Month: October 2023

Categories
мэдээ цаг-үе эдийн-засаг

Oрон сууцны үнэ 9.3 хувиар өсчээ DNN.mn

Улаанбаатар хотын орон сууцны үнэ 2023 оны 9 дүгээр сард өмнөх оны мөн үеэс 9.3 хувиар, өмнөх сараас 1.9 хувиар тус тус өсжээ.

-Шинэ орон сууцны 1 м.кв талбайн дундаж үнэ – 3.85 сая төгрөг,
-Хуучин орон сууцны 1 м.кв талбайн дундаж үнэ -3.44 сая төгрөг байна.

Шинэ орон сууцны үнэ 1 м.кв талбайн дундаж үнэ Хан-Уул дүүрэгт хамгийн өндөр буюу 4.12 сая төгрөг байгаа бол хуучин орон сууцны хувьд Чингэлтэй дүүрэгт хамгийн өндөр буюу 4.21 сая төгрөг байна гэж Үндэсний Статистикийн Хорооноос мэдээллээ.

Categories
мэдээ нийгэм

АТГ: Ашиг сонирхлын зөрчлөөс урьдчилан сэргийлэх үүргээ хангалтгүй хэрэгжүүлж байна DNN.mn

Авлигатай тэмцэх газраас хуульд заасан чиг үүргийн хүрээнд нийтийн албанд томилогдохоор нэр дэвшсэн этгээдийн хувийн ашиг сонирхлын урьдчилсан мэдүүлгийг хянан үзэж тухайн албан үүргийг хэрэгжүүлэхэд ашиг сонирхлын зөрчил үүсэх эсэх, цаашид хуульд заасан хориглолт, хязгаарлалтыг баримтлан ажиллах талаар анхааруулж авлига, ашиг сонирхлын зөрчлөөс урьдчилан сэргийлэх чиглэлээр хяналт тавин ажиллаж байна.

Монгол Улсын Засгийн газраас 2023-2024 оныг “Авлигатай тэмцэх жил” болгон зарлаж нийтийн албан тушаалтны үүрэг, хариуцлагыг дээшлүүлэх, иргэд олон нийтийн хяналт оролцоог сайжруулах чиглэлээр олон төрлийн ажлуудыг үе шаттайгаар зохион байгуулж ажиллахаас гадна Авлигын эсрэг хууль тогтоомжид орсон, удирдах албан тушаалтны хариуцлагыг чангатгах, зөрчил гаргасан тохиолдолд хүлээлгэх хариуцлагын талаарх өөрчлөлтийн хэрэгжилтийг хангуулахаар тодорхой хяналт шалгалтын ажлуудыг хийж байна.

Монгол Улсын Их Хурлаас 2023 оны 07 дугаар сарын 07-ны өдөр Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлтийг оруулж, нийтийн албанд томилогдохоор нэр дэвшсэн этгээдийн ХАСУМ-ийг Авлигатай тэмцэх газраар хянуулаагүй шууд томилсон тохиолдолд томилсон эрх бүхий албан тушаалтан буюу байгууллагын удирдлагад нь “хариуцлага тооцох” эрх зүйн зохицуулалтыг бий болгосон.

Хууль хэрэгжиж эхэлснээс хойш зарим байгууллагын удирдах албан тушаалтан нь хуульд заасан авлига, ашиг сонирхлын зөрчлөөс урьдчилан сэргийлэх үүргийг хэрэгжүүлэхгүйгээр нэр дэвшигчийг тухайн албан тушаалд шууд томилдог, томилсны дараа мэдүүлгийг хянуулахаар ирүүлдэг зөрчил гарсаар байгаа бөгөөд Авлигатай тэмцэх газраас  зөрчил гаргасан нэр бүхий удирдах албан тушаалтнуудад хариуцлага тооцуулахаар Баянхонгор аймгийн Засаг дарга, Шүүхийн ерөнхий зөвлөлийн гүйцэтгэх нарийн бичгийн дарга, Хөвсгөл аймгийн Боловсрол шинжлэх ухааны газрын дарга нарт албан бичгийг хүргүүлээд байна.

Цаашид нийтийн албан тушаалд томилогдохоор нэр дэвшсэн этгээдийн ХАСУМ-ийг хянуулж, дүгнэлт гарсны дараагаар нийтийн албанд томилох, хэрэв ашиг сонирхлын зөрчилтэй этгээдийг нийтийн албанд томилсон, мэдүүлгийг хянуулаагүй томилсон зэрэг зөрчил гаргасан байгууллагын удирдлага, эрх бүхий албан тушаалтан нарт тухай бүрт зохих  хариуцлагыг  тооцож хуулийн хэрэгжилтийг хангуулан ажиллах болно.

Categories
мэдээ спорт

2028 оны Олимпийн хөтөлбөрт спортын таван төрлийг нэмлээ DNN.mn

Лос-Анжелес хотноо 2028 онд явагдах олимпийн тоглолтод флаг-футбол, крикет, лакросс, сквош, бейсбол зэрэг таван төрлийг шинээр нэмэхээр Олон улсын олимпын хорооны гүйцэтгэх хороо шийдвэрлэлээ.

“Санал болгож байгаа таван төрөл нь Америкийн спортын соёлд бүрэн нийцнэ. Эдгээрийг хөтөлбөрт оруулж байгаа нь олимпийн хөдөлгөөнийг АНУ болон дэлхийн шинэ нийгэмлэгтэй хамтран ажиллах боломжийг олгож байна. Үүнтэй зэрэгцээд олон улсын спортын төрлүүд АНУ-д очно” хэмээн ОУОХ-ны ерөнхийлөгч Томас Бах хэллээ.

Өнгөрсөн оны хоёрдугаар сард ОУОХ  Лос-Анжелесийн 2028 оны олимпийн урьдчилсан хөтөлбөрт спортын 28 төрлийг оруулжээ.

Categories
мэдээ нийгэм

Дагавар охиноо хүчирхийлэхийг завдсан 33 настай Э-гийн хэргийг прокурорт шилжүүлжээ DNN.mn

Хэнтий аймагт 33 настай, эрэгтэй “Э” гэгч насанд хүрээгүй дагавар охиноо хүчиндэхийг завдсан хэрэг энэ оны наймдугаар сарын 31-ний өдөр гарчээ.

Цагдаагийн байгууллага өнгөрсөн долоо хоногт буюу 2023 оны 10 дугаар сарын 09-ноос 13-ны өдрүүдэд 33.166 хэрэгт мөрдөн шалгах ажиллагаа явуулж, “Шүүхэд шилжүүлэх саналтай” Прокурорын байгууллагад 369 хэргийг хүргүүлжээ.

Мөн Зөрчлийн тухай хууль зөрчсөн давхардсан тоогоор 79.770 хүн, хуулийн этгээдэд торгох, 699 хүнд тээврийн хэрэгсэл жолоодох эрхийг хасжээ.

Түүнчлэн гэр бүлийн хүчирхийлэл үйлдэх, танхайрах, жолоодох эрхгүй этгээд согтуугаар тээврийн хэрэгсэл жолоодох зэрэг зөрчил гаргасан 496 этгээдийг баривчлуулах саналыг шүүхэд хүргүүлж шийдвэрлүүлсэн байна.

Тухайлбал  Э-д Эрүүгийн хуулийн тусгай ангийн 12.1 дүгээр зүйлийн 4 дэх хэсэгт зааснаар шалгаж, шүүхэд шилжүүлэх саналтай прокурорын байгууллагад шилжүүлжээ.

Categories
мэдээ нийгэм

Тяньжин боомтод 4450 чингэлэг хүлээгдэж байна DNN.mn

Аравдугаар сарын 1-10-ны хооронд Тяньжин боомтоос Эрээн Замын-Үүд чиглэлд нийт арван галт тэрэг гарчээ. Түүнчлэн Тяньжин төмөр замын өртөөнд Монгол руу явахаар хүлээгдэж буй 4450 орчим чингэлэг үлдсэн байна. Тус боомтоос Эрээн Замын-Үүд чиглэлд дунджаар 7-10 хоногт тээвэрлэгдэж байгаа бөгөөд боомтод ирсэн чингэлгүүд дунджаар 70-90 хонож гарч байгаа юм.

Нийслэлийн гаалийн хяналтын талбайд нийт 1061 чингэлэг байгаагаас ачаатай 910, хоосон 151 чингэлэг байна.

Categories
мэдээ нийгэм цаг-үе

Нийслэлийн цэрэг татлага энэ сарын 19-нд эхэлнэ DNN.mn

Нийслэлийн хэмжээнд 2023 оны хоёрдугаар ээлжийн цэрэг татлагыг аравдугаар сарын 19-22-нд зохион байгуулна. Үүнтэй холбоотойгоор Нийслэлийн Цэрэг татлагын товчоо хуралдаж, цэрэг татлагын зохион байгуулалт, бэлтгэл ажлын талаар хэлэлцсэн юм.

Мөн 18-25 насны иргэдийн эрүүл мэндийн үзлэгийг зохион байгуулах, Засгийн газрын 2017 оны 144, 2019 оны 441 дүгээр тогтоолоор баталсан Иргэнийг цэргийн жинхэнэ албанд тэнцүүлэн татах журамд заасан өвчний онош, заалтуудаар тэнцүүлэх, чөлөөлөх асуудлаар санал солилцов.

НЗДТГ-ын Цэргийн штабын дарга Г.Ялалт “Бид батлан хамгаалах төрийн үйлчилгээг иргэдэд чирэгдэлгүй, хүнд сурталгүй, түргэн шуурхай хүргэхээр бэлтгэл ажлыг хангаад байна. Иргэд эрүүл мэндийн үзлэг, шинжилгээнд хамрагдсан бичиг баримт, цэргийн үүрэгтний үнэмлэхтэйгээ Цэрэг татлагын товчоонд ирж хамрагдана. Мөн цэрэгт татагдах боломжгүй хувийн шалтгаанаа өргөдлөөр бичиж, цэргийн байранд очиж шийдүүлнэ. Санаатай болон санаандгүйгээр тогтоосон газар, заасан цагт очоогүй тохиолдолд Зөрчлийн тухай хуулийн дагуу арга хэмжээ авдаг. Энэ нь коронавирусийн нөхцөл байдалтай холбоотойгоор 2020, 2021 онд хэрэгжээгүй. Харин өнгөрсөн жилийн хавраас хариуцлага ногдуулж эхэлсэн” хэмээлээ.

Цэрэг татлагыг дараах байршлуудад зохион байгуулах бөгөөд бэлтгэл ажлыг бүрэн хангажээ. Тодруулбал,

  • Баянзүрх дүүрэг-14 дүгээр сургууль
  • Сонгинохайрхан дүүрэг-83 дугаар сургууль
  • Баянгол дүүрэг-96 дугаар сургууль
  • Сүхбаатар дүүрэг-31 дүгээр сургууль
  • Хан-Уул дүүрэг-34 дүгээр сургууль
  • Чингэлтэй дүүрэг-5 дугаар сургууль
  • Багануур дүүрэг- “Гүн галуутай” цогцолбор сургууль
  • Багахангай дүүрэг- “Хангай” цогцолбор сургууль
  • Налайх дүүрэг-“Налайх” политехник коллежид зохион байгуулна
Categories
мэдээ нийгэм

НӨАТ-ын сугалааны тохирол лхагва гаригт болно DNN.mn

НӨАТ-ын сугалааны тохирол 10 сарын 18-ы лхагва гарагт 13:00 цагаас болно. Тохирлыг Боловсрол суваг ТВ болон гар утасны ebarimt аппликэйшнээр шууд дамжуулах юм.

Энэ удаагийн сугалааны тохиролд 2023 оны 9-р сарын 01-ээс 9-р сарын 30-ны хооронд худалдан авсан төлбөрийн баримт хамрагдана.

Categories
мэдээ цаг-үе эдийн-засаг

Улсын нэгдсэн төсвийн орлого 17.7 их наяд төгрөг болжээ DNN.mn

Улсын нэгдсэн төсвийн орлого, тусламжийн нийт хэмжээ 2023 оны эхний 9 сарын урьдчилсан гүйцэтгэлээр 17.7 их наяд төгрөг болж, өмнөх оны мөн үеэс 5.1 их наяд төгрөг буюу 40.7 хувиар өсчээ.
Харин тэнцвэржүүлсэн орлого 16.9 их наяд төгрөг болж, өмнөх оны мөн үеэс 5.4 их наяд төгрөг буюу 46.9 хувиар өссөн байна.
Улсын нэгдсэн төсвийн нийт зарлага, эргэж төлөгдөх цэвэр зээлийн нийт хэмжээ 14.7 их наяд төгрөг болж, тэнцвэржүүлсэн тэнцэл 2.2 их наяд төгрөгийн ашигтай гарлаа.
Дэлгэрэнгүй мэдээллийг https://tinyurl.com/wdyxm63s холбоосоор хандаж аваарай.
Categories
мэдээ энтертаймент-ертөнц

“Сэр сэр салхи” кино “Оскарт” нэр дэвшинэ DNN.mn

2024 оны Оскарын шагналын уран сайхны киноны төрөлд П.Лхагвадуламын “Сэр сэр салхи” (City of Wind) кино нэр дэвшсэн талааар  “Deadline” мэдээлжээ.

Саяхан Венецийн кино наадмаас жүжигчин Болд-Эрдэнэ “Venice Horizons Award”-ын шилдэг эрэгтэй дүрийн шагналыг хүртсэн. Уг кинонд 17 настай Зэ (Тэргэл Болд-Эрдэнэ) тосгоныхоо бөөгийн үүргийг гүйцэтгэхийн зэрэгцээ сургуульдаа шамдан суралцаж буй тухай өгүүлдэг. Зэ Маралаа (Номин-Эрдэнэ Ариунбямба) таарснаар түүний мэдрэмж сэрж, өөр бодит байдал боломжтой мэт санагдана. Лхагвадуламын найруулсан нөгөө богино хэмжээний кино болох “Есдүгээр сарын цас” нь 79 дэх удаагийн Венецийн олон улсын кино наадмаас “Шилдэг богино хэмжээний кино” номинацид Ориззонтигийн нэрэмжит шагналыг хүртэж байсан бол өнгөрсөн жил TIFF-ээс “Олон улсын шилдэг богино хэмжээний кино” шагналыг хүртсэн юм. Мөн өнгөрсөн тавдугаар сард Сэр сэр салхи киноны олон улсад худалдах эрхийг Бельгийн Брюссель хотод төвтэй “Best Friend Forever” компани авчээ.

Тэгвэл уг кино 2024 оны “Оскар”-ын шагналд Монголоос ийнхүү нэр дэвшиж, дэлхийн 53 улсын кинотой өрсөлдөхөөр болсон байна.

Categories
мэдээ нийгэм цаг-үе

ЦАГ АГААР: Ирэх 10 хоногийн цаг агаарын төлөв DNN.mn

2023 оны 10 дугаар сарын 16-наас 2023 оны 10 дугаар сарын 25-ныг хүртэлх цаг агаарын урьдчилсан төлөв

Хугацааны эхээр ихэнх нутгаар хүйтэрч, тал, хээрийн нутгаар салхитай байна.

Хур тунадас: 16-нд Монгол-Алтай, Хангай, Хөвсгөлийн уулархаг нутгаар, 17-нд Алтай, Хангай, Хөвсгөл, Хэнтийн уулархаг нутаг, Орхон-Сэлэнгийн сав газраар, 18-нд төв болон зүүн аймгуудын нутгийн хойд хэсгээр, 19-нд Халх голын сав газраар ялимгүй хур тунадас, 22-нд Хөвсгөлийн уулархаг нутаг, Орхон-Сэлэнгийн сав нутгаар, 23-нд Хэнтийн уулархаг нутаг, Онон, Улз голын хөндийгөөр, 24-нд Монгол-Алтайн уулархаг нутгаар, 25-нд баруун аймгуудын нутгийн зарим газраар бороо, нойтон цас, цас орж, зөөлөн цасан шуурга шуурна.

Салхи: 17-20-нд тал, хээрийн нутгаар секундэд 8-13 метр, 24-нд Алтайн салбар уулсаар, 25-нд баруун аймгуудын нутгаар секундэд 16-18 метр хүрч, шороон шуурга шуурна.

Агаарын температур: 16-нд баруун аймгуудын нутгаар, 17, 18-нд ихэнх нутгаар хүйтэрч Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Халх голын хөндийгөөр шөнөдөө 9-14 хэм хүйтэн, өдөртөө 2 хэм хүйтнээс 3 хэм дулаан, Хэнтийн уулархаг нутаг, Туул, Тэрэлж голын хөндийгөөр шөнөдөө 6-11 хэм хүйтэн, өдөртөө 0-5 хэм, говийн бүс нутгийн өмнөд хэсгээр шөнөдөө 0-5 хэм, өдөртөө 8-13 хэм дулаан, бусад нутгаар шөнөдөө 1-6 хэм, өдөртөө 3-8 хэм дулаан байна. 19-нд нутгийн баруун хагаст, цаашдаа ихэнх нутгаар өдөртөө бага зэрэг дулаарна.

Улаанбаатар хот орчмын 10 хоногийн цаг агаарын урьдчилсан төлөв

Хур тунадас: 17-нд ялимгүй хур тунадас орно. Бусад хугацаанд хур тунадас орохгүй.

Салхи: 17-18-нд баруун хойноос секундэд 12-14 метр хүрч ширүүснэ. Бусад хугацаанд секундэд 5-10 метр.

Агаарын температур: Хүйтэрч шөнөдөө Яармаг-Сонгины орчмоор 5-10 хэм, бусад хэсгээр 0-5 хэм хүйтэн, өдөртөө 3-8 хэм дулаан, 20-наас бага зэрэг дулаарч шөнөдөө -2 хэм хүйтнээс 3 хэм, өдөртөө 8-13 хэм дулаан байна.