Month: November 2023

Хан-Уул дүүргийн 14 дүгээр хороо, Өлзийтийн гудамжаас иргэн С нь шөнө дунд гэрээсээ гараад алга болсон тухай дуудлага мэдээлэл өчигдөр өдрийн 15:10 цагт ОБГ-т ирсэн байна.

Нийслэлийн Аврах ангийн алба хаагчид 25 км замыг туулан 16:09 цагт очиж иргэн С/38 настай, эрэгтэй, хөгжлийн бэрхшээлтэй, согтууруулах ундаа хэрэглэсэн/-г 16:15 цагаас эхлэн эрэн хайх ажиллагааг зохион байгуулан ажиллаж мөн өдрийн 16:44 цагт гэрээс нь зүүн зүгт нэг км зайд тус дүүргийн 14 дүгээр хороо, “Бугын-Ам” гэдэг газраас уулын бэлд цасанд дарагдсан байдалтай цогцсыг олж тус дүүргийн Цагдаагийн хоёрдугаар хэлтэст хүлээлгэн өгчээ.

Иймд хүйтний эрч эрс чангарч буй тул иргэд та бүхэн үүсэж болзошгүй аюулаас урьдчилан сэргийлж, архи согтууруулах ундааны зүйл хэрэглэсэн үедээ осгохоос сэргийлнэ үү.

БНХАУ-ын ӨМӨЗО-ны Шилийн гол аймагт багтах Эрээн хот нь Монгол, Хятадын хамгийн том хуурай замын боомт юм.

Тус хотод манай улсаас аялагчид, худалдаачид болоод оюутнууд байнга аялдаг. Үүнийг дагаад энэхүү хотын бага, дунд сургууль, цэцэрлэгүүдэд Монгол оюутан сурагчид цөөнгүй байдаг аж.

Тус хотын гуравдугаар дунд сургууль нь 1996 онд байгуулагдсан бөгөөд анх Монгол Улсаас таван сурагчийг элсүүлж байжээ.

Харин энэ оны есдүгээр сар гэхэд энэ тоо гурван ангид хүрч, нийт 124 хүүхэдтэй суралцдаг болжээ.

Иргэн Б Сүхбаатар дүүргийн нутаг дэвсгэр 3 дугаар сургуулийн урд замд энэ сарын 20-ны өдөр автомашинтай замын хөдөлгөөнд оролцох үедээ бусдын хөдөлгөөнд саад учруулж, түр зогсохыг хориглосон газар зогсжээ.

Улмаар иргэн шаардлага тавихад түүний өөдөөс салаавч өгөх зэргээр зүй бус үйлдэл гаргаж буй үйлдлийг олон нийтийн цахим сүлжээнд нийтэлсэн байна.

Иргэн Б-ийн Замын хөдөлгөөний дүрмийн 14 дүгээр бүлгийн 14.8 дахь заалтыг зөрчсөн үйлдэлд нь Зөрчлийн тухай хуулийн 14.7 дугаар зүйлийн 35.1 дэх хэсэгт зааснаар 20 нэгж буюу 20,000 төгрөг торгох арга хэмжээ авчээ.

Харин Сүхбаатар дүүргийн цагдаагийн газрын нэгдүгээр хэлтсээс зүй ёсны шаардлага тавьсан иргэнд салаавч гаргаж, нийтээр дагаж мөрдөхөөр тогтоосон хэм хэмжээг бүдүүлгээр зөрчин хэл амаар гутаан доромжилж танхайрсан гэх үйлдэлд Зөрчлийн хэрэг нээн шалгаж байна.

Эх сурвалж: ЦЕГ

Байгаль хамгаалагчдын II чуулган энэ сарын 25-нд Төрийн ордонд болно.

Эх орныхоо өнцөг булан бүрд жилийн 4 улиралд, 24 цагийн турш, хүрээлэн буй орчин, байгалиа хамгаалах ажилд сэтгэл зүтгэл гарган 1000 орчим байгаль хамгаалагч ажиллаж байна. Тэдний нийгмийн байдлыг сайжруулах, хууль эрхзүй орчныг бүрдүүлэх, техник технологийн дэвшлийг нэвтрүүлэх хүрээнд 2022-2023 онд бүх байгаль хамгаалагчдаа гэнэтийн ослын даатгалд хамруулж, ажиллах нөхцөл, нийгмийн баталгаа, сургалтын хөтөлбөрийг баталж, төрийн албаны тухай хуулийн шаардлагыг хангуулах ажлуудыг амжилттай хэрэгжүүлж эхэлсэн.

2022 онд зохион байгуулсан “Бид байгаль хамгаалагчид” үндэсний анхдугаар чуулганаас гарсан зөвлөмжийн хэрэгжилтийг дүгнэх, цаашдын хөгжлийн бодлогоо тодорхойлох, байгаль хамгаалах үйл ажиллагааг сайжруулах зорилгоор энэ удаагийн хоёрдугаар чуулганыг зохион байгуулна.

“Бид эх дэлхийн байгаль хамгаалагч”  үндэсний чуулган 11 дүгээр сарын 23-наас салбар хуралдаанаар эхэлнэ.

Нэгдүгээр салбар хуралдаан 2023.11.23-нд “Тусгай хамгаалалттай газар нутгийн бодлого, менежментийн аргачлал, шинэчлэл” сэдвийн хүрээнд,

Хоёрдугаар салбар хуралдаан 2023.11.24-нд “Олон улсад байгаль хамгаалагчдын талаар хэрэгжүүлж буй бодлого, арга хэмжээ” сэдвийн хүрээнд Цэнгэг усны нөөц, байгаль хамгаалах төвд тус тус болох бөгөөд Үндсэн хуралдаан, хэлэлцүүлэг 2023.11.25-нд “Байгаль хамгаалагчдын өнөөгийн байдал, тулгамдсан асуудал, цаашид хөгжлийн зорилт” сэдвийн хүрээнд Төрийн ордонд болно.

Нийслэлийн Засаг даргын орлогч П.Сайнзориг, О.Номинчимэг нар хот нийтийн аж ахуйн зарим чиг үүргийг ирэх оны нэгдүгээр сарын 1-нээс дүүргүүдэд шилжүүлэн хуваарилах асуудлаар есөн дүүргийн удирдлагуудтай уулзлаа.

УБЗАА нь холбогдох хууль тогтоомжийн хүрээнд нийслэлийн ногоон байгууламжийн арчилгаа, нийтийн эзэмшлийн гудамж, талбайн гэрэлтүүлгийн засвар, нийтийн эзэмшлийн эд хөрөнгийн арчлалт, зам талбайн цэвэрлэгээ, үйлчилгээ, согтууруулах ундаа худалдах, түүгээр үйлчилгээ эрхлэх харилцааг зохицуулдаг.

Эдгээрээс есөн чиг үүргийг дүүргүүдэд шилжүүлэхээр боллоо. Тодруулбал,

1. Ногоон байгууламжийн арчилгаа
2. Нийтийн эзэмшлийн гудамж талбайн гэрэлтүүлгийн засвар арчлалт
3. Нийтийн эзэмшлийн эд хөрөнгийн арчлалт /сандал, хогийн сав, хөшөө, дурсгал, усан оргилуур, нийтийн бие засах газар/
4. Гадна зар сурталчилгаа
5. Нийтийн эзэмшлийн талбай /тоглоомын талбай, спорт талбай, бичил цэцэрлэгт хүрээлэн/
6. Нохой муур устгалын үйл ажиллагаа
7. Нийтийн эзэмшлийн зам талбайн цэвэрлэгээ, үйлчилгээ
8. Согтууруулах ундаа худалдах, түүгээр үйлчилгээ эрхлэх
9. Мөнгөн зээлийн үйл ажиллагаа эрхлэх зөвшөөрөл олгох эрхийг дүүргүүдэд шилжүүлэх юм.

Хот тохижилтын газар ОНӨААТҮГ-ын хувьд төвийн зургаан дүүргийн гол 97 гудамж, алслагдсан зам талбайн 143.9 км зам буюу 2,483,229 ам метр талбайн цэвэрлэгээ, үйлчилгээг хариуцан ажилладаг. Эдгээрийг төвийн зургаан дүүрэгт шилжүүлэх бөгөөд Баянгол дүүрэгт 12 км, Чингэлтэй дүүрэгт 7.5 км, Баянзүрх дүүрэгт 41.6 км, Сонгинохайрхан дүүрэгт 14.2 км, Хан-Уул дүүрэгт 42.2 км, Сүхбаатар дүүрэгт 25.6 км замын цэвэрлэгээг хариуцуулахаар төлөвлөжээ. Харин Хот тохижилтын газрын хувьд төвлөрсөн гурван хогийн цэг болон Алтан-Өлгий дэх оршуулгын газрын үйл ажиллагаа, Сүхбаатарын талбай зэрэг хотын томоохон гол гудамж, талбайн цэвэрлэгээ, үйлчилгээг үргэлжлүүлэн хариуцах юм.

Улаанбаатар хотын ерөнхий менежер бөгөөд Захирагчийн ажлын албаны дарга М.Баяраа:

-УБЗАА Хот тохижилтын газраас гадна 16 компанитай хамтран ажилладаг. Бид жил бүр гүйцэтгэлийг дүгнэдэг бөгөөд дүүргүүд шаардлага хангасан компанитай гэрээгээ сунган хамтран ажиллах эсвэл шинээр сонгон шалгаруулалт зарлах боломжтой.  Мөн шаардлага хангаагүй аж ахуйн нэгжийн гэрээг цуцлах эрхийг дүүргүүдэд шилжүүлж байна. Дүүргүүд мөн орон нутгийн өмчит аж ахуйн нэгжүүддээ уг ажлаа хариуцуулах боломжтой. Шинээр тоног төхөөрөмж худалдаж авах бөгөөд өмнө нь ашиглаж байсан техник хэрэгслүүдээ дүүргүүдэд хуваарилсан замын хэмжээнд тааруулан олгоно. Эзэнгүй нохой, муурын хувьд 5-6 жилийн өмнө энэ тоо 360 мянгад хүрч байсан. Өдгөө 160 мянга орчим эзэнгүй нохой муур байна. Энэ хэмжээг дахин нэмэгдүүлж болохгүй. Аль болох хүнлэг, энэрэнгүй байдлаар эзэнгүй нохой, муурын тоог хязгаарлахын тулд үржил хязгаарлах ажилбар хийх хэрэгтэй.

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг:

-Бүтэц, албан тушаалын тодорхойлолтод анхаарах шаардлагатай байна. Дүүргийн Засаг дарга, орлогч нар өөрсдөө хот, нийтийн аж ахуйн ажлаа хариуцах уу, эсвэл бие даасан менежерийн албан тушаал гаргах уу гэдгээ шийдэх хэрэгтэй. Ер нь бие даасан, хот, нийтийн аж ахуйн ажлыг хариуцах менежерийг томилж, УБЗАА-тай уялдан ажиллавал тохиромжтой гэж үзэж байна. Цэвэрлэгээний давтамжийг нэмж, тарифыг өсгөнө. Ингэснээр аж ахуйн нэгжүүд тоног төхөөрөмжөө сайжруулж, тохижилт, үйлчилгээний ажилчдын цалин хөлсийг нэмэгдүүлэх боломж бүрдэнэ. Дүүргүүд хувийн хэвшлүүдтэй гэрээ байгуулахдаа энэ талаар тодорхой тусгаж, гэрээний хугацааг 3-5 жилээр тогтоох ёстой. Нэг жилийн гэрээтэй компани хөрөнгө оруулалт хийж, хүний нөөцөө ч тогтоож чадахгүй гэдгийг анхаараарай. Мөн ирэх жилийн төсвөөс камержуулалтыг сайжруулна. Камерын хяналтын тусламжтайгаар цэвэрлэгээ, үйлчилгээ нь дутуу орхигдож буй байршил, халтиргаа гулгаатай зам талбайг тогтоон, мэдээлэл солилцох боломж үүснэ гэв.