Month: November 2023

Өнөөдрийн Засгийн газрын хуралдаанаар дараах асуудлыг хэлэлцлээ.

Монгол Улсын 2024 оны төсвийн хөрөнгөөр төрийн худалдан авах ажиллагааны газраас хэрэгжүүлэх төсөл, арга хэмжээ, аймаг, нийслэлд эрх шилжүүлэн хэрэгжүүлэх төсөл, арга хэмжээ, Ерөнхий гэрээгээр худалдан авах бараа, үйлчилгээний жагсаалтыг Засгийн газрын өнөөдрийн хуралдаанаар баталлаа.

Төсөл, арга хэмжээ бүрийн техникийн тодорхойлолт, техник эдийн засгийн үндэслэл, зураг төсөл, ажлын даалгавар болон бусад шаардлагатай мэдээллийг төрийн худалдан авах ажиллагааны газар, аймаг, нийслэлийн Засаг даргын Тамгын газарт энэ оны арванхоёрдугаар сарын 1-ний дотор тус тус шилжүүлэхийг төсвийн ерөнхийлөн захирагч нарт даалгалаа.

Худалдан авах ажиллагааг Төрийн худалдан авах ажиллагааны цахим систем /www.tender.gov.mn/-ээр зохион байгуулж, худалдан авах ажиллагааны төлөвлөгөөнд тусгаж, тендерийн урилга, үр дүнг тухай бүр цахим системд нийтэлж байх, мөн хууль тогтоомжийн дагуу ашиг сонирхлын зөрчил, авлигаас ангид байх зарчмыг баримтлан шуурхай зохион байгуулж ажиллахыг үүрэг болголоо.
Монгол Улсын төсвийн хөрөнгөөр хэрэгжүүлэх төсөл, арга хэмжээний жагсаалтад 2024 онд шинээр 692 төсөл, арга хэмжээ тусгагдаад буй юм.
Тендер шалгаруулалтад оролцох эрхээ хязгаарлуулсан этгээдийн бүртгэлд хамруулах хяналт, шалгалтын дүнгийн талаар Сангийн сайд Б.Жавхлан тус хуралдаанд танилцуулж, 61 компанийг бүртгэлд нэмж оруулж байгааг мэдээллээ.

Төрөөс олгох урамшуулал авах эрх бүхий малчид, урамшууллаасаа ЭМД-ын шимтгэлээ нөхөн төлөх боломжтой.

Төрөөс олгох урамшуулалд хонь, тэмээний ноос бэлтгэж, үндэсний үйлдвэрт тушаасан малчин, мал бүхий этгээд, сүү боловсруулах үйлдвэр, цехэд техникийн зохицуулалтын шаардлагад нийцсэн малын түүхий сүү нийлүүлсэн малчин, эрчимжсэн мал аж ахуй эрхлэгч, Үндэсний боловсруулах үйлдвэрт арьс, шир, бэлтгэн тушаасан хоршооны гишүүн малчин, мал бүхий иргэд хамрагддаг.

Та ЭМД-ын шимтгэлээ хараахан төлж амжаагүй байгаа бол 2019 оноос хойших ЭМД-ын шимтгэлээ төрөөс олгох урамшууллаасаа нөхөн төлөөрэй.

Нийслэлийн Прокурорын газраас яллагдагч Д.Эрдэнэбат, Д.Доржханд, Б.Минжбадам, Д.Ганбат, Л.Санжаадорж, Б.Болор, Г.Ганзориг, Д.Батжавхлан, Р.Мөнхтуул, Б.Мөнхсоёл, Д.Эрэвгийлхам, Д.Сугар, Д.Энхтунгалаг, О.Орхон, Н.Батбаяр, Ц.Пүрэвтүвшин, Ч.Энхболд, Ц.Нанзаддорж, Э.Шижир, С.Уранчимэг нарын 20 хүн, Төмөр замын зураг төслийн институт ХХК, Кью Эс Си ХХК  нарын 2 хуулийн этгээдэд холбогдуулан яллах дүгнэлт үйлдэж хэргийг 2023 оны 10 дугаар сарын 12-ны өдөр Сүхбаатар дүүргийн Эрүүгийн хэргийн анхан шатны шүүхэд ирүүлсэн.

Тус эрүүгийн хэргийн урьдчилсан хэлэлцүүлгийн шүүх хуралдааныг 2023 оны 11 дүгээр сарын 21-ний өдрийн 09.00 цагт товлон зарласан боловч:

Яллагдагч Э.Шижир, С.Уранчимэг, Г.Ганзориг нарын өмгөөлөгч Н.Буянжаргал болон Кью Эс Си ХХК-ийн итгэмжлэгдсэн төлөөлөгч Н.Энхтэмүүлэн нар “…Шүүх хурал давхацсан тул шүүх хуралдааныг хойшлуулж өгнө үү…” гэх хүсэлт,

Яллагдагч Э.Шижирийн өмгөөлөгч Э.Хашчулуун, яллагдагч Д.Ганбатын өмгөөлөгч Ж.Тэгшмандал нар  “…Хэргийн материалтай танилцаж, хуралд бэлтгэх боломжоор хангаж өгнө үү…”гэх хүсэлтийг тус тус холбогдох баримтын хамт шүүхэд ирүүлжээ.

Шүүх хүсэлтийг хүлээн авч шүүх хуралдааныг 2023 оны 12 дугаар сарын 19-ний өдрийн 09.00 цаг хүртэлх хугацаагаар хойшлуулж шийдвэрлэлээ.

Эх сурвалж: Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн Тамгын газар

2023 оны дөрөвдүгээр улирлын төрийн албаны ерөнхий шалгалт өнөөдөр орон даяар эхэллээ.

Энэ удаагийн шалгалтад орон нутагт 3652, нийслэлд 1594 хүн бүртгүүлжээ. Шалгалт арваннэгдүгээр сарын 22-24-нд гурван өдрийн турш үргэлжлэх бөгөөд нийслэл дэх шалгалтыг Яармаг дахь Нийслэлийн нутгийн захиргааны цогцолборт зохион байгуулж байна.

Шалгалтыг нээж Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч О.Номинчимэг “Бүртгүүлсэн хүмүүсийн тооноос харахад төрийн албанд орох хүсэл сонирхол, эрмэлзэл их байгаа нь харагдаж байна. Өдгөө нийслэл Улаанбаатар хотын 1.6 сая иргэнд үйлчилгээ үзүүлдэг төрийн 600 гаруй байгууллагад 60 мянга орчим албан хаагч ажилладаг. Иймд иргэдийн төлөө гэсэн сэтгэлтэй, шударга зүтгэлтэй, ёс зүйтэй төрийн албан хаагч бол нийслэлийн баг бүрэлдэхүүний тулгуур багана юм. Төрийн алба тогтвортой, чадвартай, мэргэшсэн байснаар монгол төрийн бодлогын залгамж халааг, тогтвортой байдлыг хадгална. Энэ ч утгаараа төрийн албыг бэхжүүлэх тодорхой зорилт, стратегийг бодлогын баримт бичгүүдэд тусгасан билээ. Төрийн албаны ерөнхий шалгалт 2019 оноос хойш бүрэн цахимжсан. Ингэснээр бүх үйл явц техник технологийн шийдлийн дагуу, тухайн хүний мэдлэг чадварыг аливаа нөлөөгүй, хараат бусаар шалгах тогтолцоонд шилжсэн юм” хэмээлээ.

Монгол Улсын Төрийн албаны зөвлөлийн дарга, тэргүүн зэргийн түшмэл Б.Баатарзориг “Эл шалгалтыг улирал бүр авдаг болсон жишгийг тогтоосон нь энэ жилийн шалгалтын онцлог. Төрийн албаны ерөнхий шалгалтад тэнцэгчдийн хувь жилээс жилд өсөж байгаа. Шалгалтыг цахимжуулж эхэлж байхад нийт тэнцэлтийн хувь найм байсан бол мэргэжил аргазүйн зөвлөгөө өгч, бэлтгэл ажлыг орон даяар хийж эхэлснээр 40 хувьд хүрсэн. Үүнийг дагаад нөөцөд орсон иргэдийн төрийн албанд томилогдох хувь ч мөн өссөн үзүүлэлттэй байна. Тухайлбал, энэ оны байдлаар нөөцөд орсон иргэдийн 33 хувь нь төрийн албанд шинээр томилогдоод буй. Төрийн албанд орох иргэдийн хүсэл, сонирхол нэмэгдэж буй нь ажиллах нөхцөл сайжирч, цалин хангамж өсөн, хөдөө орон нутагт ажиллахад бүсийн болон орон нутгийн нэмэгдэл, орон сууц авах таатай нөхцөлийн эхлэл тавигдаж байгаатай холбоотой юм” гэв.

Төрийн албаны тухай хуульд оруулсан өөрчлөлтийн дагуу Төрийн албаны ерөнхий шалгалтыг жилд дөрвөн удаа буюу улиралд нэг удаа авахаар болсон. Ингэснээр төрийн албаны сул орон тоо илүү хурдан нөхөгдөж, шалгалт өгөхөөр хүлээж буй иргэдийн хүлээлтийн хугацаа богиносон, цаг хугацаа хэмнэх боломжтойг зохион байгуулагчид онцолж байсан юм.

“Зорчигч тээврийн нэгтгэл ОНӨААТҮГ-ын үйлчилдэг нийтийн тээврийн 33 чиглэлд дотоод хяналт шалгалт хийж байна.

Зорчигч тээврийн нэгтгэл ОНӨААТҮГ-ын захирлын 2023 оны “Ажил эрчимжүүлэх тухай” А/79 дүгээр тушаал болон “Нийтийн тээвэр. Ангилал ба үйлчилгээнд тавих. Ерөнхий шаардлага” MNS 5012:2021 улсын стандартын хэрэгжилтийг нийтийн зорчигч тээврийн 32 чиглэлд ажиллаж буй тус байгууллагын 227 тээврийн хэрэгсэл бүхий 400 гаруй жолооч нар иргэд, зорчигчдод ая тухтай, аюул, осолгүй, батлагдсан цагийн хуваарь, чиглэлийн дагуу соёлтой үйлчилгээг хэрхэн үзүүлж байгаад 2023 оны 11 дүгээр сарын 07-ны өдрөөс эхлэн үзлэг шалгалтыг хийж эхлээд байна.

Үзлэгээр нийтийн зорчигч тээврийн хэрэгслийн бүрэн, бүтэн байдал, угаалга, цэвэрлэгээ, жолоочийн дүрэмт хувцас өмссөн эсэх, гарын оролцоотой утсаар ярих, тамхи татах, зорчигчтой зүй бусаар харьцах зэрэг зөрчил, дутагдал гаргасан жолооч нарт байгууллагын дотоод дүрэм, журамд заасны дагуу холбогдох арга хэмжээг авч ажиллаж байна.

Зорчигч тээврийн үйлчилгээнд ажиллаж буй нийт жолооч нартаа иргэд, зорчигчдод цагийн хуваарийн дагуу аюул осолгүй, ая тухтай үйлчлэхийг уриалж байна гэж Зорчигч тээврийн нэгтгэлээс мэдээллээ.