Month: March 2024

Монголын үндэсний бөхийн холбоо 2024 оны гуравдугаар сард болох үндэсний бөхийн барилдааны хуваарийг гаргасан байна.

• Гуравдугаар сарын 01-нд 15:00 цагаас “Малчин түмэндээ тусалъя” хандивын үйл ажиллагаанд зориулсан улс, аймгийн алдар цолтой хүчит 128 бөхийн барилдаан,
• 02-нд 13:00 цагаас Төв аймгийн Баян сумын түүхт 100 жилийн ойд зориулсан улс, аймгийн алдар цолтой хүчит 128 бөхийн барилдаан,
• 03-нд 13:00 цагаас Өмнөговь аймгийн Баян-Овоо сумын харьяат, Монгол Улсын начин Дашдуламын Багахүүгийн нэрэмжит улс, аймгийн алдар цолтой хүчит 128 бөхийн барилдаан,
• 09-нд 13:00 цагаас Дорноговь аймгийн Мандах сумын түүхт 100 жилийн ойд зориулсан, Мандах сумын харьяат, Монгол Улсын начин Алтангэрэлийн Хатансайханы нэрэмжит улс, аймгийн алдар цолтой хүчит 128 бөхийн барилдаан,
• 10-нд 13:00 цагаас Сүхбаатар аймгийн Сүхбаатар сумын түүхт 100 жилийн ойд зориулсан, тус сумын харьяат, улсын начин Лувсандоржийн Дашдаваагийн нэрэмжит улс, аймгийн алдар цолтой хүчит 128 бөхийн барилдаан,
• 14-нд 11:00 цагаас Сумын цолтон болон залуу бөхчүүдийн ээлжит барилдаан,
• 15-нд 11:00 цагаас Хөвсгөл аймгийн Цагаан-Уул сумын харьяат, аймгийн хурц, бадрангуй, хичээлт арслан Бат-Очирын Баттогтохын нэрэмжит аймаг, цэргийн цолтой болон залуу 256 бөхийн барилдаан,
• 16-нд 13:00 цагаас “Үндэсний алтан цом 2024 – Бүх одод”-ын барилдаан,
• 17-нд 13:00 цагаас Монгол цэргийн өдөрт зориулсан улс, аймгийн алдар цолтой хүчит 128 бөхийн уламжлалт барилдаан,
• 19-нд 13:00 цагаас Наурызын баярт зориулсан улс, аймгийн алдар цолтой хүчит 128 бөхийн уламжлалт барилдаан,
• 22-нд 11:00 цагаас Төв аймгийн Батсүмбэр сумын 100 жилийн ойд зориулсан, тус сумаас төрөн гарсан Монгол Улсын начин Бат-Очирын Пүрэвдоржийн нэрэмжит аймаг, цэргийн цолтой 256 бөхийн барилдаан,
• 23-нд 15:00 цагаас Үндэсний үйлдвэрлэгч “Бест буйдан” ХХК-ийн 20 жилийн ойд зориулсан “БЕСТ ЦОМ”-ын төлөөх Өндөр чансаатай, шилдэг 64 бөхийн интертайнмент барилдаан,
• 24-нд 13:00 цагаас Булган аймгийн Орхон сумын харьяат “хөнхөр” хэмээх Магсарын Гомбодорж зааны нэрэмжит улс, аймгийн алдар цолтой хүчит 128 бөхийн барилдаан тус тус болно.

НҮБ-ын Ерөнхий Ассамблейн 68 дугаар чуулганаар Дэлхийн зэрлэг амьтан, ургамлыг хамгаалах, зохистой ашиглах, олон нийтэд таниулах, сурталчлах зорилгоор жил бүрийн гуравдугаар сарын 3-ны өдрийг “Зэрлэг амьтан, ургамлыг хамгаалах өдөр” болгон зарласан.

1973 оны энэ өдөр Вашингтон хотноо “Зэрлэг амьтан, ургамлын ховордсон зүйлийг олон улсын хэмжээнд худалдаалах тухай конвенц (CITES) мөн батлагдсан.

НҮБ 2024 оны Зэрлэг амьтан ургамлыг хамгаалах өдрийг “Зэрлэг амьтан ургамлыг хамгаалахад дижитал инновацийг ашиглан Хүн төрөлхтөн, гараг ертөнцийг холбоё” уриан дор зарласан нь зэрлэг амьтан, ургамлыг хамгаалах, худалдаалахад дижитал технологийн хамгийн сүүлийн үеийн хэрэглээ болон экосистемд дижитал инновацийн үзүүлэх нөлөөллийн талаарх мэдлэгийг дээшлүүлэх зорилготой юм.

Дижитал инновацийг судалж, дижитал технологи, үйлчилгээг хөгжүүлсэн технологийн томоохон үсрэлтүүдийн тусламжтайгаар орчин үед зэрлэг амьтан, ургамлыг хамгаалах, хүн ба зэрлэг амьтан зэрэгцэн оршихуйг онцлон харуулахаас гадна амьтан ургамлын тархац, нөөц, амьдралын онцлогийг судлах боломж нээгдэн ингэснээрээ биологийн олон янз байдлыг судлах ажилд томоохон ахиц дэвшил гарна.

Эх сурвалж: Байгаль орчин, аялал жуулчлалын яам

Дэлхийн зургаан том марафоны нэг “Токио Марафон” өнөөдөр боллоо.

Тус марафоны эмэгтэйчүүдийн ангилалд Азийн аварга Г.Хишигсайхан 2:26:32 секундээр барианд орсноор наймдугаар байрт бичигдэж Монголын марафончдоос “Парис 2024” олимпын эрх авсан анхны тамирчин болсон юм.

Түүнчлэн эмэгтэй марафончдын улсын рекорд тогтоов.

Эмэгтэйчүүдийн ангилалд Этиопын Сутумэ Асефа Кебеде хувийн дээд амжилтаа шинэчилж 2:15:55 цагаар түрүүлэв. Харин эрэгтэйчүүдийн марафонд Кенийн Бенсон Кипруто 2:02:16 цагаар өнгөлөв.

Кенийн олимпын хошой аварга, нэрт гүйгч Элиод Кипчогэ нутаг нэгт Б.Кипрутогоос дөрвөн минутаар хоцорч 10 дугаар байрт жагслаа.

“ХӨХ СУВД-2024” хоёр дахь өдрөө үргэлжилж байна. Өвлийн аялал жуулчлалыг хөгжүүлэх зорилгоор 2000 оноос эхлэн зохион байгуулагдаж ирсэн энэхүү арга хэмжээ нь жил бүр хүрээгээ тэлсээр тогтмол зохион байгуулагддаг болсон юм.

Энэ жилийн баярын онцлог нь уламжлалаа шинэчлэлтэй хослуулж, мөсний үзүүлбэр үзүүлнэ гэдгийг албаныхан мэдээлсэн байдаг.

Өнгөрсөн жилийн хувьд 30-35 мянган дотоод, гадаадын жуулчин хүлээн авахаар төлөвлөж байсан бөгөөд үйл ажиллагаанд 200 гаруй төрийн болон хувийн хэвшлийн аж ахуйн нэгж оролцсон байдаг. Харин энэ жил урьдчилсан байдлаар дотоод, гадаадын 50 мянга гаруй жуулчид оролцож байна гэх урьдчилсан тоон мэдээлэл гарсан байна.

Хорих ял эдлээд суллагдсан хүмүүсийн нийгэм, эдийн засаг, соёлын эрхийн байдалд ХЭҮК үнэлгээ хийж, Монгол Улс дахь хүний эрх, эрх чөлөөний байдлын талаарх 23 дахь илтгэлд тусган Улсын Их Хуралд танилцуулахаар ажиллаж байна.

Энэхүү ажил нь иргэдийн аюулгүй, амар тайван амьдрах нөхцөлийг бүрдүүлэх, хорих ял эдлээд суллагдсан хүмүүсийг нийгэмшүүлэх, дахин гэмт хэрэг үйлдэхээс урьдчилан сэргийлэх, өнөөгийн нөхцөл байдал, тулгамдсан асуудлын талаар үнэлгээ хийх зорилготой.

Тус ажлын хүрээнд Хүний эрхийн Үндэсний комиссын ажлын хэсэг 2024 оны хоёрдугаар сарын 26-ны өдрөөс гуравдугаар сарын 1-ний өдрүүдэд Шүүхийн шийдвэр гүйцэтгэх ерөнхий газрын харьяа 407, 409, 419, 421, 437, 461 дүгээр хорих ангиудад “Хоригдлыг суллахад бэлтгэх хөтөлбөр”-ийн хэрэгжилтийг шалган, тулгамдсан асуудалтай танилцан дараах этгээдүүдээс судалгааны асуумж авч нөхцөл байдалд дүн шинжилгээ хийж байна.

Үүнд:

Анх удаа гэмт хэрэг үйлдэж хорих ялаар шийтгүүлсэн зан төлвийн ноцтой өөрчлөлтгүй хоригдол, тэдгээр хоригдлуудын шүүхийн шийтгэх тогтоолыг судалж дүн шинжилгээ хийх

Дахин гэмт хэрэг үйлдэж, хорих ялаар шийтгүүлсэн хоригдол

Хорихоос суллагдсан хяналтад байгаа этгээд, тэдний ар гэрийн гишүүд, баг, хорооны Нийгмийн ажилтан, Шүүхийн шийдвэр гүйцэтгэх байгууллагын албан хаагчид хамрагдлаа.

ШШГЕГ-ын харьяа хорих ангиудаас 2023 онд нийт 1633 хоригдол суллагдсан байна.

Нөхцөл байдлаас харахад, хорих ял эдлээд суллагдсан иргэд дахин гэмт хэрэг үйлдэж, ял эдэлж буй шалтгааны дийлэнх хувийг туслан дэмжих гэр бүлийн гишүүн байхгүй, орон гэргүй, очих газаргүй, согтууруулах ундааны хамаарал эзэлж байна.

Комисс дээрх ажлын хүрээнд Нийслэлийн Засаг даргын дэргэдэх Нийгмийн хамгааллын тусгай төвд ажиллан төвийн нөхцөл байдал, тулгамдсан асуудал, авч хэрэгжүүлэх арга хэмжээний талаар уулзалт, ярилцлага зохион байгуулж, тус төвөөс дэмжлэг, тусламж авч буй хорихоос суллагдсан хүмүүстэй ярилцлага хийлээ.

Нийгмийн хамгааллын тусгай төв нь Монгол Улсын Засгийн газрын 2003 оны 138 дугаар тогтоол, Нийслэлийн Засаг даргын 2003 оны 417 дугаар захирамжаар нийслэлийн хэмжээнд байгаа орон гэргүй, тэнэмэл амьдралтай иргэдийг бүртгэлжүүлэн, түр хоноглох байраар хангаж, нийгмийн халамжийн суурь үйлчилгээ үзүүлэх чиглэлээр байгуулагдсан тусгай статустай, төрийн үйлчилгээний байгууллага юм.

Өөрийн гэсэн гэр оронгүй, эрхэлсэн тодорхой ажилгүй, харж хандах хүнгүй, хорихоос суллагдсан, нийгмийн эмзэг бүлгийн иргэдийг нийгэмшүүлэх, тэднийг бие даасан амьдралд шилжихэд нь тусалж дэмжин бичиг баримтжуулах, эрүүл мэнд, сэтгэл зүй, сургалт, соёл хүмүүжлийн үйлчилгээ, хөдөлмөр эрхлэлтийг дэмжих, гэмт хэргээс урьдчилан сэргийлэх зэрэг 12 үйлчилгээ үзүүлдэг.

Тус төвөөр 2023 онд 525 хүн үйлчлүүлсний 30 хувь нь хорихоос суллагдсан бөгөөд хорихоос суллагдсан хүмүүсийг нийгэмшүүлэхэд Шүүхийн шийдвэр гүйцэтгэх байгууллагатай хамтран ажиллах зорилгоор албан бичиг хүргүүлсэн байна.