Month: July 2024
Авлигатай тэмцэх газрын Судалгаа шинжилгээний алба нь 2024 оны 7 дугаар сарын 8-19-ний өдрүүдэд иргэн, хуулийн этгээдээс ирүүлсэн 37 өргөдөл, гомдлыг хүлээн авч, харьяалах чиг үүргийн нэгжид хүргүүллээ.
Хүлээн авсан өргөдөл, гомдол, мэдээллийн 62.7 хувь нь авлигын гэмт хэргийн талаар байх бөгөөд тендер, худалдан авах ажиллагаатай холбоотой гомдол давамгайлж байна. Өнгөрсөн долоо хоногт авлигыг мэдээлэх 110 тусгай дугаараар 149 дуудлага хүлээн авчээ гэж Авлигатай тэмцэх газраас мэдээллээ.
Өнөөдрийн буюу долдугаар сарын 24-ний өдрийн байдлаар Сэлэнгэ мөрөн Хялгант баг, Эг гол Хантай сум, Зэлтэр гол Түшиг сум орчимд усны түвшин өмнөх өдрөөс 60-90 см нэмэгдсэн бол Хэнтий нурууны баруун хажуугийн Ерөө, Туул /Алтанбулаг/, зүүн хажуугийн Хурх, Барх, Эг, Онон, Хэрлэн /Мөнгөнморьт-Багануур/зэрэг голуудын усны түвшин 10-45 см нэмэгдэж, Туул /нийт уртын дагуудаа/, Хэрлэн /эх болон адаг хэсгээрээ/, Хурх, Үүр зэрэг голууд үерийн түвшинг 10-50 см даван үерлэж байна. Түүнчлэн Алтай нуруунаас эхтэй Буянт, Ховд, Увс нуурын савын Хархираа гол үерийн түвшинг 10-15 см давсан хэвээр байна.
Маргааш буюу долдугаар сарын 25-нд Сэлэнгэ мөрөн Хялгант баг Зүүнбүрэн сум орчимд усны түвшин 40-55 см, Хэрлэн гол Багануур дүүрэг орчимд 10 см тус тус нэмэгдэх хандлагатай байна.
Ойрын өдрүүдэд Хэнтийн уулсаар бороотой байх төлөвтэй байгаа тул гол ус цатгалан, хальсан, үертэй буй энэ нөхцөл дээр дахин хур бороо орсноор нөхцөл байдал улам хүндрэх магадлал өндөр байна. Иймд ус, цаг уурын байгууллагаас өдөр бүр гаргаж буй мэдээлэл, сэрэмжлүүлгийг байнга, онцгой анхаарч байхыг сануулж байна.
Эх сурвалж: ЦУОШГ
Энэ оны эхний хагас жилд шүүхээс гэмт хэрэг үйлдсэн гэм буруутай гэж үзэн 8,403 хүн, долоон хуулийн этгээдийг гэмт хэрэг үйлдсэн гэм буруутайд тооцож, 7,422 хүн, долоон хуулийн этгээдэд ял шийтгэл оногдуулжээ.
Ял шийтгүүлэгчдийг насны бүлгээр авч үзвэл 14-15 насныхан 34 буюу 0.5%, 16-17 насны 130 буюу 1.8%, 18-21 насны 609 буюу 8.2%, 22-29 насны 2,126 буюу 28.6%, 30-34 насны 1,761 буюу 23.7%, 35-аас дээш насны ял шийтгүүлэгч 2,762 буюу 37.2% эзэлж байгааг мэдээллээ.
35 ба түүнээс дээш насны ял шийтгүүлэгчдийн 57 буюу 2.2 хувийг 55 ба түүнээс дээш насны эмэгтэй, 89 буюу 3.2 хувийг 60 ба түүнээс дээш насны эрэгтэйчүүд эзэлж байна.
Зургаан сарын хугацаанд анхан шатны шүүхээр торгох ялаар нийт 4,336 хүн, долоон хуулийн этгээд, нийтэд тустай ажил хийлгэх ялаар 763 хүн, хорих ялаар 1,308 хүн, зорчих эрхийг хязгаарлах ялаар 889 хүн шийтгүүлжээ.
Хорих ял оногдуулсан 1,308 хүний 92 буюу 7% нь эмэгтэй, 43 буюу 3.3 хувь нь өсвөр насны хүн байгаа бол хорих ял шийтгүүлсэн 1,269 хүнд ялыг биечлэн эдлүүлэхээр шийдвэрлэсэн байна.
Өнгөрсөн оны байдалтай харьцуулахад торгох ялаар шийтгүүлсэн хүний тоо 1.3 хувиар нийт ял шийтгүүлэгчдийн дунд эзлэх хувь 1.8 хувиар өссөн бол нийтэд тустай ажил хийлгэх ял шийтгүүлсэн хүний тоо 23.6 хувиар, нийт ял шийтгүүлэгчдийн дунд эзлэх хувиар 2.6 хувиар буурчээ.
Хорих ял шийтгүүлсэн хүний тоо 11.5 хувиар, нийт ял шийтгүүлэгчдийн дунд эзлэх хувиараа 1.6 хувиар буурсан бол, зорчих эрхийг хязгаарлах ялаар ял шийтгүүлсэн хүний тоо 5.2 хувиар, нийт ял шийтгүүлэгчдийн дунд эзлэх хувиар 0.8 хувиар өссөн байна.
Шүүхээс 2024 оны эхний хагас жилд 4,336 хүн, долоон хуулийн этгээдэд нийт есөн тэрбум 803 сая 872 мянган 176 төгрөгийн торгох ял оноожээ.
Зэвсэгт хүчний 167 дугаар ангийн Сургалтын төвийг түшиглэн зохион байгуулагдаж буй говийн таван аймгийн оюутнуудыг хамруулсан “Оюутан цэрэг-2024″ сургалт бэлтгэлийн төлөвлөгөөний дагуу 07 дугаар сарын 24-ний өдөр 20 км явган маршийг амжилттай явууллаа.
Явган маршийн үеэр оюутан цэргүүдийн сэтгэл зүйн бэлтгэлийг хангах, тэсвэр хатуужил олгох, цэргийн эрдмийн мэдлэгийг дээшлүүлэх зорилгоор сэтгэл зүй, тактикийн ажиллагаа, хими, инжинерийн бэлтгэл-2, ерөнхий тактик-2, тактик тусгай тактик, үй олноос хөнөөх зэвсгээс хамгаалах бэлтгэл-2 зэрэг хичээлийн цэгүүдэд үүрэг гүйцэтгүүлж, хүн нэг бүрийн бэлтгэлийг ханган ажиллалаа гэж Зэвсэгт Хүчний Жанжин штабаас мэдээллээ.
Дорноговь аймгийн Сайншанд сумын нутагт өнөөдөр буюу долдугаар сарын 24-ний 11:00-12:30 цагийн хооронд орсон хүчтэй аадар борооны улмаас А0102 дугаартай Чойр-Сайншанд чиглэлийн авто замын 449-450 дахь километрт байрлах Сайншанд гүүрний орох талын хэсгийн хөвөө их хэмжээгээр угаагдаж, зорчих хэсэгт нүхэн эвдрэл үүсжээ.
А39 дугаартай Сайншанд-Ханги боомт чиглэлийн авто замын 10 цэгт хөвөөний хажуу хэсэгт сархиаг үүссэн, замын зорчих хэсэг дээгүүр үерийн ус давж урссан бөгөөд 14:57 цагийн байдлаар 11-14 километрийн гурван байршилд авто замын зорчих хэсэг рүү үерийн ус давсан хэвээр байна.
Зам хариуцагч “Дорноговь АЗЗА” ТӨХК авто замын бэлэн байдлыг хангуулахаар шуурхай ажиллаж байгаа тул иргэд, тээвэрчид анхаарал болгоомжтой зорчино уу гэж Зам Тээврийн Хөгжлийн Төвөөс анхаарууллаа.
Монголын хүндийн өргөлтийн холбооны ерөнхийлөгчийн нэрэмжит “Парис 2024” олимпийн наадмын өмнөх сорилт тэмцээн энэ сарын 26-27-ны өдрүүдэд Сүхбаатарын талбайд болно. Манай улсаас олимпын наадамд хүндийг өргөлтийн төрлөөр эмэгтэйчүүдийн 81 кг-д гавьяат тамирчин М.Анхцэцэг өрсөлдөх юм. Түүний бэлтгэлийг шалгах, сэргээх зорилгоор тус тэмцээнийг зохион байгуулах болжээ. Тус тэмцээн эмэгтэй 49 кг, 59 кг, 71 кг, -81 кг болон +81 кг, эрэгтэй 61 кг, 67 кг, 73 кг, -89 кг болон +89 кг гэсэн 10 жингийн ангиллаар зохиогдох аж. Ташрамд, М.Анхцэцэг ирэх сарын 4-нд Парист очихоор төлөвлөжээ. Түүний гурав дахь олимпын тэмцээн наймдугаар сарын 10-нд эхэлнэ.
“Улаанбаатар цахилгаан түгээх сүлжээ” ТӨХК-аас цахилгаан шугам тоноглолд засвар үйлчилгээ хийж байгаатай холбогдуулан зарим байршилд хэсэгчлэн цахилгаан хязгаарлаж байгаа билээ. Тэгвэл өнөөдөр буюу энэ сарын 24-нд дөрвөн дүүрэг, нэг аймагт цахилгаан хязгаарлахаар төлөвлөсөн байна. Тодруулбал, Сонгинохайрхан, Хан-Уул, Сүхбаатар, Баянзүрх дүүрэг, Төв аймагт цахилгаан хэсэгчлэн хязгаарлах юм.
.jpg)
.jpg)
Засгийн газрын ээлжит хуралдаан өнөөдөр боллоо. Хуралдаанаар гаргасан шийдвэрийн талаар Засгийн газрын Хэрэг эрхлэх газрын дарга Н.Учрал мэдээлэл өглөө.
Тэрбээр “Төрийн албан хаагч нарыг халж солихгүй. Төрийн жинхэнэ албан хаагч нар ажил чиг үүргээ хэрэгжүүлэх бололцоотой.
Засгийн газар Хяналт шинжилгээний үндэсний хороотой ажиллана. Хяналт шинжилгээний үндэсний хорооны бүтэц, бүрэлдэхүүнийг баталлаа. Салбарын сайдууд, төрийн захиргааны төв байгууллагын төлөөллүүд орж ажиллана. Өмнө нь Засгийн газрын Хэрэг эрхлэх газрын дэргэд ажилладаг байсан агентлагийг шууд шилжүүлэн ажиллана. Тэгэхээр бүтэц орон тооны асуудал гарахгүй” гэв.
Засгийн газрын ээлжит хуралдаан өнөөдөр боллоо.
Энэ үеэр хамтарсан Засгийн гэрээг Засгийн Газрын гишүүдэд танилцуулсан бөгөөд тус гэрээнд Монгол Ардын Нам, Ардчилсан Нам, ХҮН намын сонгуулийн мөрийн хөтөлбөрийн тодорхой зорилтуудыг тусгасан талаар Засгийн газрын Хэрэг эрхлэх газрын дарга Н.Учрал дараах мэдээллийг өглөө.
Энэхүү гэрээнд оролцогч гурван намын нийтлэг зорилтуудаас гадна Монгол Ардын Намын мөрийн хөтөлбөрт тусгасан Нийгмийн бодлогын реформ, бүсчилсэн хөгжлийн бодлого, авлигагүй төр, шударга ёсыг бэхжүүлэх цахим засаглал, эхлүүлсэн томоохон төслүүдийг урагшлуулах зорилтуудыг удирдлага болгосон.
Ардчилсан Намын сонгуулийн мөрийн хөтөлбөрт тусгасан хувийн өмчийн эрхээ хамгаалах, бизнес хөрөнгө оруулалтын орчин, эдийн засгийн эрх чөлөөг баталгаажуулах зорилтуудыг удирдлага болгосон.
ХҮН намын сонгуулийн эрчим хүчний салбарын либералчлал, боловсролын салбарын реформыг хэрэгжүүлэх зорилтуудыг удирдлага болгож таван бүлэгтэй гэрээг боловсруулсан байна.
Үүнд сорилтууд буюу дэд бүтэц, эрчим хүч, мега төсөл, түгжрэл, агаарын бохирдол, бүсчилсэн хөгжлийн зорилт зэрэг Засгийн Газрын тэргүүлэх чиглэлүүдийг гэрээндээ тусгасан гэв.
Тодруулбал гэр бүл, хүн амын бүлгүүдийн онцлогт нийцсэн бодлогыг тэргүүнд ээлжид тавина. Түүний дараа үндэсний сөрөн тэсвэрлэх чадвар ба олон улсын нөхцөл байдал, геополитик, эдийн засгийн өсөлтийг өрх бүрд хүргэх. Ажлын байрыг нэмэгдүүлж, ядуурлыг бууруулах асуудлыг тухайлан бүлэг болгосон байна. Мөн байгаль орчин уур амьсгалын өөрчлөлт, засаглалын бодлогууд, 20 минутын хот хэрхэн шийдвэрлэх зэргээр таван бүлэгт хуваарилсан байна.
Тэрбээр “Намуудын мөрийн хөтөлбөрийг дэмжиж санал өгсөн иргэдийн саналыг гээхгүй байх үндсэн дээр мөрийн хөтөлбөрүүдийг гэрээн дээр тусгаж байна” гэв.