Month: October 2023

БНСУ-д суугаа Монгол Улсын ЭСЯ-ны дипломат ажилтан согтуугаар жолоо барьж яваад цагдаад баригджээ​. Тодруулбал, өчигдөр буюу энэ сарын 10-ны 09.00 цагийн орчим Гимпо чиглэлд Олимпийн өргөн чөлөөнд нэгэн машин үе үе хурдаа нэмж, гэнэт тооромслох зэрэг үйлдэл гаргаж байсан тул ойр орчмын жолооч нар цагдаад мэдэгдсэн байна.

Цагдаагийн ажилтан машиныг зогсоож шалгахад Монгол Улсын ЭСЯ-ны ажилтан байсан бөгөөд согтолтын зэргийг тодорхойлох гэсэн боловч дипломат ажилтны халдашгүй байдал хэмээн татгалзсан талаар тус улсын хэвлэлүүдээр мэдээлжээ.

Мөн мэдээлэлдээ согтууруулах ундаа үнэртэж, согтуу байгаа нь илэрхий байсан бөгөөд хамт ажилдаг Монгол Улсын ЭСЯ-ны ажилтан ирж авч явсан гэсэн байна.

Харин энэ талаар ГХЯ-наас тодруулахад “Одоогоор ямар нэгэн мэдээлэл ирээгүй. Тодруулахаар ажиллаж байна” гэжээ.

МДҮЗ-ийн 2023 оны 8 дугаар тогтоолын хүрээнд амбулаторийн үзлэг оношилгоо, шинжилгээний багцад хамаарах 212 шинжилгээг эрүүл мэндийн даатгалын сангаас 100 хувь хариуцан төлөхөөр зохицуулсан байдаг.

Иргэд дараах оношилгоо, шинжилгээг эмчийн заалтаар ЭМДЕГ-тай гэрээтэй улсын болон хувийн хэвшлийн аль ч эрүүл мэндийн байгууллагад хийлгэсэн тохиолдолд огт төлбөр төлөхгүй.

Та доорх QR кодыг уншуулж оношилгоо, шинжилгээний жагсаалтыг харна уу.

Засгийн газрын өнөөдөр /2023.10.11/-ийн хуралдаанаар ХЗДХ-ийн сайд Б.Энхбаяр согтуугаар тээврийн хэрэгсэл жолоодож буй хэрэгтэй холбогдуулж, дараах заалтуудад өөрчлөлт, нэмэлт оруулахаар бэлдсэн гэв.

Энэ талаар тэрбээр “Жолооч согтуурсан мансуурсан үедээ тээврийн хэрэгсэл жолоодсон, эсхүл шалгуулахаас зайлсхийсэн үйлдлийг зөрчилд тооцдог байсныг гэмт хэрэгт тооцно.

• Тээврийн хэрэгслийг жолоодох эрхийг 1-3 жил хүртэлх хугацаагаар хасаж, 450 мянгаас 2.7 сая нэгжээр торгох, эсхүл
• 240-720 цаг нийтэд тустай ажил хийлгэх, эсхүл
• 6 сараас 1 жил хүртэлх хугацаагаар зорчих эрх хязгаарлах, эсхүл
• 6 сараас 1 жил хүртэлх хугацаагаар хорих ял шийтгэнэ.

Дээрх гэмт хэргийг дахин үйлдсэн үйлдлийг хүндрүүлэх бүрэлдэхүүнд тооцно.

Тээврийн хэрэгслийг жолоодохдоо согтуурсан, мансуурсан үедээ хүний эрүүл мэндэд хүндэвтэр 3-5, хүнд 5-8, хүний амь насыг хохироосон үед бүх насаар нь жолоодох эрхийг хасна.

2017-2023 оны байдлаар,

• Согтуугаар тээврийн хэрэгсэл жолоодсон нийт 252,838 зөрчил
• Жилд дунджаар согтуугаар тээврийн хэрэгсэл жолоодсон 36,120 зөрчил
• Согтуурсан үедээ тээврийн хэрэгсэл жолоодсоны улмаас жил бүр дунджаар 110 хүн зам тээврийн ослоор нас барж байна.

2023 оны эхний найман сарын байдлаар,

• Нийт 15,094 зам тээврийн осол, хэрэг бүртгэгдсэний 83.2 хувь нь нийслэл, 16.8 хувь нь орон нутагт бүртгэгдсэн
• Согтуугаар тээврийн хэрэгсэл жолоодсон нийт 33,723 зөрчил гарсан.
• Согтуугаар үйлдэгдсэн зам тээврийн ослын улмаас 50 хүний амь нас хохирсон байна. Энэ нь өмнөх жилээс хоёр дахин буурсан үзүүлэлт юм.
• Зам тээврийн осолд 529 хүүхэд хохирогч болж, 37 хүүхэд нас барсан

Согтуугаар үйлдэгдэж байгаа гэмт хэргийн тоо 15 хувиар буурсан. Үүний шалтгаан нь 2022 оны найман сарын байдлаар улсын архины борлуулалт 1.3 сая литрээр буурсан байна” гэв.

Үргэлжлүүлэн тэрбээр “Замын хөдөлгөөний дүрэмд торгууль төлөхгүй явж буй тохиолдол их байна. Зөрчил үйлдсэн хүн, хуулийн этгээд нь шүүх, эрх бүхий албан тушаалтнаас оногдуулсан торгох шийтгэлийг тогтоосон хугацаанд биелүүлсэн бол шийтгэлийг 50 хувиар хөнгөрүүлнэ. Торгуулиа төлөхгүй бол шийтгэлийн торгууль нэмэгдэнэ. Нэг жилийн дотор торгуулиа төлөх ёстой бөгөөд ингэхдээ итгэлцүүрээр нэмэгдэнэ. Хамгийн дээд талын хугацаа нь торгуулийн дүнгийн 50 хүртэлх хувиар торгууль нэмэгдэнэ. Хэрэв ингээд ч төлөхгүй бол дараах 7 хязгаарлалтыг хийнэ.

1. Тээврийн хэрэгслийн техникийн үзлэг, оношилгоонд оруулах
2. Тээврийн хэрэгслийн эзэмшлийн шилжилт хөдөлгөөн хийх
3. Жолоодох эрхийн үнэмлэх олгох, сунгах, ангилал нэмэх, өөрчлөх
4. Тусгай зөвшөөрөл, зөвшөөрөл олгох, сунгах
5. Тендер шалгаруулалтад оролцох
6. Төрийн жинхэнэ албаны шалгалт өгөх
7. Үндэсний гадаад пасспорт олгох зэргийг хязгаарлана” гэлээ.

Эрчим хүчний үйлдвэр, компаниудын 2023-2024 оны өвөлжилтийн бэлтгэл хангах ажлын явцын талаар Эрчим хүчний сайд Б.Чойжилсүрэн Засгийн газрын хуралдаанд танилцууллаа. Эрчим хүчний салбарын өвөлжилтийн бэлтгэл хангах ажлыг эрчимжүүлэн, төлөвлөсөн хугацаанд хэрэгжүүлэхийг сайдад даалгалаа.
Тус салбарын хэмжээнд өвөлжилтийн бэлтгэл 85 хувьтай байна.
Өнөөдрийн байдлаар дулааны цахилгаан станцууд, дулааны станцууд 526.4 мян.тн нүүрсний, 1,569 тонн мазутын нөөцтэй байна.
Баруун үйлдвэрийн дөрвөн шугам, Төвийн үйлдвэрийн хоёр шугам, Зүүн үйлдвэрийн дөрвөн шугам ажиллаж хоногт дунджаар 2,300 тонн сайжруулсан шахмал түлш үйлдвэрлэж, сайжруулсан шахмал түлшний нөөц 118,234 тн, мидлингийн нөөц 175,006 тн, барьцалдуулагчийн нөөц 730 тн, шуудайны нөөц 383.1 сая ширхэг байна.
2023 оны 09 дүгээр сарын 16-ны өдрөөс 2024 оны 05 дугаар сарын 15-ны өдрийг дуустал өвлийн горимыг мөрдөн ажиллана. 2023-2024 оны өвлийн оргил ачаалал 1567 МВт хүрэх таацтай байна.
Төвийн эрчим хүчний нэгдсэн системийн эх үүсвэрүүд бүрэн чадлаараа ажиллах бөгөөд аль нэг тоноглолд гэмтэл, саатал гарсан тохиолдолд цахилгаан эрчим хүчээр хязгаарлах нөхцөл байдал үүснэ.
‎‎            Улсын хэмжээнд 2023 оны эхний найман сарын гүйцэтгэлээр цахилгаан эрчим хүчний хэрэглээ боловсруулалтаар 7,011.6 сая кВт.цаг байгаа нь өмнөх оны гүйцэтгэлтэй харьцуулахад 422.9 сая кВт.цаг буюу 6.4 хувиар өссөн байна.

Товч мэдээ
·      Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрыг Хүүхэд, гэр бүлийн хөгжил, хамгааллын ерөнхий газар болгон өөрчиллөө.
·      Бүгд Найрамдах Ардчилсан Лаос Ард Улсын Үндэсний Ассамблейн дарга Сайсумпон Фумвиханы манай улсад 2023 оны есдүгээр сард хийсэн албан ёсны айлчлалын дүнг хэлэлцээд Үндэсний аюулгүй байдлын зөвлөлд оруулахыг Гадаад харилцааны сайд Б.Батцэцэгт даалгав.
·       Бүгд Найрамдах Хятад Ард Улсын Засгийн газраас Монгол Улсын Засгийн газарт олгох нэг тэрбум ам.долларын хөнгөлөлттэй зээлийг ашиглах тухай Монгол Улсын Сангийн яам, Бүгд Найрамдах Хятад Ард Улсын Экспорт-Импорт банк хооронд байгуулсан зээлийн ерөнхий хэлэлцээрийн хүрээнд хэрэгжүүлэх “Эрдэнэбүрэнгийн усан цахилгаан станц барих” төслийн Тусгайлсан зээлийн хэлэлцээрийн төслийг хэлэлцэн дэмжиж, уг хэлэлцээрт гарын үсэг зурах эрх олгох тухай Ерөнхий сайдын захирамж гаргахаар тогтлоо.

Хүүхэд хамгааллын тухай хуулийн шинэчилсэн найруулгын тухай хуулийн төслийг хэлэлцээд УИХ-д өргөн мэдүүлэхээр тогтлоо.

Төслийн шинэчлэлээр,
-Төрийн байгууллагын бүтэц, чиг үүрэг бүх түвшинд тодорхой болж, хүүхэд хамгааллын тогтолцоо бэхэжнэ.
– Хүүхэд хамгаалалд зориулсан төсвийн зөв хуваарилалт хийж, хүүхэд бүрд үзүүлэх үйлчилгээг санхүүжүүлэх боломж бүрдэж, хүүхэд хамгаалалд зориулсан төсвийн үр ашиг, өгөөж сайжирна.
– Хүүхдийн эрхийн хууль зүйн хорооны үйл ажиллагаа тогтмолжино.
– Сум, хороонд хүүхэд, гэр бүлийн нийгмийн ажилтантай болсноор хууль тогтоомжийн хэрэгжилт анхан шатанд сайжирч, хүүхэд хамгааллын үйлчилгээний хүртээмж нэмэгдэнэ.
-Салбар бүр хүүхдийн хөгжил, хамгааллын бодлого хэрэгжүүлэх төсвийг төлөвлөн батлуулж, хэрэгжүүлнэ.
-Сургалтын орчин, дотуур байранд үе тэнгийн дээрэлхэлт гарахаас урьдчилан сэргийлэх, гарсан тохиолдолд түүнийг таслан зогсоох, шийдвэрлэх эрх зүйн орчин бүрдэнэ.
–  Цахим орчинд хүүхдийн эрхийг хамгаалах салбар дундын зохицуулалт бүхий бүтэц ажиллаж, интернэт үйлдвэрлэл, үйлчилгээ эрхлэгчдийн үүрэг хариуцлага сайжирна.
– Гамшиг, онцгой нөхцөл байдлын үе дэх хүүхэд хамгааллын зохицуулалт тодорхой болно.
– Хэрэг хянан шийдвэрлэх ажиллагаанд хүүхдийн эрх, оролцоог хангах эрх зүйн орчин бүрдэнэ.
– Хүүхдэд хүргэх хүүхэд хамгааллын үйлчилгээ нэр, төрөл тодорхой болж, тэдгээрийг хүргэх зохицуулалт тодорхой болж хүүхэд хамгааллын үйлчилгээний чанар, хүртээмж дээшилнэ.

-хамгааллын  үйлчилгээг цаг алдалгүй, үр дүнтэй хүргэх, хүүхдийн сайн сайхан байдлыг дэмжих, үр дүнг үнэлэх, хянах механизм сайжирна гэж үзэж байна.