Month: June 2024

Улаанбаатарын айл өрх, сургууль, цэцэрлэг, эмнэлгийн халаалтыг өнгөрсөн сарын 15-наас зогсоож, засварын ажлыг эхлүүлээд байгаа билээ. Дулааны шугамын засвар, шинэчлэлийн ажил өнгөрсөн тавдугаар сарын 15-наас эхэлж, наймдугаар сарын 12-нд дуусах хуваарьтай. Хуваарийн дагуу маргаашаас Яармаг хэсэгт буюу Вива сити, Шинэ Яармаг хороолол болон Хан-Уул дүүргийн зарим хороодод 14 хоног халуун ус хязгаарлана. Мөн өөр хэд хэдэн байршилд төлөвлөгөөт засвар 20 хоногийн хугацаанд хийх юм байна. Иймд графикийн дагуу тодорхой байршлуудад хэрэглээний халуун усыг хязгаарлана.

Ойд явж байсан иргэн баавгайд бариулж нас барсан харамсалтай хэрэг гарсан талаар Цагдаагийн байгууллагаас мэдээллээ.

Энэ талаар ЦЕГ-ын Урьдчилан сэргийлэх газрын мэргэжилтэн, цагдаагийн дэслэгч С.Мягмарсүрэн, “Бугын эвэр түүхээр ойн гүн рүү орж, баавгайд бариулсан байж болзошгүй хэрэг Хөвсгөл аймгийн Цагаан-Үүр суманд гарлаа. Өнгөрсөн тавдугаар сарын 31-ний өдөр энэ тухай дуудлага аймгийн цагдаагийн газарт бүртгэгдсэн. Алба хаагчид хэргийн газарт машинтай очих боломжгүй байсан тул 100 гаруй км замыг мориор туулж очсон. Мөрдөн шалгах ажиллагаагаар тус аймгийн харьяат, 50 настай иргэн энэ оны тавдугаар сарын 20-ны өдөр бугын эвэр түүхээр Цагаан-Үүр суманд очиж, тавдугаар сарын 27-ны өдөр ойд явж байхдаа баавгайд бариулж, амь насаа алдсан байдал тогтоогдсон. Иймд аялал жуулчлалын улирал эхэлсэн энэ үед зарим иргэн ан гөрөө хийх, эмийн ургамал түүх зорилгоор баталгаагүй замаар явж, амь нас эрүүл мэндээрээ хохирох эрсдэл байдаг тул өөрийн болон бусдын аюулгүй байдлыг сахин хамгаалахыг сэрэмжлүүлж байна” гэв.

Мах, махан бүтээгдэхүүний үнэ 5 дугаар сард өмнөх оныхоос 4.2 хувиар нэмэгджээ. Үүнд:

• үхрийн махны үнэ 3.7 хувь,
• хонь, ямааны махны үнэ 3.1 хувь,
• адууны махны үнэ 2.7 хувиар нөлөөлжээ.

Улаанбаатар хотод 1 кг үхрийн цул махыг дунджаар 21408 төгрөгөөр худалдаж байна. Энэ нь 2022 оны 5 дугаар сараас 22.6 хувиар, 2023 оны 5 дугаар сараас 3.9 хувиар, өмнөх сарынхаас 6.5 хувиар (1304 төгрөгөөр) өссөн үзүүлэлт гэж Үндэсний статистикийн хорооноос мэдээлэв.

Гадаад улсад ажиллаж амьдарч буй манай иргэд УИХ-ын сонгуульд оролцож, сонгох эрхээ эдлэхийн тулд энэ сарын 15-ны өдрийг хүртэлх хугацаанд нэрсийн жагсаалтад бүртгүүлж буй.

Өнөөдрийн байдлаар, 33 улсад 4746 иргэн саналаа өгөхөөр бүртгүүлсэн байна. Иргэд оршин суугаа эсвэл түр зорчиж буй улс, хотод байршилтай Монгол Улсын Элчин сайдын яам, Ерөнхий консулын газар, Консулын газарт санал өгөх тухай хүсэлтээ дор дурдсан бүртгэлийн хэлбэрүүдийн нэгийг сонгон сонгогчдын нэрсийн жагсаалтад бүртгүүлнэ. Үүнд:

-https://election.burtgel.gov.mn/request хаягаар орон шууд;

-https://election.burtgel.gov.mn/request хаягаас бүртгэлийн маягт татан авч бөглөн гадаад паспорт эсхүл иргэний үнэмлэхийн хуулбарыг цахим шуудангаар санал өгөх Дипломат төлөөлөгчийн газарт хүргүүлэх;

-Элчин сайдын яам, Ерөнхий консулын газар, Консулын газарт биечлэн очиж болно.

Бүртгэл нь баталгаажсан сонгогч энэ сарын 20-23-ны өдрүүдэд 07:00-22:00 цагийн хооронд гадаад паспорт эсвэл иргэний үнэмлэхтэйгээ очиж саналаа өгөх юм.

Ойрын өдрүүдэд уулархаг нутгаар дуу цахилгаантай аадар бороо орох тул болзошгүй нөөлөг салхи, мөндөр, аянга цахилгааны аюулаас сэрэмжтэй байхыг Цаг уур, орчны шинжилгээний газар анхаарууллаа.

2024 оны 6 сарын 9-13-ныг хүртэлх цаг агаарын урьдчилсан төлөв танилцуулж байна. Энэ сарын 9-нд Монгол-Алтай, Хангай, Хөвсгөл, Хэнтийн уулархаг нутгаар, 10-нд баруун болон төвийн аймгуудын нутгийн хойд хэсгээр, 11-нд төв болон зүүн аймгуудын нутгийн хойд хэсгээр, 12-нд баруун аймгуудын нутгийн баруун хэсэг, зүүн аймгуудын нутгийн зарим газраар бороо, дуу цахилгаантай аадар бороо орно.

Салхи ихэнх хугацаанд секундэд 5-10 метр, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Тэрэлж голын хөндийгөөр шөнөдөө +1…+6 градус, өдөртөө +19…+24 градус, говийн бүс нутгаар шөнөдөө +14…+19 градус, өдөртөө +30…+35 градус, бусад нутгаар шөнөдөө +8…+13 градус, өдөртөө +24…+29 градус дулаан байна.

“Парис-2024” олимпын наадам эхлэхэд ердөө 50 хоногийн хугацаа үлдээд байгааг тохиолдуулан баасан гарагт Францын нийслэл хотын бэлгэ тэмдэг болсон Эйфелийн цамхагт Олимпын таван цагаригийг байрлуулжээ.

Дахин боловсруулсан гангаар хийсэн 29х13 метрийн хэмжээтэй цагаригуудыг Эйфелийн цамхгийн урд талд буюу Сена мөрөн рүү харуулан байрлуулсан байна. Цагариг тус бүр нь 9 метрийн диаметртэй ажээ. Нийт 30 тонн жинтэй Олимпын цагарагийг өргөхөд хоёр том кран ашиглаж, цамхгийн нэг болон хоёрдугаар давхрын хооронд байрлуулжээ. Олимпын цагаригийг орой бүр гэрэлтүүлэхийн тулд 100 мянган лед гэрэл суурилуулсан байна.