Өнөөдрийн байдлаар мал аж ахуйн бүтээгдэхүүний үйлдвэрлэл, худалдаа, фермерийн аж ахуй, газар тариалангийн үйл ажиллагаа эрхлэх чиглэлээр 2327 шинэ хоршоо байгуулагдаж, 175 хоршоо ээл авсан байна.
Мөн 78 хоршоонд 216 га газар олгож, 425 өрх малжуулах хөтөлбөрт хамрагдсан байна.
“Шинэ хоршоо-Чинээлэг малчин” арга хэмжээний төлөвлөгөөний хэрэгжилтийг эрчимжүүлж, орон нутагт ажиллах, малчдад зөвлөн туслах үүрэг бүхий баг ажиллуулахаар шийдвэрлэлээ.
Он гарснаас хойш 10.8 сая ширхэг өндөг импортолсон нь өмнөх оны мөн үеэс 86.7 хувиар буурсан үзүүлэлттэй байна.
Мөн өргөн хэрэглээний голлох хүнсний нэг цагаан будаа 10.5 мянган тонныг импортолсон нь өмнөх оны мөн үетэй харьцуулахад 50.6 хувиар буурсан дүнтэй байна.
Английн Манчестер хотын “Олд Траффорд” цэнгэлдэх хүрээлэнг дугуйтай зорьсон аялагч Б.Очирваань ирэх мягмарт гаригт эх орондоо ирнэ.
Тэрээр өөрийн цахим хуудастаа “Зургаадугаар сарын 9-ний 17:00 цагт Манчестер хотоос хөдөлнө. Истанбул хотоор дамжин зургаадугаар сарын 11-ний өглөө 07:00 цагт Монголдоо бууна. Нисэх дээр буугаад хурдны зам дуустал машинаар яваад 10:00 цагаас Нисэхийн тойрогоос талбай хүртэл дугуйтайгаа явна . Нисэхийн тойргоос эсвэл талбай орох замаас маань дугуйтайгаа нэгдээд хамт жийж болно.
Миний санаа талбай дээр аль болох олуулаа дугуйтай парад үүсгэж очвол Улаанбаатарт дугуй унадаг хүмүүс хэр их болсныг хотын удирдлагууд маань хараг бас дугуйчдынхаа аюулгүй байдлын төлөө анхаарал хандуулах, хөдөлгөөний зөв зохицуулалт хийх цаг болсныг ойлгоосой гэсэн үүднээс ингэж явахаар болсон юм. Дугуй бол байгаль орчинд ээлтэй, хүний эрүүл мэндэд тустай гээд олон талын давуу талыг бий болгож байдаг” хэмээн бичжээ.
Сонгуулийн ерөнхий хорооноос Монгол Улсын Их Хурлын 2024 оны ээлжит сонгуульд нэр дэвшигчээр бүртгэгдсэн иргэдэд зургаадугаар сарын 10-ны өдөр Нэр дэвшигчийн үнэмлэх олгож, нийтэд мэдээлнэ.
Нэр дэвшигчийн үнэмлэхийг 19 нам, 2 эвслийн төлөөлөл тухайн өдрийн 08.00 цагаас эхлэн хүлээн авна. Бие даан нэр дэвшигчдийн тухайд өөрсдөө эсхүл өөрийг нь төлөөлөх хүн Нэр дэвшигчийн үнэмлэхийг авах юм.
Сонгуулийн сурталчилгааг нэр дэвшигчид үнэмлэх олгосон өдөр (2024.06.10)-өөс эхлэн санал авах өдрөөс 24 цагийн өмнө (2024.06.26-ныг дуустал) зогсооно.
Монгол Улсын Их Хурлын сонгуулийн тухай хуульд зааснаар 2024 оны зургаадугаар сарын 10-ны өдрөөс эхлэн Авлигатай тэмцэх газар нэр дэвшигчдийн хөрөнгө орлогын мэдүүлгийг, Үндэсний аудитын газар нам, эвсэл болон бие даан нэр дэвшигчдийн сонгуулийн мөрийн хөтөлбөр, түүнд хийсэн дүгнэлтийг цахим хуудастаа нээлттэй байршуулна. Түүнчлэн Сонгуулийн ерөнхий хороо нэр дэвшигчдийн мэдээлэл, нам эвсэл, бие даан нэр дэвшигчдийн мөрийн хөтөлбөрийг https://m-election.mn/ цахим хуудастаа байршуулах юм.
Хар тамхи, мансууруулах бодистой холбоотой гэмт хэрэг энэ оны эхний таван сарын байдлаар 122 гэмт хэрэг бүртгэгдсэн ба энэ нь өмнөх оноос 19.6 хувиар өссөн үзүүлэлттэй байгаа. Мөн зөрчлийн тоо өмнөх оны үеэс 38 хувиар өссөн.
Нийт үйлдэгдсэн гэмт хэрэг, зөрчлийг байршлаар нь авч үзвэл
Харин 122 гэмт хэргийн 105-д нь 18-35 насны залуус холбогдож байна.
2024 оны эхний 5 сарын дүнгээр импортоор нийт 4395.2 сая ам.долларын бараа, түүхий эд оруулсан нь 2023 оны мөн үеэс 932.3 сая ам.доллароор буюу 26.9 хувиар өсчээ.
2024 оны эхний 5 сард улаанбуудай 72,6 мян тн импортолсон нь өмнөх оны мөн үеэс 6.1 дахин, улаанбуудайн гурил 13,9 мян тн импортолсон нь өмнөх оны мөн үеэс 43.9 дахин тус тус өссөн байна.
Харин өндөг 10,8 сая импортолсон нь өмнөх оны мөн үеэс 85.1 хувь, цагаан будаа 10,5 мян тн импортолсон нь өмнөх оны мөн үеэс 14.7 хувь тус тус буурчээ.
Зам, Тээврийн Хөгжлийн Яам(ЗТХЯ)-ны захиалгаар хийгдэж буй Туулын авто замыг Нисэхийн хурдны авто замтай холбох Наадамчдын гүүрний зураг төслийн ажил дуусжээ.
Наадамчдын авто зам дээгүүр барих энэхүү гүүр нь 800 у/метр.
Монгол Улсын анхны дүүжин буюу татлагат гүүр болох юм.
Энэхүү гүүр нь 2 урсгал, 4-6 эгнээ, 2 талдаа явган хүний замтай байх бөгөөд тулгуурын өндөр нь 65 метр байхаар тооцоолж байна.
Гэрээнд заасны дагуу энэ сард зураг төслийн ажил бүрэн дуусаж 2024-2026 онд барилгын ажил нь хийгдэж ашиглалтад орно.
Нийт 74 сая ам.долларын төсөвтэй уг гүүрийн нийт урт 846.5 у/м байх бол татлагат хэсгийн урт 270 у/м байна.
Энэхүү гүүр баригдсанаар Яармаг Нисэхийн чиглэлийн түгжрэл бүрэн арилж, хотын замын хөдөлгөөний эрчим сайжрах юм гэж ЗТХЯ-наас мэдээллээ.
Ерөнхийлөгч Жо.Байден Цагаан ордны Зууван танхимд “Time” сэтгүүлийн Вашингтон дахь товчооны дарга Массимо Калабреси, ерөнхий редактор Сэм Жейкобс нарт ярилцлага өгсөн юм байна.
Тэгвэл “Тайм” сэтгүүл АНУ-ын ерөнхийлөгч Жо.Байдентай хийсэн ярилцлагаа нийтэлжээ. Ярилцлагын үеэр Байден Хятад, Тайвань,Украин, Израилийг багтаасан гадаад бодлогынхоо талаар дэлгэрэнгүй ярьж, улиран сонгогдох гэж байгаа өндөр
насандаа санаа зовж байна гэжээ. Трампын үйлдэл, мэдэгдлээс болж дэлхий Америкт итгэх итгэлээ алдсан гэж Жо.Байден энэхүү ярилцлагадаа онцлон дурджээ. Ерөнхийлөгч өөрийн хүч чадал, чадвартаа илүү итгэлтэй байж чадахгүй байгаа бөгөөд алдаатай ярьж, бүдэрч бас амархан ядарч байсан ч шинэ хугацааг даван туулж чадна гэж мэдэгджээ. Ярилцлагын үеэр түүнээс “Украин дахь дайны төгсгөл гэж юу вэ, дэлхий үүнийг хэрхэн харж байна вэ?” гэж асуухад Байден “Энх тайван гэж Орос Украиныг хэзээ ч, хэзээ ч, хэзээ ч, хэзээ ч (дөрвөн удаа давтан хэлэв) эзлэн авахгүй гэсэн баталгаа бий болохыг хэлнэ. Дэлхий ийм л байдлыг хүлээж байна. Энэ нь Украин НАТО-гийн нэг хэсэг болно гэсэн үг биш юм. Энэ нь бид бусад улстай адил тэдэнтэй харилцаж, өөрсдийгөө хамгаалах зэвсэг нийлүүлсээр байх болно гэсэн үг.
Иймээс би Украиныг НАТО-д элсэхийг дэмжихэд бэлэн биш байна гэж хэлсэн” гэж хариулжээ. Украин НАТО-д гишүүнээр элсэхийг эртнээс эрмэлзсээр ирсэн ч энэ асуудал эвслийн зарим гишүүдийн эсэргүүцэлтэй тулгараад байгаа билээ. Тухайлбал, өнгөрсөн зун Вильнюс хотноо болсон НАТО-гийн дээд хэмжээний уулзалтын үеэр Украины удирдлагуудын урам хугалсан мэдэгдэл гарч, “Украины ирээдүй НАТО мөн. Гэхдээ бид цаг нь ирэхээр Украиныг НАТО-д нэгдэх урилга илгээх байр суурьтай байна. Гишүүн улсууд ч болзол хангагдсан тохиолдолд энэ асуудлаар зөвшилцөх болно” гэж мэдэгдсэн юм. Мөн Орос улс 2021 оны 12 дугаар сард АНУ болон НАТО-д Украин, Гүржийг хэзээ ч НАТО-гийн гишүүн болгохгүй гэсэн баталгаа шаардаж үүнийгээ хожим дайн хийсэн нэг шалтгаан болгож байсан юм. Оросын эрх баригчид энэ шаардлагаасаа өнөөдөр ч татгалзаагүй байна. Энэхүү ярилцлагын үеэр ерөнхийлөгч Байден “Хятад улс АНУ-ын сонгуульдхөндлөнгөөс оролцож байгааг нотлох баримт бидэнд бий” гэж хэлсэн нь судлаачдын анхаарлыг гойд татаж, тэдний хэлэлцүүлгийн шинэ сэдэв болоод байна.
Улсын онцгой комисс, Нийслэлийн Засаг даргын Тамгын газар, Онцгой байдлын ерөнхий газраас төвийн дүүргүүд болон зарим чиг үүргийн байгууллагуудыг ус соруулах насосоор хангалаа.
Тодруулбал, болзошгүй үер, усны эрсдэлээс урьдчилан сэргийлэх, бэлэн байдлыг хангах ажлын хүрээнд Ус сувгийн удирдах газар, Орон сууц нийтийн аж ахуйн удирдах газар, Геодизи, усны барилга байгууламжийн газар болон Баянзүрх, Чингэлтэй, Хан-Уул, Баянгол, Сонгинохайрхан, Налайх, Багануур дүүргүүдэд ус зайлуулах насос хүлээлгэн өгч байна.
Улаанбаатар хотод энэ жил өмнөх жилүүдээс илүү их хур тунадас орох төлөвтэй байгааг мэргэжлийн байгууллагууд хэлж байгаа тул болзошгүй эрсдэлээс урьдчилан сэргийлэх үүднээс ийнхүү дүүргүүдийг ус соруулах насосоор хангаж байна. Тус ус соруулах насос нь 1 цагт 300 метр куб ус соруулах хүчин чадалтай бөгөөд 2023 онд НЗДТГ долоон ширхгийг худалдан авч байжээ.
Прокурорын байгууллага энэ сарын 03-07-ны хооронд хэрэг хянан шийдвэрлэх ажиллагаанд оролцогчдоос гаргасан 322 гомдол, хүсэлтийг шинээр хүлээн авч, нийт 1009 гомдол, хүсэлтийг хянажээ.
Хүлээн авсан гомдол, хүсэлтийн дийлэнх нь эрүүгийн болон зөрчлийн хэрэг хянан шийдвэрлэх ажиллагаатай холбоотой байна. Харин шүүхээр шийдвэрлэгдсэн хэрэгт шинээр илэрсэн нөхцөл байдлыг шалгуулах 4, ял эдлүүлэх ажиллагаатай холбогдох 10 гомдлыг хүлээн авсан байна.
Дээрх хугацаанд 265 гомдол, хүсэлтийг хянан шийдвэрлэж, одоо 744 гомдол, хүсэлтийг хянаж байна.
Мөн Нийслэлийн үйлчилгээний нэгдсэн төвийн Дүнжингарав, Мишээл салбар дахь “Прокурорын байгууллагын нэг цонхны үйлчилгээ үзүүлэх төв”-үүд 28 иргэний өргөдөл, гомдлыг хүлээн авч харьяа прокурорын газарт нь шилжүүлж, прокурорын байгууллагын чиг үүрэг, үйл ажиллагаатай холбоотой зөвлөгөө мэдээллийг 40 иргэнд өгч ажиллажээ.