны хооронд аймгууд баяр наадмаа тэмдэглэдэг уламжлалтай.

Өчигдөр буюу долдугаар сарын 10-нд ихэнх аймгууд наадмын нээлтээ хийсэн. Тэднээс тавынх нь бөхийн барилдаан өндөрлөж, үр дүнгээ гаргажээ. Үлдсэн нь өнөөдөр дуусах юм.

Тодруулбал Багахангай, Налайх, Дундговь, Баянхонгор, Өмнөговь аймгийн цол олгох барилдаан өндөрлөв. Багахангай дүүрэгт Увс аймгийн Түргэн сумын бөх аймгийн начин Г.Цоггэрэл түрүүлж, арслан цолтой боллоо. Түүнтэй Төв аймгийн Эрдэнэсант сумын харьяат аймгийн харцага Б.Ганзолбоо үзүүр, түрүүнд өрсөлдөж, унаснаар аймгийн заан цол авсан юм.

Түүнчлэн Баянхонгор аймгийн наадамд аймгийн заан Э.Өлзийбаяр түрүүлж аймгийн арслан, сумын заан Б.Бат-Эрдэнэ үзүүрлэн аймгийн зааны тэмдэг гардлаа.

Налайх дүүрэгт Сэлэнгэ аймгийн Мандал сумын цэргийн заан Х.Наранбаяр өнгөлж цолоо ахиулсан бол Говь-Алтай аймгийн Халиун сумын аймгийн начин Д.Төртогтох аймгийн заан цолтон болсон аж.

Харин Дундговь болон Өмнөговь аймгийн цол олгох барилдаанд нутгийн арслангууд түрүүлж, хурц чимэг нэмлээ. Тухайлбал Дундговь аймагт аймгийн арслан Н.Амгаланбаатар өнгөрсөн жил үзүүлсэн амжилтаа давтсан бол Х.Чойжилсүрэн сумын заан цолоо аймгийн заанаар ахиулав.

Өмнөговь аймгийн цол олгох барилдаанд аймгийн арслан М.Буяндэлгэр түрүүлж, сумын заан Ч.Лхагвасүрэн үзүүрлэжээ.

Үндэсний их баяр наадмын өдрүүд буюу долдугаар сарын 10-15 өдрүүдэд авто машины дугаарын хязгаарлалт үйлчлэхгүй гэдгийг Тээврийн цагдаагийн албанаас мэдээллээ. Нийтээр тэмдэглэх баярын өдрүүдэд авто машины дугаарын хязгаарлалт үйлчилдэггүй.