Month: October 2023

Шүүхийн шийдвэр гүйцэтгэх ерөнхий газрын харьяа 407 дугаар нээлттэй, хаалттай хорих анги алба хаагчид болон хүмүүжигчдийн орчин нөхцөлийг сайжруулах зорилгоор засвар, шинэчлэлийн ажлыг хийжээ.

Ингэхдээ эрүүл ахуй, ариун цэврийн шаардлагад нийцүүлэн эмэгтэй хүмүүжигчдийн хувцас угаалга, хатаалга, халуун усны өрөө зэргийг шинэчилж, хэрэгцээт техник, тоног төхөөрөмжийг суурилуулснаас гадна нярай хүүхэдтэй хүмүүжигчдийн байр, удаан хугацааны эргэлт, уулзалтын байрыг засварлан тохижуулсан байна.

Түүнчлэн алба хаагчдын хувцас солих болон хүүхдийн өдөр өнжүүлэх өрөө, үсчин, гоо сайхны өрөөг шинэчлэн засварлаж, ая тухтай орчин нөхцөлд ажиллах, хүмүүжигчдийн болон хүүхдүүдийн эрхийг хангахад чухал нөлөө үзүүлэх юм.

Швейцарын хамтын ажиллагааны газрын санхүүжилтээр засварын ажлыг хийлээ хэмээн ШШГЕГ-аас мэдээллээ.

Өнөөдөр буюу 2023 оны аравдугаар сарын 6-нд Хөвсгөл аймгийн Цэцэрлэг сумын төвөөс хойд зүгт 58 км зайд газар хөдөллөө.

Улаанбаатарын цагаар 10:17:31 цагт болсон газар хөдлөлтийн хүч 4.1 магнитуд байжээ.

Авлигатай тэмцэх газарт иргэдээс ирүүлсэн “Нийслэл хотын товчоо постын гадна амьдарч байгаа иргэдийн тээврийн хэрэгслээс товчооны камер орж, гарах болгонд төлбөр авч байгаа нь зүйд нийцэхгүй” гэх гомдлын мөрөөр тус газрын Урьдчилан сэргийлэх, соён гэгээрүүлэх хэлтсээс Зам тээврийн хөгжлийн төвийн албан тушаалтнуудтай уулзав.

Нийслэлийн хотын хүрээнээс гадна ажиллаж, амьдарч байгаа буюу Хан-Уул дүүргийн 14 хорооны 6076 иргэн, 47 аж ахуйн нэгж, байгууллагын тээврийн хэрэгсэл, Сонгинохайрхан дүүргийн 32 дугаар хорооны 5275 иргэн, 287 аж ахуйн нэгж, байгууллагын тээврийн хэрэгсэл, Налайх дүүргийн 39579 иргэн, 1984 аж ахуйн нэгж, байгууллагын тээврийн хэрэгслүүд өдөр бүр товчоогоор нэвтрэхдээ цахим төлбөр төлдөг байна.

Авлигатай тэмцэх газраас нийслэлийн хотын хүрээнээс гадна ажиллаж, амьдарч байгаа иргэдийн тээврийн хэрэгслийг “Цагаан жагсаалт”-д оруулах талаар албан бичиг илгээснээр “Олон улс, улсын чанартай болон тусгай зориулалтын авто зам, замын байгууламж ашигласны төлбөр авах журам”-д өөрчлөлт оруулж, дээрх 3 дүүргийн нутаг дэвсгэр дэх автомашины постын гадна амьдарч буй иргэдээс төлбөр авахгүй байх зохицуулалтыг тусгуулж, хэрэгжилтийг хангахаар болов.

Журмыг хэрэгжүүлж эхэлсэнтэй холбогдуулан иргэдэд мэдээлж сурталчлах ажлыг зохион байгуулж байна.

Боловсрол, шинжлэх ухааны яам, Боловсролын ерөнхий газар Британийн кембридж байгууллагатай хамтран ажиллах гэрээг баталгаажууллаа.

Тус гэрээ нь таван зорилтот бүлэгтэй ба энэхүү гэрээг хэрэгжүүлэхээр Боловсролын ерөнхий газар, Боловсролын үнэлгээний төв, Боловсролын судалгааны үндэсний хүрээлэн, Монгол улсын боловсролын их сургууль хамтран ажиллах юм.
Мөн энэ хүрээнд Монгол улсын Боловсролын шинэчлэгдсэн хуульд тусгагдсан 6 багц шинэчлэлд нийцсэн нэгдсэн платформыг бүрдүүлэх тал дээр хамтран ажиллахаар боллоо. Энэхүү 6 шинэчлэлээр хот ба хөдөөгийн, хувийн болон төрийн сургуулийн ялгааг арилгана.

• Хөтөлбөр
• Багшийн Хөгжил.
• Үр дүнд суурилсан санхүүжилт
• Үнэлгээ
• Сургуулийн менежмент
• Цахим шилжилт

Энэ 6 шинэчлэлийг хийж чадвал “Хамгийн сайн сургууль гэрт ойрхон сургууль” болно.

Монгол Улсын Ерөнхий сайдын ивээл дор зохион байгуулагдаж буй “Мал аж ахуйн сэргэлт” залуу малчдын үндэсний чуулганд 800 орчим малчин оролцож байна.

Манай улсын ажил эрхэлдэг дөрвөн хүн тутмын нэг нь буюу 305.1 мянган малчин мал аж ахуйн үйлдвэрлэлд ажиллаж байна.

Хүнс, хөдөө аж ахуй, хөнгөн үйлдвэрийн салбар нь Монгол Улсын дотоодын нийт бүтээгдэхүүний 13.1 хувь, ажиллах хүчний 55.8 хувь, импортын 5.4 хувь, экспортын орлогын 6.0 хувийг бүрдүүлж байна.

Монгол Улсын Их Хурлаас баталсан “Малын генетик нөөцийн тухай” хууль, “Мал, амьтны эрүүл мэндийн тухай”, “Жижиг, дунд үйлдвэр, үйлчилгээг дэмжих тухай”, “Хөдөлмөрийн тухай”, “Хөдөлмөр эрхлэлтийг дэмжих тухай” хуулиудад малчдын зарим эрх, үүргийг шинээр тодорхойлсон. Тухайлбал Хөдөлмөрийн тухай хуулийн 71 дүгээр зүйлд Туслах малчин, гэрийн үйлчилгээний ажилтан, тэдгээртэй адилтгах ажилтантай байгуулах хөдөлмөрийн гэрээний онцлогийг тодорхой тусгасан байна.

Монгол улсын засгийн газрын 2020 оны 34 дүгээр тогтоолоор батлагдсан “Монгол малчин үндэсний” хөтөлбөр нь төрөөс малчдыг дэмжих, малчдын идэвх санаачилга, хувь нэмэр, оролцоог сайжруулах, малчдыг чадавхижуулах, тэдгээрийн хөгжлийн тулгамдсан зарим асуудлуудыг шийдвэрлэх, малчдыг мэдээллээр хангах, хөгжүүлэх, орон нутагтаа ая тухтай ажиллах, амьдрах нөхцөл, нийгмийн баталгааг сайжруулах, бүтээмж, орлого, ашгийг нь өсгөхөд чиглэгдсэн суурь хөтөлбөр юм.

Хүнс, хөдөө аж ахуй, хөнгөн үйлдвэрийн яам, Хөдөлмөр, нийгмийн хамгааллын яам, Монголын Ажил олгогч эздийн нэгдсэн холбоотой хамтран “Ажил олгогч” нь туслах малчинтай “Хөдөлмөрийн гэрээ байгуулах” загварыг боловсруулж хэрэгжүүлсэн нь малчдын залуу халааг бэлтгэх хууль, эрх зүйн бодит боломжийг бүрдүүлсэн.

Түүнчлэн ажил олгогч болон гэрээт малчдын хоорондын хөдөлмөрийн харилцаанд үүсэж буй хүндрэл бэрхшээл, зөрчлийг шийдэх, гэрээт малчин өрх болон цөөн тоотой залуу малчин өрхийг малжуулах хөтөлбөрт хамруулах ажил орон нутагт хэрэгжиж байна.

Залуу малчдын үндэсний нэгдсэн чуулган салбар хуралдаан хэлэлцүүлгээр үргэлжлэнэ. Мал аж ахуйн салбарын 800 орчим төлөөлөгч тулгамдаж буй асуудал, өөрсдийн туршлагаа хуваалцан “Морьтны өв соёл – уламжлал, шинэчлэл”, “Хариуцлагатай малчин ба дэлхийн зах зээлийн боломжууд”, “Мал аж ахуйн салбар дахь инновац хөгжүүлэлт” сэдвүүдээр хэлэлцүүлэг өрнүүлэх юм.

Эх сурвалж: ХХААХҮЯ