Month: May 2024

Categories
мэдээ нийгэм цаг-үе

Зургаан чиглэлд 12 алба хаагч морьт эргүүл хийж байна DNN.mn

Урин дулааны цаг ирж байгаатай холбогдуулан иргэдийг гэмт хэрэг, зөрчилд өртөж хохирохоос урьдчилан сэргийлэх зорилгоор морьт эргүүл ажиллаж эхлээд буй. Ингэснээр гудамж талбай, Туул голын ай сав газарт үйлдэгдсэн гэмт хэргийн гаралт буурдаг аж.

Одоогийн байдлаар нийт зургаан чиглэлд 12 алба хаагч морь эргүүл хийж байна. Энэ тоог цаашид 30 болгон нэмэгдүүлж, Тэрэлжийн нутаг, зуслангийн бүс, Хан-Уул, Баянзүрх дүүрэг, Туул голын ай сав газраар ажиллахаар төлөвлөжээ.

Морьт эргүүл нь тээврийн хэрэгсэл болон явган явах боломжгүй гэр хорооллын гудамж талбай болон голын ай сав газруудаар гэмт хэрэг, зөрчилтэй тэмцэх, урьдчилан сэргийлэх, иргэдийн дуудлага мэдээлэлд цаг алдалгүй түргэн шуурхай хүрч ажиллах, урьдчилан сэргийлэх зөвлөмжийг өгч ажиллах давуу талтай юм.

Categories
мэдээ улс-төр

Ерөнхийлөгч БНСВУ-ын Элчин сайдыг хүлээн авч уулзав DNN.mn

Монгол Улсын Ерөнхийлөгч Ухнаагийн Хүрэлсүх Бүгд Найрамдах Социалист Вьетнам Улсаас Монгол Улсад суугаа Онц бөгөөд Бүрэн эрхт Элчин сайд Зоан Хань Дам-ыг эх орондоо бүрмөсөн буцахтай нь холбогдуулан хүлээн авч уулзав.

Ерөнхийлөгч хоёр улсын хооронд дипломат харилцаа тогтоосны түүхт 70 жилийн ой энэ онд тохиож буйг тэмдэглээд, харилцаа ‘Найрамдалт хамтын ажиллагааны зарчим’-д тулгуурлан бүхий л салбарт өргөжин хөгжиж байгааг дурдав.

Элчин сайдаар ажиллах хугацаандаа харилцаа, хамтын ажиллагааг гүнзгийрүүлэн бэхжүүлэхэд идэвх санаачилга гаргаж, худалдаа, аялал жуулчлалын салбарын хамтын ажиллагааг өргөжүүлэх, ялангуяа иргэдийг харилцан визийн шаардлагаас чөлөөлөхөд үнэтэй хувь нэмэр оруулсныг онцлов.

Монгол Улсын төр, засаг бүх талаар дэмжин, хамтран ажиллаж байсанд Элчин сайд Зоан Хань Дам талархал илэрхийллээ.

Цаашид харилцаа, хамтын ажиллагааг бэхжүүлэх үйлсэд хүчин зүтгэж,  иргэд хоорондын харилцааг бэхжүүлэхэд анхаарч ажиллахаа хэлэв.

Монгол Улсын Ерөнхийлөгч У.Хүрэлсүх найрамдалт харилцаа, хамтын ажиллагааг хөгжүүлэхэд оруулсан хувь нэмэр, хөдөлмөр, зүтгэлийг нь үнэлж Элчин сайд Зоан Хань Дам-ыг “Найрамдал медаль”-иар шагналаа.

Categories
мэдээ нийгэм цаг-үе

Бага тойруугийн авто замыг хааж, хэсэгчилсэн засвар, шинэчлэлт хийнэ DNN.mn

Сүхбаатар дүүрэг болон Чингэлтэй дүүргийн нутаг дэвсгэр ”Зоос гоёл”-ын уулзвараас Соёл урлагийн их сургуулийн уулзвар хүртэлх авто зам засвар, шинэчлэлтийн ажлыг 2024 оны тавдугаар сарын 15-ны өдрийн 23:00 цагаас 2024 оны тавдугаар сарын 18-ны өдрийн 06:00 цагийн хооронд хааж авто замын засвар, шинэчлэлтийн ажлыг хийж гүйцэтгэнэ.

Энэ хүрээнд хашлага өндөрлөж зорчих хэсгийн түвшинд тааруулах, зорчих хэсгийн худгийн таг өндөрлөх, асфальтбетон хучилт, тэмдэг тэмдэглэгээний ажлуудыг хийх юм.

Иймд иргэд, жолооч та бүхэн бусад замыг сонгон хөдөлгөөнд оролцоно уу гэж Нийслэлийн Замын хөгжлийн газраас мэдээллээ. 

Categories
мэдээ нийгэм

ГИХГ: 17961 иргэний хүсэлтийг цахимаар хүлээн авч, шийдвэрлэв DNN.mn

Гадаадын иргэн, харьяатын газар өнгөрөгч дөрөвдүгээр сард гадаадын 6264 иргэнд визийн зөвшөөрөл, 915 иргэнд виз, цахим визийн evisa.mn системээр 28 улсын 7233 иргэнд цахим виз олголоо.

Мөн эрх бүхий байгууллагын зөвшөөрлийг үндэслэн гадаадын 2275 иргэнд Монгол Улсад оршин суух зөвшөөрөл олгож, 1361 иргэний оршин суух зөвшөөрлийн хугацааг сунган, 782 иргэний бүртгэлд хасалт хийв.

Түүнчлэн төрийн үйлчилгээний хүртээмжийг нэмэгдүүлэх, үйлчлүүлэгчдийн цаг, зардлыг хэмнэx, үйлчилгээний төвлөрлийг сааруулаx зорилгоор гадаадын иргэний оршин суух үнэмлэхийг хотын төвд буюу Чингэлтэй дүүргийн Улсын бүртгэлийн нэг цэгийн үйлчилгээний төвд нэгдсэн байдлаар олгож байгаа бөгөөд өнгөрөгч сард 3888 үнэмлэхийг шинээр хэвлэж, 1858 иргэнд оршин суух үнэмлэх олгосон байна.

Цахим үйлчилгээний нэгдсэн системээр 17961 иргэний хүсэлтийг хүлээн авч хянан шийдвэрлэж, Монгол Улсад албан болон хувийн хэргээр оршин суух зөвшөөрөл, түүний сунгалт, түр ирэгчийн бүртгэл, хасалт, визийн хугацааны сунгалтын асуудлаар 7477 иргэнд утсаар, 702 иргэнд биечлэн, 84 иргэнд цахимаар, нийт 8263 иргэнд зөвлөгөө, мэдээлэл өглөө.

2024 оны дөрөвдүгээр сарын байдлаар Монгол Улсад албан болон хувийн хэргээр оршин суух бүртгэлтэй 32193 гадаадын иргэн байна. Үүнээс хөдөлмөр эрхлэгч 11862, хөрөнгө оруулагч 4007, гэр бүлийн зорилгоор 1616, цагаач 1880, түр ирэгчээр бүртгэлтэй 2967 гадаадын иргэн байна гэж Гадаадын иргэн, харьяатын газраас мэдээллээ. 

Categories
мэдээ нийгэм цаг-үе

Ойрын өдрүүдэд ихэнх нутгаар салхитай, зарим газраар бороо, нойтон цас орно DNN.mn

Цаг уурын байгууллагын ирүүлсэн мэдээгээр тавдугаар сарын 13, 14-нд Алтай, Хангайн уулархаг нутгаар, 15-нд Хангай, Хөвсгөл, Хэнтийн уулархаг нутгаар, 16-нд баруун болон төвийн аймгуудын нутгийн хойд хэсгээр, 17-нд баруун болон зүүн аймгуудын нутгийн хойд хэсэг, төвийн аймгуудын ихэнх нутгаар, 18-нд нутгийн зүүн өмнөд хэсгээр, 19-нд нутгийн төв хэсгээр, 20-нд нутгийн зүүн хэсгээр бороо, уулаараа нойтон цас орно.

Харин  салхи 13, 17-нд ихэнх нутгаар, 14-нд говь, тал, хээрийн нутгаар, 16-нд Алтайн уулархаг нутгаар секундэд 14-16 метр, зарим үед секундэд 18-20 метр хүрч, шороон шуурга шуурахыг анхааруулж байна.

Categories
мэдээ цаг-үе эдийн-засаг

Бодлогын хүүг 11 хувь болгов DNN.mn

Монголбанкны Мөнгөний бодлогын хороо өнөөдөр /2024.05.13/ хуралдсан. Тус хуралдаанаас гаргасан шийдвэр болон цаг үеийн асуудлаар Төв банкны Ерөнхийлөгч Б.Лхагвасүрэн мэдээлэл хийлээ.

Мөнгөний бодлогын хороо бодлогын хүүг нэг нэгж хувиар бууруулж, 11%-д хүргэх шийдвэр гаргасан байна.

Эдийн засаг, банк санхүүгийн зах зээлийн өнөөгийн байдал, гадаад, дотоод орчны төлөв эрсдэлийг харгалзан ийм шийдвэр гаргасан хэмээн мэдэгдэв.

Мөнгөний бодлогын хороо өнгөрөгч гуравдугаар сард хуралдахдаа бодлогын хүүг нэг нэгж хувиар бууруулж, 12 хувь болгож байсан билээ. Ийнхүү хоёр сарын дараа дахин нэг хувиар бууруулж байна.

Жилийн инфляц дөрөвдүгээр сард улсын хэмжээнд 6.4%, Улаанбаатар хотод 6.1%-тай гарсан байна. Импортын бараа бүтээгдэхүүний инфляц саарах хандлага үргэлжилсний зэрэгцээ дотоодын хүнсний гол нэрийн бараа, бүтээгдэхүүний үнийн өсөлт тогтворжсоноор инфляц буурчээ.

Categories
мэдээ нийгэм

“HIPAY CUP 24” морин тойруулгын уралдаан боллоо DNN.mn

Монголын анхны холын зайн морин тойруулгын “Hipay cup 24” уралдаан амралтын өдрүүдэд боллоо.

Тус уралдаан сонгомол дээд, их нас, сонгомол дунд, соёолон, сонгомол шүдлэн ангиллаар уралдав.

Сонгомол дээд /2024.05.11/

  1. “Hipay cup 24” уралдааны анхны түрүү магнай хүлгээр Сүхбаатар аймгийн Эрдэнэцагаан сумын уугуул, “Нүүдэлчин” группийн уяач Ш.Лхамсүрэнгийн хээр адуу тодорлоо.
  2. Аман хүзүүд Өмнөговь аймгийн Даланзадгад сумын уугуул Э.Бат-Эрдэнийн зээрд үрээ,
  3. Завхан аймгийн Тосонцэнгэл сумын уугуул С.Баярсайханы бор морь,
  4. Сүхбаатар аймгийн Дарьганга сумын уяач, Улсын алдарт уяач Г.Чинзоригийн хээр морь,
  5. Өвөрхангай аймгийн Тарагт сумын уяач Б.Наранбатын хээр үрээ айргийн тавд хурдаллаа.

Их нас /2024.05.11/

  1. Түрүү магнайд Хөвсгөл аймгийн Рашаант сумын уугуул Ц.Амарсанаагийн хээр морь хурдаллаа.
  2. Аман хүзүүд Дундговь аймгийн Дэрэн сумын уугуул, аймгийн алдарт уяач М.Сосорбурамын хонгор морь,
  3. Өвөрхангай аймгийн Хархорин сумын уугуул, Улсын алдарт уяач Х.Гарьдмагнайн халтар морь,
  4. Архангай аймгийн Чулуут сумын уугуул П.Жамсрангийн хар морь хурдаллаа.

Сонгомол дунд /2024.05.11/

  1. Түрүү магнайд Төв аймгийн Алтанбулаг сумын уяач Д.Ганзоригийн сартай хээр үрээ хурдаллаа.
  2. Аман хүзүүд Өвөрхангай аймгийн Тарагт сумын уугуул Б.Наранбатын хүрэн үрээ,
  3. Дондовдоржийн Цогтжаргалын халзан үрээ,
  4. Долгорын Батбаярын хүрэн үрээ,
  5. Монгол Улсын Тод Манлай Уяач Д.Мөнхбатын хээр халзан айргийн тавд хурдалсан юм.

Соёолон /2024.05.12/

  1. Монгол Улсын Тод Манлай Уяач Д.Мөнхбатаагийн уясан Баянхонгор аймгийн Баацагаан сумын Монгол Улсын Алдарт Уяач С.Энхтөрийн халзан үрээ түрүү магнайд хурдаллаа.
  2. Булган аймгийн Булган сумын уяач Ц.Батжаргалын ягаан үрээ аман хүзүүдэж,
  3. Төв аймгийн Аргалант сумын уугуул З.Тэнгисийн хээр үрээ гуравт,
  4. Сэлэнгэ аймгийн Түшиг сумын уяач, Монгол улсын начин С.Баатарын буурал үрээ дөрөвт,
  5. Архангай аймгийн Эрдэнэмандал сумын С.Буяндэлгэрийн хээр үрээ айргийн тавд хурдаллаа.

Сонгомол шүдлэн /2024.05.12/

  1. Уяач С.Одгэрэлийн уяж хурдлуулсан Дундговь аймгийн Хулд сумын уяач М.Жавхлангийн хээр үрээ түрүү магнайд,
  2. аман хүзүүд уяач С.Одгэрэлийн уяж хурдлуулсан Дундговь аймгийн Хулд сумын уугуул С.Мөнхбатын хээр байдас,
  3. уяач Ш.Бадамжунайн уяж хурдлуулсан Өвөрхангай аймгийн Уянга сумын уяач Д.Ганбаатарын зээрд халзан үрээ гуравт,
  4. Монгол Улсын Тод Манлай Уяач М.Алтан-Очир уяж хурдлуулсан Өвөрхангай аймгийн Тарагт сумын уяач Б.Наранбатын халзан үрээ дөрөвт,
  5. уяач М.Ундрамын уяж хурдлуулсан Хэнтий аймгийн Дархан сумын уяач Г.Энх-Амгалангийн байдас айргийн тавд хурдалж наадамчин олноо баясгалаа.
Categories
мэдээ цаг-үе

Өвс, тэжээлийн үнэ ханш DNN.mn

Өвс, тэжээлийн үнэ ханшийн /2024.05.13/ мэдээллийг хүргэж байна. 

Алтантариа  / лавлах утас: 109, 70172067, 70172077/

Хорголжин 40 кг – 31.680 төгрөг / НӨАТ-тай дүн/

Хорголжин 1 тонн – 792.000 төгрөг / НӨАТ-тай дүн/

Хивэг 25 кг-19.250 төгрөг / НӨАТ-тай дүн/

Хивэг 1 тонн – 770.000 төгрөг / НӨАТ-тай дүн/

Овъёос 40 кг – 36.080 төгрөг  / НӨАТ-тай дүн/

Овъёос 1 тонн – 900.200 төгрөг / НӨАТ-тай дүн/

5 шар, 22-ын товчоо / лавлах утас: 94444456, 94431350/

Улаанбуудай 40 кг – 40.000 төгрөг

Алтантариа хивэг 25 кг- 23.000 төгрөг

Улаанбаатар хивэг 25кг -20.000 төгрөг

Орос овъёос 40 кг – 48.000 төгрөг

Монгол овъёос 40 кг – 40.000 төгрөг

Шингүүртэй овъёос 35 кг 48.000 төгрөг

Монгол хорголжин тэжээл 40 кг- 37.000 төгрөг

Хурд морины тэжээл 25 кг- 52.000 төгрөг

Шоколадан бор 40кг- 85.000 төгрөг

Өвс- 5000-8000 төгрөг

Ногоон тэжээл – 8000-10.000 төгрөг

Амгалан бөөний төв /лавлах утас: 99335287,99688691/

Цэвэр улаан буудай 40 кг 32.000- 36.000 төгрөг

Соёолжтой цэвэр буудай 40 кг 37.000 төгрөг

Монгол овъёос 40 кг- 36.000 төгрөг

Монгол овьёос 40кг /бөөний үнэ/- 35.000 төгрөг

Орос овъёос 40 кг- 40.000 төгрөг

Орос овьёос 40 кг /бөөний үнэ/ 38.000 төгрөг

Эх сурвалж: ХХААХҮЯ-ны харьяа Малчин лавлах 109 мэдээллийн төв

Categories
мэдээ нийгэм

Он гарсаар 12 иргэн усанд осолджээ DNN.mn

Он гарсаар нийслэлийн гурван дүүрэг, есөн аймгийн мөн тооны суманд нийт 12 усны осол гарч, 12 иргэн осолдсон байна.

Эдгээрийн 10 нь насанд хүрсэн, хоёр нь хүүхэд байсан бөгөөд нэг иргэний амь насыг авран хамгааллаа.

Иймд гол, нуур гатлахаас аль болох татгалзаж, бага насны хүүхдээ хараа хяналтгүй орхихгүй байх зэргээр аюулгүй байдлаа хангахыг Онцгой байдлын байгууллагаас анхааруулж байна.

Categories
мэдээ нийгэм

Зүй бусаар хоргодсон малын сэг зэмийн 84 хувийг устгажээ DNN.mn

Улсын хэмжээнд нийт 7.4 сая толгой мал хоргодоод байгаа юм. Өнөөдрийн байдлаар зүй бусаар хоргодсон малын сэг зэмийн 84 хувийг устгах ажлыг зохион байгуулжээ.

Япон улсаас Монгол улсад суугаа онц бөгөөд бүрэн эрхт Элчин сайд Игавахара Масарү “Зудын улмаас зүй бусаар хорогдсон малын сэг зэмийг устгах, ариутгах нь яаралтай хийх ёстой ажлын нэг бөгөөд орон нутагт ажил гүйцэтгэж байгаа ОБЕГ, Мал эмнэлгийн хүрээлэн болон тухайн орон нутгийн бүх албан хаагч, ард иргэдэд хүндэтгэл илэрхийлэхийн хамт Япон улсаас олгож байгаа энэ удаагийн тусламж та бүхэнд бага ч болов тус болоосой хэмээн хүсч байна” гэлээ.

Энэ хүрээнд ариутгалын хоёр төрлийн бодис/нэг тонн/,  250 ширхэг автомакс/автомат шүршигч/, 7000 ширхэг халдвар хамгааллын хувцсыг хүлээлгэн өгсөн бөгөөд орон нутагт хуваарилан олгох юм.