Month: June 2024

Төв цэнгэлдэх хүрээлэнгийн гадна зам талбайн ус ихээр тогтдог байршилд 1200 метр ус зайлуулах шугам угсарсан бөгөөд ногоон байгууламжид ашиглах боломжтой 20 гаруй ус цуглуулах худгийг суурилуулсан юм.

Энэ талаар “Геодези, усны барилга байгууламжийн газар”-ын Ерөнхий инженер С.Батсайханаас тодрууллаа. Тэрбээр “Манай шугам угсралтын бригад борооны улирлаас өмнө ажлуудаа нарийн зохион байгуулж 24 цагаар ажиллаж байна. Өчигдөр буюу зургаадугаар сарын 18-19-нд шилжих шөнө орсон аадрын дараа ус зайлуулах шугам угсарсан газруудад үзлэг хийхэд ус тунасан асуудал гараагүй. Тодруулбал, өнгөрсөн онуудад Төв цэнгэлдэх хүрээлэнгийн гадна зам талбайн ус ихээр тогтож Улсын баяр наадмын үеэр дээл, гоёлоо өмссөн иргэд болон жуулчид усаар туулах, харайх асуудлууд гардаг байсан. Иймээс Төв цэнгэлдэх хүрээлэн орчимд ногоон байгууламжид ашиглах боломжтой 20 гаруй ус цуглуулах худаг, 47 борооны ус зайлуулах шугам угсарлаа. Мөн зургаан метрийн гүнд өргөх насос суурилуулсан. Гандийгийн гудамжны борооны ус зайлуулах шугам сүлжээгээр дамжуулж Дунд гол уруу цутгах 1.2 километр борооны ус зайлуулах шугам угсарч дууссан” гэлээ.

Үер, усны аюулаас урьдчилан сэргийлэхийн тулд борооны усыг зайлуулах шугам сүлжээ, хоолойн шинэчлэлтийг 300 мм-ийн голчтой давхар ханатай хуванцар хоолойгоор хийж байгаа бол төвийн шугамуудыг 500 мм-ийн голчтой төмөр бетон хоолойгоор хийж байна. Зургаан байршилд борооны ус зайлуулах шугам угсрахаар төлөвлөсөн бөгөөд 70 хувьтай үргэлжилж байна. Мөн жижиг найман байршилд борооны ус зайлуулах шугамын засвар үргэлжилж байна. Түүнчлэн төмөр бетон хоолойд халдаг утас гүйлгэх шинэ шийдэл нэвтрүүлсэн нь цаг агаар хасах хэмтэй үед хоолойг гэсгээж байнгын урсацтай байх боломжийг бүрдүүлж байгаа юм.

Сэлэнгэ аймгийн Сайхан сумын нутаг дэвсгэр Дархан-Уул аймгаас Орхон аймаг руу зорчих чиглэлийн улсын чанартай А1001 дугаартай авто замын 23-24 дахь километрт өнгөрсөн шөнө орсон борооны улмаас замын хөвөөнд/200 метр газар/ нуралт үүсжээ.

“Дархан-АЗЗА” ТӨХК-аас ажлын хэсэг гарган нуралт үүссэн хэсгийн эгнээг хааж, замын хөдөлгөөн хязгаарлан засварын ажил хийгдэж байна.

Иймд жолооч нар замын нөхцөл байдалд хурдаа тохируулж, анхаарал болгоомжтой зорчихыг аймгийн цагдаагийн газраас анхаарууллаа.

Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2024 оны зургаадугаар сарын 10-14-ний өдрүүдэд авлигын шалтгаан, нөхцөлийг арилгах чиглэлээр газрын салбарын албан хаагчдын ёс зүйн болон хүнд сурталд хамаарах асуудлаар Нийслэлийн Газар зохион байгуулалтын алба болон есөн дүүргийн Газар зохион байгуулалтын албаны нийт 11 байгууллага, Өргөн нэвтрүүлэг хөгжүүлэх сангийн үйл ажиллагаатай холбогдуулан Цахим хөгжил, харилцаа холбооны яаманд, стандарт боловсруулах, батлуулах үйл ажиллагаанд холбогдуулан Стандарт хэмжил зүйн газарт тус тус албан зөвлөмж хүргүүлэв.

Түүнчлэн “Монгол Улсын виз, оршин суух зөвшөөрөл олгох, виз, оршин суух зөвшөөрлийн хүсэлтийг хянах, бүртгэх, үйлчилгээ үзүүлэхэд хураах тэмдэгтийн хураамж, визийн үйлчилгээний хөлсний хэмжээ тогтоох” тогтоол, эрчим хүчний салбарт төсвийн хөрөнгөөр санхүүжиж буй төсөл, арга хэмжээний хэрэгжилт, барилгын норм, нормативын санд орлого төвлөрүүлэх, барилгын тусгай зөвшөөрөл сунгахад компаниудын тайланд үндэслэж бодитой тооцоо хийдэг эсэх, гэр хорооллын дахин төлөвлөлтийн хүрээнд “Ногоон нуур” орчмын 1,008 айлын орон сууцны хотхон төслийн явцын ил тод байдал зэрэг асуудлаар дүн шинжилгээ хийж байна.

Авлигын эсрэг хуульд заасан бүрэн эрхийн хүрээнд төрийн үйлчилгээний хүнд суртлыг бий болгоод зогсохгүй цаашлаад авлигын гэмт хэрэг, зөрчил гарах эрсдэлийг дагуулж болзошгүй “Өргөө” амаржих газрын удирдлагаас үндэслэлгүй тогтоосон төлбөртэй үйлчилгээний журмыг хүчингүй болгуулахаар ажиллав.

Авлигын эсрэг сургалтад 1,898 иргэн, албан тушаалтныг хамруулж зохион байгуулсан байна.

Эх сурвалж: Авлигатай Тэмцэх Газар

Дохио!!! Цаг агаарын аюултай үзэгдлээс сэрэмжлүүлэх мэдээ: 20-ноос 21-нд шилжих шөнө Булганы нутгаар хүйтэн бороо, Орхон, Сэлэнгэ, Дархан-Уул, Төв аймаг, Улаанбаатар хот орчмоор, 21-ний өдөр Төв, Сэлэнгийн зүүн хэсэг, Хэнтий аймгийн нутгаар их бороо орно.

Малчид, иргэд, тээвэрчид, аялагчдын анхааралд: 21-нд төв болон зүүн аймгуудын нутгаар, 22-нд нутгийн зүүн хагаст үргэлжилсэн усархаг бороо, дуу цахилгаантай аадар бороо орж, нутгийн зүүн хасагт эрс сэрүүсэж, Хэнтийн уулсаараа нойтон цас орох нөхцөл бүрдэж байгаа тул ноосолсон мал осгох, борооны өмнөх хүчтэй салхи, мөндөр, аянга, цахилгаан, уруйн үер, усны аюулаас сэрэмжтэй байхыг, говь, тал, хээрийн нутгаар хүчтэй салхи, шороон шуургатай байхыг онцгойлон анхааруулж байна.

2024 оны зургаадугаар сарын 22-ноос 2024 оны зургаадугаар сарын 26-ныг хүртэлх цаг агаарын урьдчилсан төлөв

22-нд нутгийн зүүн хагаст үргэлжилсэн усархаг бороо, 23-нд Хангай, Хөвсгөл, Хэнтийн уулархаг нутаг, Дорнод-Дарьгангын тал нутгаар, 24-нд Хангай, Хөвсгөл, Хэнтийн уулархаг нутаг, Орхон, Сэлэнгэ голын хөндийгөөр, 25-нд төвийн аймгуудын ихэнх нутаг, зүүн аймгуудын нутгийн хойд хэсгээр бороо, дуу цахилгаантай аадар бороо орно. Салхи нутгийн зарим газраар борооны өмнө түр зуур ширүүсэж, 22-нд говь, тал, хээрийн нутгаар секундэд 15-17 метр хүрч ширүүснэ Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Орхон-Сэлэнгийн сав газар, Эг, Үүр, Туул, Тэрэлж, Хэрлэн, Онон, Улз голын хөндийгөөр шөнөдөө 2 градус хүйтнээс 3 хэм, өдөртөө 9-14 хэм, говийн бүс нутгийн өмнөд хэсгээр шөнөдөө 10-15 хэм, өдөртөө 21-26 хэм, бусад нутгаар шөнөдөө 4-9 хэм, өдөртөө 14-19 хэм дулаан байна. 23-нд нутгийн баруун хагаст, 24-нд ихэнх нутгаар хална.

Эмээлт захын ноолуурын ханшийн мэдээллийг хүргэж байна.

Зүүн аймагт 125.000 төгрөг

Төв аймагт 120.000 төгрөг

Говийн аймагт 110.000-120.000 төгрөг

Баруун аймагт 120.000 -140.000 төгрөгийн ханштай байна.

Реппер, ая зохиогч, продюсер Г.Төгөлдөр (Lil Thug-E) 2021 онд цусны цочмог хорт хавдартай болох нь оношлогдож, тэнгэрийн оронд заларсан юм.

Тэгвэл түүний цомгийн нээлт маргааш буюу зургадугаар сарын 21-ны өдөр “505 el club’-д болно.

Түүний цомог биет хэлбэрээр гарж байгаа бөгөөд нээлтэнд ирсэн эхний 80 хүнд T-shirt бэлэглэх аж.

Зургаадугаар сарын 20-ны өдрийн байдлаар Хөвсгөлийн уулсаас эхтэй Үүр, Хэнтий нурууны баруун хажуугаас усжих Тэрэлж, Туул, Улиастай, Сөгнөгөр, зүүн хажуугийн Хэрлэн голын эх, Хангай нурууны арын Идэр, Хануй, Орхон, өврийн Чигэстэй, Завхан, Буянт, Алтай нурууны Буянт, Ховд, Бодонч, Согоог зэрэг голуудын усны түвшин өмнөх өдрийнхөөс 5-40 см нэмэгдэж, Сөгнөгөр, Сэлбэ, Хөгшин Орхон, Булган, Хариг зэрэг голууд үерийн түвшинд, Буянт, Ховд гол үерийн аюултай түвшинд хүрсэн байдалтэй байна.

Маргааш Туул гол Улаанбаатар хот орчимд усны түвшин 20 см, Хэрлэн гол Мөнгөнморьт сум орчимд 10 см нэмэгдэх төлөвтэй байна.

Ойрын өдрүүдэд баруун, төв, зүүн аймгуудын нутгаар бороо, дуу цахилгаантай аадар бороо орох тул тухайн хугацаанд орсон хур борооны эрчимшил хэмжээнээс шалтгаалан дээр дурьдсан голууд болон гол мөрний усны түвшин богино хугацаанд огцом нэмэгдэх, хуурай сайр, гуу жалгаар уруйн үер буух нөхцөл бүрдэх тул үерийн аюулаас сонор сэрэмжтэй байхыг онцгойлон анхааруулж байна.

Мөн түүнчлэн голын эрэг хөвөө дагуу бууж сууршихгүй байх, бага насны хүүхдэд тавих анхаарал халамжаа сайжруулах, голруу зориулалтын болон зориулалтын бус хөвөгч ашиглан орохгүй байх, хот суурин газрын үерийн далангийн ус зайлуулах хоолойгоор ус чөлөөтэй урсах нөхцлийг бүрдүүлэхийг орон нутгийн холбогдох байгууллага анхааралдаа авч урьдчилан арга хэмжээ авахыг зөвлөж байна.