Month: May 2024

УИХ-ын 2024 оны 04 дүгээр сарын 12-ны өдрийн 25 дугаар тогтоолоор байгуулагдсан “Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, төлбөр, татвар ногдуулах, хураахтай холбоотой үйл ажиллагаанд хяналт шалгалт хийх” үүрэг бүхий Хянан шалгах түр хорооноос зохион байгуулах нотлох баримтыг шинжлэн судлах нээлттэй сонсгол маргааш (2024.05.29) эхэлнэ.

Хоёр өдөр үргэлжлэх нотлох баримтыг шинжлэн судлах нээлттэй сонсголын эхний өдөр (2024.05.29) Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, бүртгэх үйл ажиллагаа сэдвийн хүрээнд 3 багц асуудал; Тусгай зөвшөөрлөөр олгосон газар, түүний хэвлийг зориулалтын дагуу ашиглаж байгаа эсэх сэдвийн хүрээнд 2 багц асуудлаар нотлох баримтыг шинжлэн судалж, шинжээчийн дүгнэлт, хянан шалгагч нарын тайланг сонсож, шаардлагатай бичмэл нотлох баримтуудыг танилцуулж, холбогдох гэрчүүдээс асуулт асууж, хариулт аван, гэрч, шинжээч, хянан шалгагчаас тайлбар авна.

Хоёр дахь өдрийн (2024.05.30) сонсголоор Нутгийн захиргааны байгууллагаас ашигт малтмал хайх, ашиглах зориулалтаар олгож буй зөвшөөрөл, түүний хэрэгжилт сэдвийн хүрээнд 2 багц асуудал; Ашигт малтмалын тусгай зөвшөөрөл эзэмшигчид төлбөр, татвар ногдуулах, тайлагнах, төлөх, хянах, хураах үйл ажиллагаа сэдвийн хүрээнд 2 багц асуудал; Стратегийн ач холбогдол бүхий ашигт малтмалын ордуудын ашиглалт, эзэмшил сэдвээр нотлох баримтуудыг шинжлэн судалж, шинжээчийн дүгнэлт, хянан шалгагч нарын тайланг сонсож, шаардлагатай бичмэл нотлох баримтуудыг танилцуулж, холбогдох гэрчүүдээс асуулт асууж, хариулт аван, гэрч, шинжээч, хянан шалгагчаас тайлбар авах юм.

Эх сурвалж: Эрдэнэс тавантолгой ХК

Хүний эрхийн Үндэсний Комисс, Хүүхэд, Гэр бүлийн хөгжил, хамгааллын ерөнхий газар, Үндэсний цэцэрлэгт хүрээлэнтэй хамтран “Хүүхэд бүр ялагч-Хүүхэд бүр хамгаалагч” хүүхдийн марафоныг 6 дугаар сарын 1-ний өдөр зохион байгуулна.

Тус марафон үе тэнгийн дээрэлхэлт, ялгаварлан гадуурхлыг таслан зогсоох, түүний хор уршиг, сөрөг ур дагаврыг сурталчлан таниулах, зөв хандлага, соёлыг дэлгэрүүлэх зорилготой.

Марафонд нэгдэж, оролцох хүүхэд бүр барианд орж буй түүхэн мөчөө мэргэжлийн гэрэл зурагчны дуранд мөнхөлж, гэрэл зургаа авахаас гадна хөгжилтэй алиалагчийн урласан бүтээлийг бэлгэнд авах боломжтой. Мөн мэргэжлийн нүүр хувиргагчаар зураг зуруулан, хүүхэлдэйн баатруудтай болон марафоны уриа, лого бүхий самбар, хүрээтэй зураг авхуулж, хүслийн хайрцагт өөрийн мөрөөдлөө шивнэж, ирээдүйгээ өөрчлөхөд хувь нэмрээ оруулах юм.

Марафон гүйлтийн хуваарь:

10.00-10.30 цагт нээлт

10.30-11.30 цагт гүйлт /6-7 нас/

11.30-12.30 цагт гүйлт /8-9 нас/

12.30-13.30 цагт гүйлт /10-11 нас/

13.30-14.30 цагт гүйлт /12-13 нас/

14.30-15.30 цагт гүйлт /14-15 нас/

15.30-16.30 цагт гүйлт /16-17 нас/

16.30 цагт хаалт

Узбекистаны нийслэл Ташкент хотноо өрнөж буй “Tour of Bostonlig” UCI 2.2 олон өдрийн тэмцээний ганцаарчилсан гараатай 30 км-ийн цагийн уралдаанд Б.Тэгшбаяр түрүүлж, Олимпийн эрхээ хүртлээ.

Өмнө нь “Ханжоу 2022” Азийн наадмын засмал замын уралдаанд С.Жамбалжамц хүрэл медаль зүүсэн амжилтаар Парисыг зорих болсон билээ.

Ийнхүү Монголын дугуйчид “Атланта 1996” Олимпоос хойш 28 жилийн дараа Олимпийн замд ур чадвараа сорих болсон бөгөөд С.Жамбалжамц бөөн гараатай уралдаанд, Б.Тэгшбаяр ганцаарчилсан гараатай тэмцээнд хурд хүчээ сорино.

Сэтгүүлч Н.Өнөрцэцэгт холбогдох шүүх хурал болж байна.

Сэтгүүлч Н.Өнөрцэцэг “Шүүх хурлыг нээлттэй явуулах хүсэлтээ өгнө. Намайг эрүүгийн дөрвөн зүйл ангиар яллахаар прокуророос шүүхэд шилжүүлсэн.

Гэхдээ мөрдөн байцаалтын явцад олон эргэлзээтэй асуудлууд үлдсэн. Анхаарал татаж байгаа нэг хэрэг бий. Өөрөө ч энэ хэрэгт яагаад холбогдсоноо ч мэдэхгүй хэрэг нь Эрүүгийн хуулийн 19.11 буюу Төрийн нууц мэдээллийг хадгалсан гэж буруутгаж байгаа юм.

Төрийн нууц мэдээллийг хадгалсан хүн байгаа юм бол задруулсан хүн байх ёстой. Тэгвэл задруулсан гэмт хэрэгтэн нь хэн юм бэ. Хэн гэдэг хүн надад төрийн яг ямар нууцыг өгсөн юм. Би нэг сайдын нэр сонссон. Тэр хүн нь хэн юм.  Миний машин, гэр, ажлаас олдсон бол би хадгалсан гэж хэлнэ. Ямар ч тийм баримт илрээгүй байхад яагаад намайг холбоод байгааг гайхаж байна. Энэ мэтээр мэдэхийг хүссэн олон асуудлууд байна. Миний ганц хүсэх зүйл нь шударга үнэнээр шүүгээд өгөөч л гэж хүсэх байна. Олон нийт ард түмэн үүнийг мэдэх хэрэгтэй.

Ил тод шүүлгэе гэж байгаа хүн надаас өөр байхгүй. Би регистрийн дугаар, дансны хуулгаа ч нуумааргүй байна. Надад нуух юм байхгүй.

Өнөрцэцэг ямар гэмт хэрэг хийдгийн хаанаас мэдээлэл авдаг юм бэ? ямар хөрөнгөтэйн энэ бүгдийг олон нийт мэдэх ёстой. Тийм учраас энэ шүүх хурлыг нээлттэй ил тод явуулаад өгөөсэй гэсэн ганцхан хүсэлтэй байна” гэв.

Орон сууцны ипотекийн хөтөлбөрийн хүрээнд оны эхнээс 2024 оны тавдугаар сарын 17-ны өдрийн байдлаар 397.3 тэрбум төгрөгийн зээлийг 3,361 өрхөд олгоод байгааг Монголбанкнаас мэдээллээ.

Үүнээс Улаанбаатар хотод 267.3 тэрбум төгрөгийн зээлийг 2,082 өрхөд, орон нутагт 130.0 тэрбум төгрөгийн зээлийг 1,279 өрхөд олгожээ. Энэ нь өмнөх оны мөн үетэй харьцуулахад ойролцоогоор 59 хувиар өссөн үзүүлэлт бөгөөд үүнээс орон нутагт олгосон зээлийн дүн ойролцоогоор 100 хувиар нэмэгдсэн байна.

Монгол Улсын Их Хурлаас “Үндэсний баялгийн сангийн тухай хууль”-ийг, Засгийн газраас “Хууль батлагдсантай холбогдуулан авах зарим арга хэмжээний тухай” тогтоолыг тус тус баталсан.

Энэхүү тогтоолд хуримтлалын сангаас орон сууцны хөнгөлөлттэй зээлийн хөтөлбөрт Монголбанкаар дамжуулан хөрөнгө оруулахаар заасан. Энэ дагуу хөтөлбөрийн хүрээнд олгох санхүүжилт нэмэгдсэнээр зээл олголт энэ оны дундажтай харьцуулахад сүүлийн 17 хоногт 52 хувиар нэмэгдсэн байна.

Эх сурвалж: Монголбанк